Një person ka mbetur i plagosur në Kuç të Vlorës si pasojë e një shkëmbimi me armë zjarri. Sipas burimeve, shkëmbimi i zjarrit ka ndodhur në një parcelë me drogë dhe si pasojë ka mbetur i plagosur një person me dy plumba. Burimet e policisë bënë të ditur se, Vangjel Danina është transportuar në Spitalin Rajonal të Gjirokastrës, ndërsa nuk ka pranuar që të japë asnjë shpjegim se si ka ndodhur ngjarja. I plagosuri Vangjel Danina po ruhet nga policët në spital, ndërsa sipas mjekëve, ai është jashtë rrezikut për jetën nga plagët që ka marrë nga plumbat.
Burime nga Policia e Gjirokastrës bëjnë me dije se Vangjel Danina mund të ketë mbetur i plagosur gjatë një shkëmbimi zjarri teksa ka qenë duke ruajtur ndonjë parcelë me kanabis në malësinë e Kuçit. Policia ka nisur hetimet për zbardhjen e plotë të ngjarjes dhe identifikimin e autorëve.
