Në mjediset e Bashkisë Kamëz u zhvillua një takim i Shoqatës së Bashkive të Shqipërisë. Takimi u hap nga kryetari i Bashkisë Kamëz, Xhelal Mziu. Pasi përshëndeti për prezencën në këtë takim të pranishmit, z. Mziu në fjalën e tij hyrëse paraqiti disa nga shqetësimet që ka sot pushteti vendor. Qeveria shqiptare vazhdon të akordojë grandin për pushtetin vendor në masën 1% të GDP-së, ku në këtë vlerësim raporti me pushtetet vendore që qeverisen nga të djathtët është në raportin 1 me 3 apo 1 me 4, duke mos përmendur Bashkinë Kamëz, për të cilën ky raport varion me masën 1 me 20. Pra, kjo panoramë diskriminuese financiare që sorollatet në dyert e qeverisë qendrore po thellon çdo ditë e më tepër shkallën e problematikave themelore të qytetarëve të këtyre bashkive.
“Po marrim rastin e Fondit Shqiptar të Zhvillimit, u shpreh Mziu, i cili ka financuar në shumë e shumë projekte ku për hir të së vërtetës, Bashkia Kamëz nuk ka përfituar qoftë edhe një projekt të vetëm. Por ky shqetësim nuk është vetëm për Bashkinë Kamëz, por edhe për mjaft kolegë të djathtë dhe bashkitë që drejtojnë, të cilat nuk janë përfituese. Kjo është një tjetër ndasi ku politikisht janë diskriminuar bashkitë e djathta.
Pa u thelluar shumë, vetëm po të kapim rastin e ujësjellës-kanalizimeve, ku Bashkia Kamëz ka qenë e privuar pikërisht nga investimet në këtë linjë, edhe pse është njësia administrative më nevojtare për implementimin e projekteve të tilla, duke anashkaluar qenësisht këtë interes qytetar.
Delegimi i kompetencave është një tjetër komponent ku asgjë nuk është bërë në këtë drejtim. Edhe pse kemi 45% mungesë personeli parauniversitar dhe po në të njëjtën shifër të personelit ndihmës, ligjërisht kjo kompetencë duhet t’i kishte kaluar pushtetit vendor. Një tjetër kompetencë është dhe ajo e kalimit të bordeve të kullimit në drejtim të pushtetit vendor dhe është i njëjti standard, ku qeveria qendrore, përveç delegimit të strukturës organike asnjë lloj kompetence tjetër. Apo kompetenca e zjarrfikëseve e cila realizohet nga Bashkia Tiranë dhe për shërbimet të cilat as shikohen dhe as njoftohen, vendoset fatura financiare dhe ajo tatimore”, – tha ndër të tjera kryebashkiaku Mziu.
