Në një deklaratë të publikuar në rrjetin social Facebook, kandidati i Koalicionit Euroatlantik në qarkun Vlorë, Myzafer Elezi, ka risjellë në vëmendje propozimet konkrete të forcës politike që përfaqëson, me synimin për të ndërtuar një sistem drejtësie të ndershëm dhe për t’i rikthyer qytetarëve besimin te institucionet shtetërore.
Me moton “Shqipëria meriton drejtësi”, Elezi thekson rëndësinë e ndarjes përfundimtare me korrupsionin dhe padrejtësitë që kanë penguar përparimin e vendit për dekada me radhë. Ai shprehet se Koalicioni Euroatlantik është i vendosur të sjellë ndryshimin përmes një platforme që vendos drejtësinë dhe sigurinë në qendër të vizionit politik.
Masat e propozuara për një sistem të drejtë dhe të ndershëm përfshijnë:
– Heqjen e imunitetit për deputetët dhe zyrtarët e lartë, duke mundësuar hetime të pavarura nga SPAK.
– Zbatimin e vetting-ut për politikanët, për të larguar nga skena politike individët që kanë abuzuar me pushtetin.
– Krijimin e Njësisë së Zbulimit dhe Rikuperimit të Pasurive të Vjedhura.
– Themelimin e Gjykatës së Kontrollit të Shtetit, si një mekanizëm për të ndalur shpërdorimin e fondeve publike.
– Anulimin e kontratave të dyshimta të PPP-ve dhe koncesioneve korruptive.
– Konfiskimin e pasurive të përfituara në mënyrë të paligjshme nga zyrtarët.
Në fushën e sigurisë dhe rendit publik, Elezi propozon:
– Kthimin e pronave tek të ligjshmit dhe një proces të drejtë kompensimi.
– Njohjen e statusit të të përndjekurve politikë me të njëjtat të drejta si ish-ushtarakët.
– Themelimin e një Xhandarmërie Kombëtare me 1000 efektivë të rinj për të garantuar rendin dhe për të luftuar krimin.
– Programin “Shqiptarët për Shqipërinë”, ku 5000 të rinj do të përfshihen në shërbimin aktiv ushtarak, me mundësi formimi profesional të financuar nga shteti.
Myzafer Elezi thekson se këto iniciativa janë pjesë e një vizioni që synon forcimin e lidhjeve strategjike të Shqipërisë me SHBA dhe BE, si e vetmja rrugë për të garantuar një të ardhme të sigurt dhe të ndershme për të gjithë qytetarët.
Në fund të mesazhit të tij, Elezi u bën thirrje qytetarëve të Vlorës, Sarandës, Delvinës dhe gjithë jugut të vendit që të bashkohen në këtë përpjekje për ndryshim dhe të mbështesin Koalicionin Euroatlantik në zgjedhjet e ardhshme.
“Shqipëria meriton drejtësi dhe ne jemi këtu për ta bërë realitet”, përfundon Elezi në deklaratën e tij.
