Seanca gjyqësore për pyetjen dhe ballafaqimin e dëshmitarit të mbrojtur Ylvi Beqja me Emiliano Shullazin dhe pjesëtarët e bandës së tij u shty përsëri ditën e djeshme. Shullazi nuk është paraqitur përsëri në seancën gjyqësore, ndërsa avokatët e të pandehurve u larguan nga salla e gjyqit, bashkë me të dyshuarit, të cilët nuk pranuan mbrojtës të caktuar kryesisht nga shteti. Gjykata e Krimeve të Rënda, duke parë mos paraqitjen e avokatëve të zgjedhur nga të pandehurit, i caktoi avokat kryesisht të pandehurve, të cilët refuzuan duke kërkuar largimin e këtyre avokatëve nga salla e gjyqit.
Veç avokatëve kryesisht, nga salla u larguan edhe avokatët e zgjedhur nga vetë të pandehurit dhe këta të fundit, të cilët debatuan me gjykatën për mos vazhdimin e seancës. Togat e zeza kërkuan që seanca të vazhdojë, por të pandehurit me arsyetimet e ndryshme proceduriale kërkuan shtyrjen, kërkesë kjo që nuk u pranua. Të ndodhur në këto kushte, për të mos zhvilluar seancën, të pandehurit u larguan bashkë me avokatët e tyre.
Gjykata, tha se do të ankohet pranë Dhomës Kombëtare të Avokatisë, ku do të kërkojë marrjen e masave disiplinore ndaj mbrojtësve që nuk pranojnë të paraqiten në sallë dhe atyre që largohen, pasi në proces janë 5 të pandehur. Gjithashtu, mësohet se gjykata do t’i kërkojë ndihmë për zhbllokimin e këtij procesi edhe Ministrisë së Drejtësisë, për marrjen e masave për krijimin e kushteve që të zhvillohet procesi gjyqësor. Nga ana tjetër, në sallë u paraqit dëshmitari i mbrojtur Ylvi Beqja, që kërkoi që të pyetet dhe të japë shpjegime për kërcënimet dhe gjobat ndaj tij.
Zvarritja e seancave gjyqësore bëhet me qëllim për të çuar drejt lirisë Emiliano Shullazin. Për t’ia arritur këtij qëllimi po përdoret e njëjta skemë si ajo e lirimit nga burgu të ish-kapobandës së Durrësit, Lulzim Berisha, i cili i bëri kërkesë Gjykatës që të lirohej nga burgu, sepse vuante nga një sëmundje e rëndë. Edhe Shullazi ka deklaruar se është i sëmurë dhe para pak kohësh me këtë pretendim u shtrua në spital. Pas kësaj sajese me porosi të Ramës, pritet që mjekët nën presion direkt të organizatës kriminale të paraqesin një raport për të liruar Shullazin nga burgu.
