Nëse ka një pakt të fortë mes Edi Ramës dhe Sali Berishës, përveç pazareve të ditës, ai synon të godasë çdo emër të ri në politikë që mund t’i zëvendësojë.
Ashtu si Edi Rama, i dha vulën Berishës, duke goditur Lulzim Bashën dhe të tjerët që mund të avanconin si opozitë pa njolla, po kështu edhe Sali Berisha po e ndihmon kreun e mazhorancës duke sulmuar politikanët socialist që mund të konsiderohen pasardhës së tij.
Lajmi i sotëm, që në kuadrin e hetimit të pasurisë ndaj Erion Veliajt, procedim që ka nisur prej kohësh, oficerët e BKH-së kanë shkuar në banesën e kryebashkiakut për të marrë telefonin e bashkëshortes së tij Ajola Xoxa. Nuk ka pasur një kontroll banese por vetëm një tërheqje të aparatit telefonik. Megjithatë, edhe sikur të ketë kontroll banese, tashmë kjo procedurë është bërë rutinë, në një kohë kur një pjesë e madhe e politikanëve dhe zyrtarëve të lartë janë nën hetim nga SPAK. Sali Berisha dhe Ilir Meta, janë kthyer në kullesë makaronash për kontrollet e bastisjet procedurale, siç ka ndodhur në shumë zyrtarë të lartë të qeverisë së Edi Ramës.
Hetimet e SPAK, janë sot një rutinë normale për të gjithë VIP-at e politikës. Edhe pse me hetime, madje edhe me procese mbi supe, Sali Berisha, Ilir Meta dhe Edi Rama, po vijojnë sikur s’u ka ndodhur gjë në drejtimin e politikës shqiptare.
Atëherë përse po luhet me lajme bombastike në lidhje me Veliajn, ku nuk thuhet e vërteta por shpërndahen fake news-e? Sepse tashmë është e qartë se SHBA dhe BE duan të largojnë elitën e vjetër politike në Shqipëri, e cila kërkon të rrijë me zor, edhe pse është e mbushur deri në grykë me mëkate e krime.
Sali Berisha është një kufomë politike, ndërkohë që pritet të dënohet për aferën ‘Partizani’ e më pas për 21 Janarin e Gërdecin. Ndërkaq, Edi Rama është i zhytur në grykë, qoftë me dosjen McGonigal, me të vëllain, por edhe me lidhjet e frikshme që ka me krimin, e që po zbardhen në platformat e kriptuara.
Duke mos pasur rrugëdalje, Edi Rama dhe Sali Berisha po shtrëngojnë paktin mes vedi, siç bënë dje për Gjykatën Kushtetuese, për të treguar se nuk do të lejojnë hapjen e dritës jeshile për rinovimin e elitës në vend.
Këtu realisht është loja për të ndalur planin ndërkombëtar të fshirjes së elitës së vjetër. Që si Rama, ashtu edhe Berisha, po e mbajnë me thonj.
Veliaj është një politikan që po përfundon mandatin e tretë në krye të bashkisë së Tiranës. Që është i fundit, pasi ligjërisht nuk mund të rikandidojë. E duke qenë politikani më i votuar pas Edi Ramës në PS, ky i fundit po i vë prita që të mos avancojë më tej, siç edhe Sali Berisha i ka vënë pritë të gjithëve, duke nisur nga Lulzim Basha./ Pamfleti
