Situatë e rëndë nga zjarret në Majën e Runës në Kukës. Komisioni i Mbrojtjes Civile në Kukës njoftoi se situata e zjarreve në Majën e Runës, në njesinë administrative Malzi vazhdon të jetë problematike me gjithë punën e bërë nga forcat e angazhuara nga bashkia Kukës dhe forcat e DMR-së Kukës.
Sot nga bashkia janë angazhuar 10 forca të MZSH-së, 6 punonjës të pyjores dhe Nj.Ad Malzi, 4 nga komuniteti dhe 15 forca të DMR-së Kukës. Tashmë pritet edhe ardhja e një helikopteri”.
Deri mbrëmjen e së dielës, në të gjithë vendin punohej për shuarjen e 10 vatrave të zjarrit, një pjesë e të cilave të reja dhe një pjesë të favorizuar në përhapje nga era e fortë.
Edhe mbrëmë Ministria e Mbrojtjes njoftoi se vazhdon të jetë problematike vatra e zjarrit në Majën e Rrunës, Laku i Mollave dhe Laku i Thive, njësia administrative Malzi, bashkia Kukës, pavarësisht punës së bërë nga forcat e angazhuara të bashkisë dhe FA për izolimin dhe mbajtjen e saj nën kontroll, pasi vazhdojnë të digjen trungje brenda vatrës. Terreni është i vështirë dhe në disa drejtime është e pamundur ndërhyrja nga toka.
