Që të përdorësh aplikacionin ‘Sky ECC’, duhet të kesh një lloj telefoni specifik. Eksperti i sigurisë Lavdrim Lita ka zbuluar detaje të reja në lidhje me aplikacionin ‘Sky ECC’, i cili ishte kthyer në parajsën e komunikimit të botës së krimit në vendin tonë.
Duke folur në emisionin “Shqipëria LIVE”, ai tha se në vendin tonë, telefonat e enkriptuar për përdorimin e këtij aplikacioni vijnë nga mafia serbe.
Këta persona, ia shesin një shqiptari, i cili i shpërndan tek bandat dhe personat që e përdorin aplikacionin. Ai shtoi se identiteti i këtij personi deri më sot mbetet mister.
“Që të përdorësh aplikacionin ‘Sky ECC’, duhet të kesh një lloj telefoni specifik. Shitësit e këtyre telefonave janë nga mafia serbe, Janë sjellë në veri rreth 1000-1500 telefona të enkriptuar dhe më pas, ata janë shpërndarë nga një shqiptar. Kompania kanadeze ua shiste shpërndarësve të saj, teksa tregtarët më të mëdhenj janë serbët. Nuk është zbuluar ende deri më sot kush është personi që i shiste në Shqipëri dhe që kujdesej për to. Personat që i përdornin paguanin rreth 2000 euro në javë, sepse ndryshe llogaria e tyre u mbyllej”, tha ai.
