Teksa po hetonte ish-drejtorin e ARRSH, Evis Berberi i cili ndodhet në pranga nën dyshimet për korrupsion e pastrim parash, Prokuroria e Posaçme zbuloi të dhëna për implikimin e të tjerë zyrtarëve të lartë të përfshirë në skandalin e abuzimeve me tenderat.
Nën akuzë është vënë Gentjan Gjyli, kreu i ARRSH, një prej njerëzve më të besuar të zv/kryeministres Belinda Balluku. Akuza Gjylit iu komunikua ditën e djeshme nga Prokuroria e Posaçme.
Burime për gazetaren Klodiana Lala konfirmojnë se po ashtu lidhur me të njëjtën çështje, është marrë i pandehur edhe Erald Elezi, administrator i KESH, si dhe 18 persona të tjerë.
Bëhet fjalë për abuzime me tenderat, një prej të cilëve është tenderi 2 milionë euro për supervizimin e tunelit të Llogarasë.
Po ashtu është ngritur akuzë e re edhe për Valter Begajn sepse kompania e tij NET Group, në bashkëpunim me “Hill International”, kanë fituar tenderin në shkelje të ligjit.
