Nga Namir Lapardhaja
Edi Rama po i trajton shqiptarët si budallenj kur thotë se vetëm ai mund ta integrojë Shqipërinë në Bashkimin Evropian. Kjo deklaratë është jo vetëm fyese, por edhe e pavërtetë, pasi zgjerimi i BE-së me vende të reja është një politikë e vetë Bashkimit Evropian dhe nuk varet nga dëshira apo aftësitë e një individi të vetëm.
Nën drejtimin e Edi Ramës, Shqipëria nuk ka bërë hapa drejt integrimit, përkundrazi është larguar edhe më shumë nga parimet e familjes së madhe europiane. Në këto 12 vite të qeverisjes së tij, edhe pse ka pasur një pushtet thuajse absolut, ai nuk ka arritur të çojë përpara reformat e nevojshme për anëtarësimin e Shqipërisë. Përkundrazi, sipas raporteve ndërkombëtare, korrupsioni është rritur, krimi i organizuar ka lulëzuar dhe trafiku i lëndëve narkotike është shtuar ndjeshëm.
Institucionet e pavarura janë dobësuar dhe janë vënë nën kontrollin e qeverisë, duke cenuar parimin e ndarjes së pushteteve. Puna e SPAK-ut, e vetmja që ka marrë përgëzime në raportin e fundit të Bashkimit Evropian për Shqipërinë, është ngritur pikërisht mbi luftën që Prokuroria e Posaçme i ka shpallur korrupsionit qeveritar të Edi Ramës, hetimeve dhe arrestimeve të bashkëpunëtorëve të tij të ngushtë.
Në vend që të zbatojë reformat që do ta afronin Shqipërinë me BE-në, Rama ka ndërtuar një sistem klientelist, ku kontratat publike shpërndahen me procedura të dyshimta dhe transparenca mungon. Kjo ka bërë që ekonomia të dominohet nga një grup oligarkësh, të cilët marrin para publike nga qeveria dhe i investojnë për të mbajtur në këmbë një opozitë, me të cilën kjo mazhorancë nuk bie kurrë.
Prandaj, shqiptarët nuk duhet të bien pre e propagandës që përpiqet të krijojë idenë se pa Edi Ramën Shqipëria nuk mund të bëhet pjesë e BE-së. Pa një luftë të vërtetë kundër korrupsionit, pa institucione të pavarura dhe pa një ekonomi të hapur, rruga e Shqipërisë drejt BE-së do të mbetet thjesht një ëndërr.
Të gjitha këto, mund të arrihen lehtësisht pa Edi Ramën dhe sistemin e tij korruptiv në pushtet.
