Një nga prodhuesit kryesorë të vajit të ullirit në Spanjë po shqyrton mundësinë e një zgjerimi në SHBA në përgjigje të luftës së tarifave të nisur nga Uashingtoni. Gjithashtu, konkurrentët e saj po nxitojnë me eksportet, ndërsa pjesa më e madhe e tarifave të reja është pezulluar.
Spanja prodhon rreth 40% të vajit të ullirit në botë dhe dërgon rreth 180,000 tonë metrikë në vit në Shtetet e Bashkuara.
“Në periudhën afatmesme dhe afatgjatë, mund të na duhet të bëjmë më shumë investime në Shtetet e Bashkuara, të cilat në fund të fundit janë investime që do të bëhen atje në vend të Evropës”, tha Antonio Luque, CEO i Dcoop, një nga dy partnerët e markës më të shitur amerikane Pompeian.
Ai tha se Dcoop, një kooperativë prej 75,000 familjesh në rajonin jugor të Andaluzisë, mund të zgjerojë plantacionet e saj ende modeste të ullirit në Shtetet e Bashkuara, ku Pompeian ka dy fabrika ambalazhimi. Vitin e kaluar, shitjet e Dcoop atje arritën në total 240 milionë euro.
Administrata e Presidentit Donald Trump ka vendosur një tarifë prej 10% për importet e shumicës së mallrave evropiane, duke përfshirë vajin e ullirit, megjithëse njoftoi një pauzë 90-ditore të mërkurën për tarifat më të larta “reciproke” prej 25%.
Luque tha se pasiguria rreth politikave tregtare të Trump e bën të vështirë planifikimin, por Dcoop ende shpreson të zgjeronjë pjesën e saj të tregut në SHBA, duke besuar se një tarifë prej 10% nuk do të dëmtonte ndjeshëm shitjet.
Shoqata e eksportuesve spanjollë Asoliva pret që furnizimi me vaj ulliri të rritet gjatë muajve të ardhshëm, falë një rimëkëmbjeje nga një thatësirë e zgjatur. Gjithashtu, rënia e mundshme e çmimeve mund të kompensojë pjesërisht tarifat.
Prodhues të tjerë si Nortoliva, e cila eksporton 10% të prodhimit të saj në SHBA, po përshpejtojnë dërgesat e tyre përpara se të hyjë në fuqi tarifa prej 25%.
“Ne po ngarkojmë porosi të reja në SHBA sot dhe javën tjetër”, tha drejtori i përgjithshëm i Nortoliva, Jordi Guiu. “Klientët tanë amerikanë po rrisin porositë, ata duan të përshpejtojnë dërgesat për të shmangur pagesën e tarifës shtesë brenda 90 ditësh,” u shpreh ai./SCAN
