Kandidatja e Koalicionit Euroatlantik në Tiranë, Taulanda Jupi, ka reaguar sot përmes një video-mesazhi të publikuar në rrjetet e saj sociale, pas deklaratës ironike të Kryeministrit Edi Rama, i cili e quajti “të guximshme”. Jupi e kishte përshëndetur Ramën me qesëndi në një dalje live me udhëheqësin politik të Koalicionit Euroatlantik Lulzim Basha, gjatë një takimi në Njësinë nr. 5.
“Po, unë kam guxim, sepse jam njeri i lirë dhe i pakorruptuar”, u shpreh Jupi në videon e saj përpara disa prej institucioneve më të rëndësishme kulturore të vendit, të cilat ajo i cilësoi si simbol i shpërdorimit dhe dështimeve të qeverisë Rama.
Duke qëndruar përpara themeleve ku dikur qëndronte Teatri Kombëtar, Jupi kujtoi mënyrën se si ai u shemb: me bashkëpunimin e atyre që ajo i cilëson si “shokët” e Ramës të cilët ai e di “vetë se ku janë tani”.
Ajo më tej ngriti pyetjen se çfarë plani ka qeveria me Galerinë e Arteve: “Mos ndoshta edhe aty do të ndërtoni një kullë?”, pyeti ajo, ndërsa në vijim u ndal te Muzeu Historik Kombëtar, i cili vijon të qëndrojë i mbyllur pa një datë të qartë për rihapjen.
Jupi solli në vëmendje dhe gjendjen e Bibliotekës Kombëtare, që “u përmbyt, u dogj” dhe Rama nuk ia doli dot të ndërtonte një Bibliotekë Kombëtare të re, ndonëse ka 12 vite në pushtet. Po ashtu, ajo denoncoi planet për shembjen e Teatrit të Kukullave dhe ndërtimin e një tjetër kulle në vendin e tij.
Në këtë reagim publik, kandidatja e Koalicionit Euroatlantik evidentoi edhe dështimin e Ramës për të miratuar një ligji për artin dhe kulturën, si dhe mosrealizimin e mekanizmit të shumëkërkuar nga komuniteti i kinematografisë, tax rebate.
Jupi akuzoi Ramën se “e mbylli Ministrinë e Kulturës dhe e futi nën sqetullën e Ministrisë së Ekonomisë. I bëri artistët më të varfër” dhe kulturën më të heshtur.
Në mbyllje të mesazhit të saj, ajo i drejtoi një pyetje të drejtpërdrejtë Kryeministrit Rama:
“Ke një përgjigje për këto?”
