Nga Rigels Seliman
Në vitin 2021, Sali Berisha u shpall “non-grata” nga Departamenti i Shtetit Amerikan, teksa e akuzon për korrupsion dhe minim të demokracisë. Ky vendim e përjashtoi ish-kryeministrin shqiptar nga çdo mundësi udhëtimi dhe angazhimi në SHBA, duke e konsideruar atë një figurë të dëmshme për demokracinë e atij vendi. Shumë shqiptarë dhe sidomos, ai dhe ndjekësit e tij të flaktë, kanë ngritur alibinë se ky vendim është një “gabim” dhe se është i mundur një rishikim i kësaj mase nga administrat “Trump”. Megjithatë, të besosh se SHBA do ta heqë këtë sanksion është një iluzion i pastër.
Shtetet e Bashkuara të Amerikës janë një superfuqi me politika të qarta dhe të qendrueshme, veçanërisht kur bëhet fjalë për personazhe që janë shpallur “non-grata” për arsye të korrupsionit dhe minim të demokracisë. Asnjëherë, deri tani, nuk ka pasur asnjë shembull të tërheqjes së një vendimi të tillë. Historia tregon se SHBA nuk tërhiqen nga vendimet e tilla, pavarësisht presioneve politike apo thirrjeve nga individë të caktuar. Të besosh se ky vendim mund të ndryshohet është si t’i thuash hallos-xhaja.
Për më tepër, vendimi i SHBA ka pasur një pasojë të drejtpërdrejtë dhe të ndjeshme në politikën shqiptare. Berisha, megjithëse një figurë e njohur dhe e fuqishme në Shqipëri, ka humbur mbështetje në arenën ndërkombëtare, veçanërisht nga aleatët strategjikë të vendit. Një tërheqje e “non-grata-s” do të ishte një mesazh i gabuar për qytetarët shqiptarë dhe do të nënvleftësonte përpjekjet ndërkombëtare për të luftuar korrupsionin dhe ndikimin e grupeve të interesit në politikë.
Për të qenë të qartë, SHBA ka një angazhim të madh në luftën kundër korrupsionit në Shqipëri dhe Ballkan dhe heqja e “non-gratës” për një politikan të përfshirë në akuza kaq serioze do të dërgonte një mesazh të dëmshëm për rajonin. Në këtë kontekst, çdo shpresë për një kthim në favor të Berishës është thjesht një ëndërr pa bazë dhe një përpjekje për të devijuar realitetin politik.
Në përfundim, ideja që SHBA mund të heqin “non-gratën” ndaj Sali Berishës është një iluzion dhe një tentativë për të mbajtur gjallë shpresat e humbura. Të besosh këtë është si të imagjinosh se halloja është xhaje. Realiteti është shumë më i qartë: SHBA nuk tërhiqen nga vendimet e tilla dhe vendosja e “non-gratës” ndaj Berishës mbetet një akt i pandryshueshëm.
