Igor Tudor e di dhe e ka thënë edhe në konferencën e tij të parë si trajner i Juventusit. Nuk ka kohë për të humbur, kanë mbetur vetëm 9 ndeshje për të siguruar kualifikimin për Ligën e Kampioneve të sezonit të ardhshëm.
Një detyrë që e ngarkon, për shkak të pasionit të tij për Juventusin, pasi ai e di se mund ta imponojë menjëherë filozofinë e tij te ekipi, ashtu siç ka ndodhur në katër rastet e mëparshme kur ishte emëruar në mes të sezonit si trajner në Serie A.
Këtë herë faktet po e përballin me Xhenoan, një skuadër që është shumë e sikletshme, por që Tudor me Juventusin e tij kërkon vetëm fitoren. Tudor do të bëjë sot debutimin në orën 18:00 dhe në “favor” ka historinë. E shkuara tregon për sinjale pozitive në debutim.
E KALUARA- Në prill të vitit 2018, ai ftohet nga Udineze për të zëvendësuar Odon dhe debuton me një barazim 3-3 ndaj Beneventos, një barazim që ka shijen e një disfate pasi goli i Sanjasë erdhi pikërisht në minutën e 90-të, kur trajneri kroat po shpresonte për fitoren e parë. Megjithatë, në fund të sezonit, arriti mbijetesën, falë dy fitoreve dhe një humbjeje, me mesatare pikësh për ndeshje që kaloi nga 0,97 e Odos në 1,75. Në sezonin tjetër, ai thirret sërish nga Udineze, këtë herë për të zëvendësuar Nikolën. Në mars 2019, arrin një fitore 2-0 kundër Xhenoas, që do të jetë edhe kundërshtari i tij në debutimin si trajner i Juventusit, dhe më pas siguron edhe katër fitore të tjera, tre barazime dhe tri humbje. Një tjetër mbijetesë e arritur dhe mesatare pikësh që kalon nga 0,89 në 1,6.
VERONA- Në shtator të vitit 2021, shkon te Verona që kishte shkarkuar Di Françeskon, një lëvizje jo të zakonshme sepse ndodhi në fillim të sezonit. Megjithatë, Tudor fillon menjëherë me fitore 3-2 kundër Romës, dhe do të jetë një sezon i pabesueshëm për veronezët, të cilët, me 13 fitore të tjera, 11 barazime dhe 10 humbje, do ta mbyllin sezonin të nëntit në klasifikim.
LACIO- Përfundimisht, eksperienca te Lacio vitin e kaluar, në mars 2024, ku ai merr vendin e Sarit. Debuton me një fitore 1-0 kundër Juventusit të tij, pasuar nga katër fitore, tri barazime dhe një humbje, me mesatare pikësh që kalon nga 1,48 në 2 dhe kualifikimin në Ligën e Europës. Tani është radha për Juventusin, të bëjë një tjetër debutim me fitore dhe të sjellë në Torino të paktën objektivin minimal, i fundit për të cilin është duke luftuar skuadra bardhezi. Igor Tudor i gëzohet historisë, që në të shkuarën ka bërë që ai të jetë perfekt në debutimet me skuadrat që i kanë besuar stolin. Drejtuesit e Juventusit dhe tifozët po shpresojnë të ndodhë e njëjta histori, por gjithçka do të zbulohet duke nisur nga sot.
