Anna Luhrmann, ministrja gjermane e shtetit për Evropën dhe Klimën, ka raportuar se ajo dhe delegacioni i saj u kërcënuan me dhunë nga përfaqësuesit e Millorad Dodikut, presidenti i Republikës Srpska, gjatë një vizite të premten në qytetin e Banjallukë.
Në një postim në X, Luhrmann ka theksuar se takimi me shoqërinë civile dhe opozitën në këtë qytet ishte pozitiv dhe se qyteti kishte “njerëz të mirë”. Megjithatë, ajo e ka përshkruar veprimin e Dodikut si një “shenjë të dobësisë”, duke shtuar se veprimet e tij për shkëputjen e Republikës Srpska janë të papranueshme.
Luhrmann gjithashtu ka nënvizuar se Millorad Dodiku është izoluar dhe ka humbur mbështetje nga qytetarët e këtij entiteti, duke treguar se kërcënimet e tij janë vetëm një dëshmi e mungesës së forcës dhe popullaritetit të tij.
