Unioni i Gjyqtarëve të Shqipërisë ka dalë në përfundimin se ligji i “Vettingut”, pjesë e paketës së reformës në drejtësi, është i papajtueshëm me Kushtetutën dhe duhet që të shfuqizohet nga Gjykata Kushtetuese. Ky ka qenë vendimi i marrë në mbledhjen e djeshme të këtij unioni.
“Qëndrimi i Asamblesë së Unionit të gjyqtarëve të Shqipërisë është se ligji për ‘Vettingun’ ka papajtueshmëri me Kushtetutën e Republikës së Shqipërisë dhe për pasojë, do t’i kërkojë Gjykatës Kushtetuese shfuqizimin e këtij ligji. Gjithashtu, Asambleja autorizoi Bordin Drejtues që të shqyrtojë edhe ligjin për Statusin e Gjyqtarit dhe Prokurorit pasi, në disa pjesë të tij edhe ky ligj vjen në kundërshtim me dispozitat kushtetuese!”, thuhet në reagimin e Unionit të Gjyqtarëve.
Ligji i “Vettingut” është tashmë i pezulluar pas vendimit të disa ditëve më parë të Gjykatës Kushtetuese, e cila shqyrtoi kërkesën e Partisë Demokratike. Demokratët kërkojnë gjithashtu që ky ligj të shpallet antikushtetues, ndërsa aktualisht “Vettingu” do t’i dërgohet Komisionit të Venecias për mendim më të specializuar.
