Si të blesh Antoine Griezman? Ka vetëm një rrugë. Një ofertë e çmendur. Ky është plani i Manchester United për ta transferuar asin francez në “Old Traffod” gjatë merkatos së verës pasi Atletico Madrid kërkon të arkëtojë sa më shumë për sulmuesin. Nëse vërtetohet raportimi i “Daily Mail”, Griezman do të bëhej lojtari më i paguar në Premier League pasi shifrat që zbulohen janë vërtet të frikshme. 300 mijë paund në javë, kjo është shifra e propozuar në adresë të lojtarit francez, ndërsa në total bashkë me pagën e tij, Manchester United mund të shpenzojë deri në 155 milionë.
Kontratë 5-vjeçare për 26-vjeçarin dhe paga marramendëse që mund të kalojë edhe atë që përfiton aktualisht Rooney dhe Pogba po te Manchester United. Sipas “Daily Mail”, në arkën e Atleticos mund të shkojnë 90 milionë euro që është edhe klauzola e largimit të sulmuesit nga “Los Colchoneros”. Aktualisht, Griezman fiton gjysmën e kësaj shume në Spanjë dhe ai është shumë i qartë se paga e tij në Madrid nuk mund të rritet më shumë. Kontrata aktuale e francezit skadon në vitin 2018 dhe në këtë mënyrë, ky është shansi i fundit që Atletico të arkëtojë shumën e dëshiruar. Jose Mourinho ua ka bërë të qartë drejtuesve të klubit se është pikërisht sulmuesi i skuadrës së Simeones njeriu perfekt për projektin e tij duke marrë çekun prej 155 milionë paund duke projektuar një tjetër goditje të madhe vetëm një vit pas blerjes së Paul Pogba për rreth 100 milionë euro nga Juventusi.
