Komisioni Qendror i Zgjedhjeve ka ndryshuar sërish shifrën e pjesëmarrësve në votimet e 30 qershorit. E ndërsa në ditën e votimeve, kamikazët e Ramës në KQZ e rritën me 100 mijë numrin e votave nga ora 18:00 deri në 19:00, kohë kur mbyllej procesi, edhe pse në asnjë qendër votimi nuk kishte rradhë njerëzish që prisnin të votonin, duket se shifra e publikuar prej 771893 nuk ka kënaqur Rilindjen.
Së fundmi KQZ ka nxjerrë një tjetër shifër, duke çuar numrin e pjesëmarrësve në 812249 votues. Pra nga 21.6 % që deklaroi më 30 qershor, 3 ditë pas votimeve deklarohet se pjesëmarrja ishte 22.9 %.
Referuar të dhënave nga KQZ, forca e parë në votimet e 30 qershorit është Partia Socialiste, ndërsa si forcë e dytë është PDS e drejtuar nga Paskal Milo, e cila do të ketë numrin më të madh të këshilltarëve në këshillat bashkiake pas socialistëve.
Ndërkohë që KQZ nuk ka publikuar votat e pavlefshme, që janë me mijëra në rang vendi, duke ngritur dyshimet mbi procesin edhe për shkak të transparencës.
Opozita ka deklaruar se pjesëmarrja në votime ishte vetëm 15 %, duke akuzuar KQZ për manipulimin e shifrave. Ndërkohë mediat, por edhe në rrjetet sociale, janë denoncuar raste kur numri i votave të gjetura në kuti nuk përputhej me atë të votuesve që kishin marrë pjesë në proces.
