Kryetari i Vetëvendosjes, Albin Kurti tha se ka pritur rezultat ndryshe në Mitrovicë, ku kandidati i VV-së, Agim Bahtiri humbi zgjedhjet përballë Bedri Hamzës, raporton Gazeta Express.
Kurti tha se arsyeja e humbjes së Bahtirit mund të jetë edhe mosndihmesa e mjaftueshmë e partisë për Bahtirin.
“Kam pritur rezultat tjetër në Mitrovicë, edhe këtë do ta analizojmë, mbase nuk e kemi ndihmuar mjaftueshëm kandidatin tonë Agim Bahtiri të cilin e falenderoj përzemërsisht për kontributin dhe gjithashtu për besnikërinë ndaj Lëvizjes Vetëvendosje dhe për korrektësinë e tij në raport me mua si kryetar dhe kryeministër”, tha Kurti.
Bedri Hamza nga Partia Demokratike e Kosovës do të jetë kryetari i ri i Mitrovicës së Jugut. Votat tashmë janë numëruar dhe sipas të dhënave të publikuara nga Komisioni Qendror i Zgjedhjeve, Hamza ka marrë mbi 53,86% të tyre, duke e shmangur kështu balotazhin.
Kryetari në ikje dhe kandidati i Lëvizjes Vetëvendosje për kryetar të kësaj komune, Agim Bahtiri humbi, duke marrë 34,40% të votave.
