Një aksident me pasojë vdekjen e një personi dhe plagosjen e një tjetri është regjistruar mëngjesin e djeshëm në aksin rrugor Gjirokastër-Tepelenë. Ngjarja ka ndodhur rreth orës 06:00 në vendin e quajur “Kthesa e Viroit”, ku një automjet tip ‘Mercedes Benz’ me targa AA 976 OX ka dalë nga rruga dhe është përplasur me bordurën anësore. Për pasojë ka gjetur vdekjen e menjëhershme drejtuesi i mjetit Blerim Bizhga 32 vjeç, banues në Tepelenë.
Nga aksidenti ka mbetur i plagosur rëndë dhe shtetasi S.L, 24 vjeç, banues në Tepelenë, i cili udhëtonte në mjet. Ai është dërguar me urgjencë drejt Spitalit të Gjirokastrës për ndihmë mjekësore. Policia mbërriti menjëherë në vendin e ngjarjes dhe po punon për të zbardhur shkaqet e aksidentit. Nga hetimet paraprake, dyshohet se drejtuesi i mjetit ka humbur kontrollin e makinës, duke e nxjerrë atë jashtë rrugës.
Fatkeqësisht afër këtij vendi, 32-vjeçari Bizhga kishte humbur vëllain në një tjetër aksident automobilistik. Aksidenti ndodhi duke u gdhirë dita e hënë. Bizhga bashkë me shokun që kishte në makinë, Sokol Lushkaj, ndodhej në një prej lokaleve të Gjirokastrës nën shoqërinë e disa miqve të tyre. Të dy po ktheheshin nga Gjirokastra për në Tepelenë. Blerim Bizhga punonte në Qendrën Kombëtare të Regjistrimit në Bashkinë Tepelenë, ndërsa shoku i tij i plagosur rëndë nga aksidenti shërbente si ushtar me pagesë në Forcat e Armatosura.
Dyshohet se mjeti me të cilin ata udhëtonin ka dalë nga rruga për shkak të humbjes së kontrollit mbi makinë, por edhe prej mjegullës dhe lagështirës në rrugë.
