Gianluigi Buffon është krahasuar me Diego Maradona-n teksa Antonio Nocerino ka nxitur Juventusin dhe portierin të shtyjnë pensionin për një tjetër sezon. I cilësuar si një nga më të mëdhenjtë e historisë, Buffon akoma nuk ka vendosur mbi të ardhmen e tij pasi festoi 40-vjetorin në janar. Megjithëse mosha e tij është e madhe për një futbollist, numri 1 i Juves mbetet një pjesë integrale në luftën e Zonjës për të fituar titullin kampion në Serie A dhe Champions League. “Për mendimin tim, Buffon është Maradona i portierëve”, shprehet Nocerino për “Omnisport”. “Në 20-25 vitet e fundit, ai ka qenë numri një në botë. Ai është më i miri”. “Më mërzit fakti se ai do të tërhiqet së shpejti. Nuk e di situatën brenda klubit, por shpresoj të luajë edhe për një vit tjetër”. Juventus dhe Buffon, që është në kërkim të Scudetto-s së 7-të radhazi, do të zbresin në fushë sërish të mërkurën.
