Te Reali i Madridit janë mësuar që të bëjnë gjëra madhore dhe duke parë se pas ndeshjes së sotme në Cardiff, e cila mbyll zyrtarisht sezonin për spanjollët, do të largohen disa lojtarë, si Pepe, Koentrao, James etj., presidenti Florentino Perez kërkon t’i bëjë një dopio dhuratë të madhe trajnerit Zinedin Zidan.
Prej kohësh, te “galaktikët” kërkojnë Eden Hazardin dhe David de Gean dhe kjo mund të jetë vera e duhur për t’i pasur të dy. Duke parë fitoren e kampionatit që mungonte prej disa kohësh, numri një i klubit shpreson edhe në suksesin e Champions-it, por sido që të shkojë, ai është i kënaqur nga puna e trajnerit francez dhe është gati që t’ia pasurojë edhe më shumë grupin e lojtarëve.
Në Angli, mediat janë të sigurta se Chelsea ka marrë një ofertë prej 110 milionë eurosh për kartonin e fantazistit belg dhe kjo shifër është tunduese. Më shumë sesa klubi, duket se është vetë Hazard që shtyn për të luajtur në Madrid dhe kjo mund të kushtëzojë bindshëm tratativën.
Nga ana tjetër, për portierin gjërat duken edhe më të lehta, sepse Mançester Junantid është dorëzuar përballë dëshirës së vetë futbollistit dhe i kanë kërkuar Florentino Perezit 69 milionë euro për kartonin e tij. Kjo shifër nuk e tremb aspak Realin e Madridit dhe me shumë mundësi, do të jetë De Gea mbrojtësi ekstrem i sezonit të ardhshëm që do të mbrojë portën e kampionëve të Spanjës.
Ndërkohë, Mariano Diaz pritet të largohet nga Real Madridi gjatë verës. Skuadra e Malagas po synon që ta transferojë sulmuesin e ri të Real Madridit, Mariano Diaz, shkruan e përditshmja sportive madrilene, “Marca”. Sulmuesi spanjoll ka kontratë me Los Blancos deri në vitin 2021, por mund të huazohet në Malaga për të fituar përvojë.
Diaz ka debutuar me Real Madridin në sezonin e sapopërfunduar. Ai ka zhvilluar 14 ndeshje, 8 në La Liga dhe 5 në Copa del Rey dhe ka shënuar 5 gola. Duhet theksuar se Diaz është transferuar si lojtar i lirë në Real Madrid nga Barcelona në vitin 2011.
