Ditët e fundit u përfol se mbrojtësi Arlind Ajeti do të largohej nga Torino në merkaton e janarit për shkak se dëmtimi i pësuar në fillim të sezonit, ia ka pakësuar shanset e fitimit të një vendi te Torino, por e përditshmja italiane “Tuttosport” hedh poshtë një lajm të tillë, duke shkruar se mbrojtësi shqiptar e ka lënë pas dëmtimin dhe tashmë është gati të luftojë për vendin e tij.
Ai u afrua në vetë me parametra zero nga Frozinone dhe menjëherë la një përshtypje të mirë në klub. Gjatë fazës përgatitore, ai fitoi besimin e trajnerit Mihajloviç dhe po projektohej titullar për sezonin e ri, por një dëmtim i pësuar para fillimit të kampionat prishi çdo gjë. Tashmë, prej disa ditësh, Ajeti i është rikthyer sërvitjeve me grupin dhe me shumë mundësi do të grumbullohet nga trajneri për në takimin në transfertë ndaj Palermos.
Lojtari do të jetë pjesë e skuadrës për sfidën e së hënës ndaj Palermos. Konkurrenca e madhe në mbrojtjen e Torinos dhe dy dëmtimet që e kanë penguar kuqeziun në këtë start të sezonit, e kanë bërë Pescara-n të besojë se mund të sigurojë shërbimet e mbrojtësit të kombëtares shqiptare. “Delfinët” kanë nisur të mendojnë për përforcimet e merkatos së dimrit, ku synojnë afrimet e një sulmuesi dhe një mbrojtësi. Alternativa e preferuar në repartin difensiv mbetet pikërisht Ajeti, pavarësisht dy tentativave të dështuara të mëparshme.
Ndërkohë, Donis Avdijaj është një talent i padiskutueshëm i futbollit gjerman, ndërsa si drejtues atomjeti lë për të dëshiruar. 20-vjeçari i Schalkes ka sërish probleme me policinë gjermane, pasi është përfshirë sërish në aksidente automobilistike. Sipas autoriteteve në Osnabryk, ku jeton futbollisti, më 3 tetor Avdijaj nuk ka respektuar sinjalistikën, duke kaluar semaforin me të kuqe, veprim që ka rrezikuar seriozisht jetën e një personi që po udhëtonte me biçikletë.
Dhe sikur të mos mjaftonte ky rast, Avdijaj ka dëmtuar një automjet tjetër gjatë parkimit, dhe ç’është më e keqja nuk ka njoftuar për dëmin që ka bërë. Sikurse njofton “Bild”, lojtari ia ka treguar ngjarjen drejtorit sportiv Chtistia Heidel, i cili më pas e ka ndëshkuar me gjobë në bazë të rregullores së klubit.
Mesfushori shqiptar është një person me precedent përsa u përket aksidenteve automobilistike. Dy vite më parë, ai ishte shkaktar i një aksidenti me “Benz”-in e tij që kushtonte 150 mijë euro. Donis Avdijaj ishte kthyer vetëm pak ditë më parë në stërvitje pas mungesës tremujorë për shkak të një dëmtimi që pësoi gjatë fazës përgatitore.
Sezonin e kaluar talenti shqiptar luajti në formë huazimi te Sturm i Gracit, por drejtuesit e Schalkes të kënaqur me zhvillimin e tij si futbollist e kthyen në shtëpi. Për Avdijajn kanë shfaqur interes klube të mëdha në Europë, çka e detyroi “blutë” mbretërorë të përfshinin në kontratën e tij një klauzolë largimi që shkon thuajse 50 milionë euro.
