Mbrojtësi i Barcelonës, Ronald Arauho, u shfaq shumë i lumtur dhe ambicioz pasi nënshkroi rinovimin e tij këtë të martë me klubin blaugrana deri në vitin 2031. Mbrojtësi zbuloi se tifozët i kërkonin të qëndronte dhe, përveç kësaj, deklaroi se ka ende një llogari pa mbyllur, që është fitimi i Ligës së Kampionëve.
“Ndihem shumë mirënjohës për gjithë këto vite, gjithmonë e kam vënë re dashurinë e tifozëve ndaj meje. Njerëzit në rrugë më thanë qëndro, qëndro dhe kjo ishte diçka e jashtëzakonshme.
Jam i lumtur, sepse do të thotë që puna është duke u bërë mirë dhe shpresoj se do të ketë shumë gëzime”, tha Arauho. Në fakt, mbrojtësi tregoi anën e tij më ambicioze dhe nuk e fshehu se e ka në mendje të fitojë kupën “me veshë të mëdhenj”. “Jam i lumtur dhe shpresoj se do të jenë vite të shkëlqyera dhe se do të vijnë me tituj, gjë që është më e rëndësishmja.
Dua të vazhdoj të rritem si profesionist, e di sa i rëndësishëm jam dhe mendoj se mund të kontribuoj shumë. Dhe gjithashtu të fitojmë tituj. Ne kemi diçka në pritje, që është Liga e Kampionëve dhe është objektivi më i madh dhe ne do të shkojmë ta kërkojmë atë”, tha ai. Lojtari i Barçës e përsëriti shumë herë fjalën lumturi. “Kam punuar shumë për këtë”.
Rinovimi i mbrojtësit nuk ishte i lehtë. Të dyja palët kishin një vit që bisedonin dhe në disa raste negociatat kishin mbetur në ngërç. Juve madje paraqiti një ofertë këtë janar për lojtarin. Por, më në fund, ndërkombëtari vendosi të vazhdojë si lojtar i Barçës dhe të qëndrojë deri në vitin 2031. “Ju mund të shihni besimin e klubit tek ju dhe kjo është e rëndësishme sepse do të thotë se po i bëni gjërat mirë dhe puna është e mirë”, tha Arauho.
