Më shumë se 1,890 të burgosur palestinezë, pritet të lirohen nga Izraeli në këmbim të lirimit të 33 pengjeve të mbajtura nga Hamasi, si pjesë e marrëveshjes së armëpushimit të Gazës që fillon zyrtarisht në orën 8:30 të mëngjesit të së dielës.
Siç njoftoi Ministria e Jashtme egjiptiane, ky shkëmbim do të bëhet gjatë fazës së parë 42-ditore të marrëveshjes.
Në të njëjtën kohë, ministri i jashtëm egjiptian Badr Abdelati tha se 50 kamionë me karburant do të hyjnë në Gaza sapo të fillojë armëpushimi.
Egjipti parashikon “hyrjen e 600 kamionëve në ditë në enklavën e rrethuar, duke përfshirë 50 kamionë me karburant.”
“Ne shpresojmë që 300 kamionë do të shkojnë në veri të Rripit të Gazës,” tha ai në një konferencë të përbashkët shtypi me homologun e tij nigerian.
Për muaj të tërë, Gaza veriore ka qenë nën bombardime intensive izraelite, duke vrarë dhe zhvendosur mijëra njerëz dhe duke përkeqësuar një situatë tashmë të rëndë humanitare.
Në këtë kuadër, dhjetëra kamionë të ngarkuar me ndihma dhe autoambulanca janë rreshtuar në pikën kufitare Rafah në pritje të fillimit të armëpushimit.
