Nga një djalë i keq në hero. Kjo ka ndodhur me Serge Aurier, mbrojtësin e majtë të Paris Saint Germain, që në ndeshjen kualifikuese të Botërorit 2018 ndërmjet Bregut të Fildishtë dhe Malit i shpëtoi jetën lojtarit kundërshtar. Prej minutave të para të sfidës, mbrojtësi i Malit, Moussa Doumbia u shemb në tokë pa ndjenja pas një dueli të ashpër në ajër. I ndodhur pranë aksionit, Aurier vrapoi menjëherë në ndihmë. Fillimisht lojtari i kampionëve të Francës e pozicionoi Doumbia në njërin krah dhe i futi gishtat në gojë, për të evituar që t’i merrej fryma.
Trajneri i Malit, Alain Giresse shpjegoi se, “Aurier me një lojtar kundërshtar ishin vendimtarë në dhënien e ndihmës së shpejtë, deri në momentin kur mjekët hynë në fushë, pasi Doumbia rrezikonte të humbte jetën”.
Megjithatë, edhe në ditën kur u shndërrua në hero, Serge Aurier nuk arriti të evitonte polemikat dhe veprimet e dënueshme, që kanë karakterizuar karrierën e lojtarit. Pas golit të tretë të Bregut të Fildishtë, që vulosi suksesin 3-1 të ekipit vendas, Aurier vrapoi drejt tribunës së tifozëve kundërshtarë, duke imituar gjestin e therrjes.
Në shtator të vitit të kaluar, Serge Aurier ishte dënuar me dy muaj burg, sepse fillimisht fyeu dhe më pas shtyu një polic në detyrë. Ndërsa në shkurt të këtij viti, mbrojtësi u pezullua nga Paris Saint Germain, pas publikimit të një videoje, ku dukshëm në gjendje të dehur 23-vjeçari ofendonte ish-trajneri Blanc dhe shokët e skuadrës, mes të cilëve Zlatan Ibrahimoviç dhe Angel di Maria. Wenger “shokon” Barcelonën dhe City-n.
Trajneri Arsen Wenger, menaxheri i Arsenalit, ka zbuluar se Hector Bellerin shumë shpejt do ta vazhdojë kontratën me skuadrën londineze. Barcelona dhe Manchester City kanë marrë një lajm të keq nga Arsene Wenger. Ky i fundit ka zbuluar se Hector Bellerin shumë shpejt do ta vazhdojë kontratën me skuadrën londineze.
Mbrojtësi spanjoll ka kontratën me klubin londinez deri në verën e vitit 2019. Por, për ta evituar rrezikun nga Barça dhe City, Arsenali do ta blindojë Bellerin. “Unë jam i befasuar nga spekulimet – ai ka gati edhe tri vite kontratë. Ne do të mundohemi që ta vazhdojmë kontratën me lojtarin”, ka thënë Wenger për Bellerin.
“Por për mua, e ardhmja afatgjatë e Bellerin është këtu. Ai ka qenë fantastik. Ai ka forcë të lartë mendore. Ai do të jetë këtu dhe ka përgjegjësi në dhomat e zhveshjes”, ka theksuar Wenger.
