Pas transferimit te Terek Grozni dhe bashkimit me ekipin menjëherë pas angazhimit në Kampionatin Europian, Bekim Balaj ka siguruar vendin në formacionin titullar të ekipit të Premier League-s ruse. Sulmuesi kuqezi u aktivizua nga minuta e parë edhe në miqësoren e zhvilluar gjatë fazës përgatitore në Pinzolo të Italisë, përballë gjigantëve të Serisë A, Roma.
Verdhekuqtë me Dzeko, Salah e Perotti-n në sulm, zhbllokuan sfidën në të 41-ën, pikërisht pas tentativës së Perotti-t në kufi të zonës. Katër golat e tjerë të sfidës u shënuan në fraksionin e dytë të lojës, me Terek Groznin që barazoi përkohësisht shifrat në 1-1 me Grozav, por menjëherë më pas Dzeko shfrytëzoi asistin e kapitenit Francesco Totti duke rikthyer epërsinë.
Në një ndeshje të luftuar dhe ku niveli i lojës së skuadrave nuk ishte i madh, skuadra çeçene gjeti sërish barazimin me Grozav, pas ekzekutimit të një goditje standarde. Goli i fitores 3-2 për të besuarit e Luciano Spalleti-t u realizua nga Marchizza, që vetëm sa shtyu në rrjetë topin, pas shtyllës së goditur nga Ponce. Bekim Balaj qëndroi për 65 minuta në fushën e lojës, duke luftuar dhe ndihmuar skuadrën në fazën ofensive, ndërsa më pas i la vendin senegalezit Mbengue.
Me paraqitjet në miqësoret e luajtura dhe bazuar në idetë e trajnerit Rakhimov gjatë fazës përgatitore, sulmuesi i kombëtares duket se e ka prenotuar vendin e titullarit për ndeshjet e kampionatit rus, që do të nisin pas dy javësh.
