Ish kryeministri Berisha deklaroi dje në Parlament se beteja kundër të inkriminuarve në pushtet është betejë për jetë a vdekje. Ai denoncoi lidhjet e Ramës me baronin e drogës Klement Balili ndërsa ironizoi Ramën me emrin EdEskobar. Ai tha se shqiptarët duhet të çlirohen nga kjo organizatë kriminale ose në të kundërt citoi ai ardhmja e tyre është zero. Berisha shprehur bindjen se sado që është një situatë tmerrësisht e paprecedentë, qytetarët do të mund të shpëtojnë. “Kreu i meduzës u largua, nuk pati burrërinë të qëndronte dhe të dëgjonte përgjigjet e problemeve që ai shtroi, akuzave që ai bëri, por kësaj here unë e justifikoj largimin e tij. Ai e dinte që unë sot kisha një përshëndetje për të. Kisha një përshëndetje të sinqertë: Urime EdEskobar! Të mungonte ky titull o EdEskobar, por e fitove, tani për tani je EdEskobar për Ballkanin, por ju garantoj se shumë shpejt do ta ketë për mbarë Europën, për mbarë kontinentin, madje do të shohë dhe hapësira të tjera. Ky është shefi i kanabisit shqiptar apo i Shqipërisë kanabiste, shefi i qeverisë organizatë kriminale më të rrezikshme që ekziston në Europë dhe në botë. Unë e di se këtu ka prej jush, të cilët nuk e përtypin kaq lehtë këtë fjalë, por çdo ditë që kalon, nga dita që unë kam marrë hua nga Sarah Chayce e deri sot, numri shqiptarëve që ju shohin ju si organizatë kriminale rritet me qindra dhe me mijëra” u shpreh ish kryeministri Berisha. Duke denoncuar lidhjet kriminale të qeverisë me grupet kriminale Berisha tha: “A janë pra këta, të dashur qytetarë një organizatë e rrezikshme kriminale? A janë këta, që në pafytyrësi absolute dolën para gjithë botës se fshihnin krimin monstruoz të Arben Frrokut, që fshinin krimin monstruoz të Mark Frrokut. A janë këta që mbajnë vrasës? Do t’ju nxjerr vrasësit që mbani pas vetes një nga një, të cilët sado që janë vrasës, por janë burra dhjetë herë më të mirë se ju se nuk janë frikacakë si ju. U kanë gjetur ju njerëz pa karakter, njerëz pa fytyrë, që përdorni imunitete për të mbrojtur vrasës. Ju kanë gjetur ju, se ata vrimë miu nuk do të gjenin nëse s’i mbronit ju. Do ja u nxjerr këtu siç ja u kam nxjerrë. Durim të keni. Kjo është betejë për jetë a vdekje. O do çlirohen shqiptarët nga kjo organizatë kriminale ose e ardhmja e tyre është zero. Unë kam besim se do të çlirohen. Sado që është një situatë tmerrësisht e paprecedentë, unë kam besim të madh se do të çlirohen dhe se droga nuk do t’i mbysë këta qytetarë. Kanë jetuar nëpër diktatura dhe situata të vështira, por do e kapërcejnë dhe këtë intoksikacion nga kanabisi. Tani doli Eskobari i Ballkanit, Balili. Kush është Balili? Është Koço Kokëdhima. E gjithë Saranda flet. Balili është sivëlla Kokëdhima, por po qe Kokëdhima është sivëlla Rama pas, është pleqëruesi tjetër, është ai që i ka falur pleqërimin Kokëdhimës. Nuk kanë të ndarë, janë siamezë ata”.
Presioni ndaj gjyqtarëve, të nisë procedura për shkarkimin e Veliajt
Berisha dënoi ashpër dje sulmin e paprecedent dhe presonin e Erjon Veliajt ndaj Gjyqtarëve të Gjykatës Administrative ndërsa kërkoi nisjen e procedurës për shkarkimin e tij. “Një rrugaç që s’njeh normë e s’njeh ligj organizon për herë të parë në historinë e këtij shteti, një protestë shtetërore para Gjykatës Administrative. Asnjë parti politike nuk e ka bërë këtë pavarësisht se partitë politike gjatë këtyre 20 viteve janë përballur me vendime nga më të rëndat të gjykatave, por s’kanë marrë kurrë institucionin e tyre, s’kanë rrethuar kurrë gjykatës siç bëri dje një rrugaç kushtetues, që s’ka fytyrë, një njeri që martohet me paratë e qytetarëve shqiptarë, një njeri i cili i jep tenderat vëllait të vet dhe rrethon në mënyrë të neveritshme tri burra dhe gra që do të merrnin vendimin. Kjo është reforma juaj, ju jeni për këtë reformë. I bëj thirrje Grupit parlamentar të PD të nisë menjëherë procedurën për shkarkimin e këtij rrugaçi që rrethon gjykatat, e këtij eksponenti të shpërfytyruar nga çdo lloj norme dhe standardi. I bëj thirrje të kërkojnë me urgjencë shkarkimin e tij, ndërprerjen, duke iu referuar neneve përkatëse të Kushtetutës, ligjeve të këtij vendi, të cilat ndalojnë në mënyrë kategorike dhe e kanë shpallur si vepër penale presionin ndaj gjykatësit dhe ndaj gjykatave.
I bëj thirrje prokurorit të Përgjithshëm të ngrihet fuqishëm në mbrojtje të ligjeve dhe Kushtetutës dhe të vendosë këtë rrugaç kushtetues para ligjit, para Kushtetutës dhe t’i japë vendin e merituar. Kjo është drejtësia që duhet të bëjnë këta trafikantë, këta EdEskobarë. Kurrë nuk ka ndodhur ndonjëherë në historinë 24-vjeçare të pluralizmit shqiptar ai akt i shëmtuar që ndodhi dje. Ndodhi me një njeri që ka për standard vjedhjen e parave të të varfërve shqiptarë për dasmën luksoze, me dy raunde, rregullimin me tender publik të të gjithë mjedisit të dasmës, kalasë së Gjirokastrës dhe dasmës tjetër në Pezë. Po ky me këtë gjë ju turpëron juve në radhë të parë. Jam i bindur se, ndofta dhe shumica nga ju, nuk ndan të njëjtin mendim për rrethimin e gjykatave. Gjykatat në gjithë botën japin vendime dikur të drejta e diku jo, por gjykata nuk rrethohet. Nëse t’i përdor pushtetin e një qeverie, e një mazhorance, pushtetin e një bashkie kundër tri vetëve, ti agjëson gjykatën, ti kryen një krim të shëmtuar në themel të shtetit.
Po janë ligjvendësit, ata të cilët kanë pranuar me ligj dhe Kushtetutë të ndajnë pushtetin, t’i japin gjyqësinë një sektori që nuk votohet dhe kushtetutshmëria është shtyllë kryesore për atë që ka abc-në e demokracisë të paktën prej disa shekujsh. Ju vini këtu si mazhorancë që rrethoni gjykatat. Njëri që ka pesë pallate pa leje dhe ja u tregoj të gjitha këtu po të doni (Sadri Abazi) shkon në rrethimin e gjykatës për të shpëtuar pallatet e veta. A e dëgjuat mekanizmin e ri të vjedhjes dhe rrjepjes së rrugaçit kushtetues? Një javë para bëri njoftimin se “kompanitë të cilat kanë shkelur rregullat nuk do të mund të aplikojnë për leje ndërtimi”. Në pamje të parë njeriu mund të thotë se mirë po ja u bën se shkelës ligji janë. Po çfarë fshihet? Prapa kësaj absolutisht fshihet vetëm gjoba. Sot kompanitë që kanë thyer më shumë ligjin janë kompanitë tuaja. Ja u tregoj pallatet e atij aty (Sadri Abazit). Qytetarët kanë nevojë të dinë të vërtetën”.
Berisha sqaroi ndër të tjera: “Ato leje i ka dhënë Edvin Kristaq Rama. Unë kam qenë Kryeministër dhe Edvin Rama ka sjellë në KKRRT studimin e pjesshëm për ndërtimet në atë zonë. Unë, për shkak të kundërshtive të mëdha, përpiqesha të shmang kthimin mbrapsht të kërkesave të tij si kryetar bashkie dhe si kryetar i opozitës dhe unë në njëfarë mënyre vetëpërmbahesha. I kam miratuar propozimin e Ramës, cilido të shkojë të marrë vendimin dhe do të shohë se kam miratuar pallate 5-katëshe, ndërkohë që Rama i çoi në 17-katëshe, jo Berisha, por Rama i çoi në 17-katëshe. Por po e lëmë këtë. Aty është një proces gjyqësor dhe as Edi Rama, as Sali Berisha dhe askush nuk ka të drejtë të rrethojë gjykatën me një institucion shtetëror. Ju keni asgjësuar shtetin dje, por keni asgjësuar veten tuaj jo shtetin sepse shteti ju jeni, ju jeni shumica, ne jemi opozitë. Po a ka akt më të shëmtuar? Unë dhe nëpër filma nuk kam parë. Ky është turpi juaj. Parti që rrethon gjykatën për të marrë vendimet me forcë. Po turpi juaj, turp dhe një mijë herë turp”.
Arben Shahini
