Persona të panjohur kanë dhunuar dhe kërcënuar me jetë ish-të persekutuarën dhe anëtaren e kryesisë së Partisë Demokratike, Zamira Bushati, (Kazazi). Ngjarja ka ndodhur mbrëmjen e djeshme rreth orës 20:00 në rrugën “Siri Kodra”. Dy persona të panjohur i janë afruar dhe pasi e kanë sharë me fjalë të rënda e kanë qëlluar me grushta dhe e kanë shtrirë për tokë, duke e gjuajtur me shkelma. Më pas, ata e kanë kërcënuar me jetën e saj dhe të fëmijëve, duke i thënë mos guxo më të shashë kryeministrin. Zamira është ndihmuar nga disa persona, të cilët e kanë dërguar në shtëpinë e saj, pasi nuk ka pranuar të shkojë në spital dhe as në polici nga frika se mund t’i bënin ndonjë gjë.
Ngjarja ka ndodhur një javë, pasi Zamira kishte dhënë një intervistë në televizionion “Shijak TV”, ku kishte folur kundër qeverisë dhe kryeministrit Rama për gjendjen e rëndë në të cilën ndodhet vendi. Ky nuk është rasti i parë që dhunohen të zgjedhurit e PD. Këto raste dhune janë denoncuar nga opozita, por policia nuk ka marrë asnjë masë për kapejn e autorëve.
