Jose Mourinho premtoi se do ta rikthejë klubin e Manchester United në majat më të larta, ashtu siç bëri Alex Ferguson, ndërsa vetë skocezi e pranon se “Special One” është njeriu i duhur për të drejtuar ekipin edhe pse shton se Mourinho gaboi me rikthimin e tij te Chelsea dy sezone më parë. Me 38 trofe në 26 vite te “Djajtë e Kuq”, Ferguson mbetet një nga njerëzit më të suksesshëm, madje ai nuk i trembet aspak sfidës së portugezit.
“Mendoj se, Mourinho gaboi me rikthimin te Chelsea. Është shumë e vështirë kur kthehesh në një klub pas disa vitesh. Aftësia, karizma dhe personaliteti e kanë ndihmuar Mourinhon të arrijë suksese të rëndësishme në Europë me disa klube të ndryshme. Ai është një njeri rekordesh dhe këtë fakt nuk mund ta injorojmë. Mendoj se Manchester United është klubi i duhur për të dhe mendoj se do ta rikthejë sërish në nivele të larta”.
Ferguson u tërhoq nga pankina e Manchester United në vitin 2013 dhe aktualisht ai është ambasador i klubit. Ai ka gjithashtu një miqësi të vjetër me Mourinhon dhe e njeh mjaft mirë portugezin, i cili mbetet një nga emrat më të lakuar të futbollit botëror. Gjatë periudhës kur të dy ndesheshin në Premier League, asnjëherë nuk e kanë fshehur simpatinë për njëri-tjetrin edhe pse Ferguson preferoi që me largimin nga “Old Trafford” ta pasonte David Moyes dhe Jose Mourinho, i cili nuk e kishte fshehur asnjëherë dëshirën për të drejtuar “Djajtë e Kuq”.
