Diplomati i parë amerikan që hapi dyert e ambasadës amerikane në Tiranë pas gjysmë shekulli të ndërprerjes së marrëdhënieve diplomatike deklaroi dje gjatë një takimi me Kryetarin e opozitës, Basha se problemi i kriminalizimit në nivelet më të larta të strukturave shtetërore ka ndikuar negativisht në imazhin për Shqipërinë.
Diplomati amerikan me një eksperiencë të gjatë politike shkoi edhe më tej kur deklaroi se do të jetë e pamundur për një vend që të anëtarësohet në Bashkimin Europian, kur nuk ka një Parlament dhe administratë të pastër. “Kriminalizimi ka ndikuar negativisht në imazhin e Shqipërisë dhe është e pamundur që një vend të kërkojë të bëhet pjesë e Bashkimit Europian, kur nuk ka një administratë dhe Parlament të pastër”, tha Hill.
Kryetari i Partisë Demokratike, Lulzim Basha priti dje në një takim ambasadorin Christopher R. Hill. Ambasadori Hill ishte diplomati i parë amerikan rezident në vendin tonë pas rrëzimit të regjimit komunist. Basha shprehu mirënjohjen e madhe për ndihmën e jashtëzakonshme që ai dhe SHBA kanë dhënë për Shqipërinë në momente të rëndësishme të historisë së saj, siç ishin vitet ‘90 kur Shqipëria la pas të shkuarën komuniste dhe iu bashkua vendeve demokratike të botës.
Ambasadori Hill ka vlerësuar ndryshimet që kanë ndodhur në Shqipëri duke shprehur krenarinë që SHBA kanë qenë bashkudhëtare e Shqipërisë në këtë transformim të madh. Shqipëria, tha Hill, i ka patur objektivat e qarta, anëtarësimin në NATO dhe në BE, ndërsa shprehu kënaqësinë që Partia Demokratike ndonëse në opozitë nuk resht së punuari për anëtarësimin e vendit në Bashkimin Europian.
Kryetari i Partisë Demokratike, Lulzim Basha theksoi se pavarësia e Kosovës, anëtarësimi në NATO dhe shumë arritje të tjera të Shqipërisë do të ishin të pamundura pa ndihmën e jashtëzakonshme të SHBA.
Një vend të veçantë në takim zuri situata politike në vend, krimi, korrupsioni dhe zgjedhjet.
Lideri i opozitës shprehu shqetësimin e rritjes dhe kultivimit të drogës, e cila është shtrirë në të gjithë vendin. Kjo është pasojë direkte e kriminalizimit të politikës dhe administratës.
Edi Rama promovoi në poste kyçe në administratë dhe futi në Kuvendin e Shqipërisë persona të dënuar për trafik droge, të cilëve edhe sot vazhdon t’u japë mbrojtje duke sfiduar haptas ligjin e dekriminalizimit, i cili u mundësua me mbështetjen e madhe të SHBA.
Duke u ndalur tek zgjedhjet e përgjithshme parlamentare kryetari i Partisë Demokratike, Lulzim Basha theksoi se ato janë të kërcënuara nga droga, krimi dhe paratë e korrupsionit, gjë që është faktuar edhe në zgjedhjet e fundit. Zoti Basha theksoi se ndonëse që në muajin maj Partia Demokratike ka propozuar ndryshime në Kodin Zgjedhor për të garantuar lirinë e votës, deri tani mazhoranca ka heshtur.
Reforma, theksoi zoti Basha, u vonua qëllimisht, për të pamundësuar votimin elektronik, i cili do t’i priste rrugën shitblerjes së votës. Shumë të rëndësishme e konsideroi kryetari i Partisë Demokratike çështjen e financimit të partive, ku PD ka propozuar kriminalizimin e donacioneve private dhe financimit 100% nga buxheti i shtetit, si dhe auditimin e plotë e të besueshëm të financimit dhe shpenzimeve të partive politike.
Shqipëria ndodhet në një udhëkryq të rrezikshëm për demokracinë dhe shtetin ligjor, theksoi zoti Basha.
Ambasadori Christopher R. Hill duke vlerësuar lidershipin e zotit Basha dhe rolin e Partisë Demokratike në mbrojtjen e vlerave të lirisë dhe demokracisë, theksoi se PD me zotin Basha në krye ka sjellë një mënyrë tjetër të të bërit politikë, e cila do ta shtyjë vendin përpara.
