4 mijë kilometra për të ndjekur nga afër kombëtaren shqiptare në Francë. Kjo është historia e pabesueshme e një të riu shqiptar, i cili vuan nga një sëmundje e rrallë që e ka detyruar të ulet në një karrige me rrota. Kualifikimi i Shqipërisë në Europian i ndryshoi jetën 25-vjeçarit Dritan Doda, i cili jeton në Itali që prej vitit 1998. Pasioni i tij për fanellën kuqezi dhe futbollin e detyroi familjen t’i bënte një surprizë për të ndjekur nga afër dy ndeshjet e para të Shqipërisë në Lyon dhe Marseille. 4 mijë kilometra me një rulotë edhe pse në gjendje të rënduar shëndetësore për djalin, pasioni i të cilit për futbollin nuk ka kufi, ndërsa zemrën e tij vazhdon ta mbajë në jetë dashuria për kombëtaren.
Një histori dashurie që i bashkon të gjithë shqiptarët rreth një qëllimi, sepse vetëm futbolli dhe kombëtarja kuqezi mund të injektojnë grimca gëzimi edhe në jetën e vështirë të një të riu që vuan prej vitesh nga sëmundja e rëndë. Dritani golin e tij tashmë e ka shënuar, ndërsa kombëtarja shqiptare Europianin e ka fituar. 25-vjeçari është tifozi numër 1 i Shqipërisë në shkallët e stadiumit, ndërsa djemtë kuqezi i dhuruan emocionet më të pabesueshme të jetës së tij.
