Zëdhënësja për shtyp e PD, Mirela Karabina, ishte e ftuar në emisionin “Epiqendër” në Ora News me gazetaren Sonila Musain mbi Maturën Shtetërore, problematikat me provimin e parë të gjuhës së huaj dhe Programin e PD-së.
Sipas Karabinës, Matura Shtetërore ka ardhur koha që të ndalet, pasi nuk ka më asnjë funksion përveç stresit për maturantët dhe familjarët e tyre
“Matura Shtetërore është jashtë vëmendjes duke e lënë në rrjedhë të lirë, dhe kjo në dëm të maturantëve dhe në dëm të shoqërisë. Keqadministrimi, kopjimi masiv në vite, teza që del sapo fillon provimi, teste me probleme në konceptim kanë konpromentuar procesin duke i dhënë maturantëve modelin e gabuar të Provimeve të Shtetit.
Matura Shtetërorë ka tashmë 18 vjet dhe për cdo vit dëshmon se ka ardhë koha që të ndalet pasi nuk ka më funksion, përvecse stres për maturantët dhe familjet e tyre.” – u shpreh ajo.
Njëkohësisht ish-ministrja e Arsimit, Mirela Karabina, tha se “pabarazia në arsimim është reflekturar në pabarazi dhe fiktivitet në vlerësim duke i vënë maturantët në pozita të pabarabarta, duke i ndryshuar preferencën e tyre për studime të mëtejshme”.
Ajo u ndal edhe te programi i PD për arsimin, ku “dyfishimi i buxhetit të arsimit nga 2.4% ne 5 % të PBB do të hapë mundësinë për rritje të cilësisë së arsimimit përmes stafeve të kualifikuara, mjeteve mësimore dhe infrastrukturës digjitale”.
“Programi i Partisë Demokratike për arsimin “Mendje e shëndoshë, trup i shëndoshë” është një program për transformim tërësor për të ndryshuar gjendjen e rëndë që ka kapluar arsimin.
Dyfishimi i buxhetit të arsimit nga 2.4% ne 5 % të PBB do të hapë mundësinë për rritje të cilësisë së arsimimit përmes stafeve të kualifikuara, mjeteve mësimore dhe infrastrukturës digjitale.
Shkollë gjatë gjithë ditës është projekti i PD-së ku shkolla përgjatë orarit 08.00-16.00 do të ofrojë jo vetëm mundësinë e përvetësimit të kurrikulës bazë për një pjesë të ditës, por dhe aftësim dhe zhvillim të prirjeve të nxënësve përmes klasave të tekonolgjisë, gjuhës së huaj, klasave të artit dhe sporteve e të tjera.
Decentralizim të procesit të Maturës shtetërore duke e kthyer atë në shkollë.
Mësimi dual në arsimin e mesëm profesional 50% në klasë njohuri akademike dhe 50% në praktikë duke praktikuar njohuritë do të mundësojë mirëformim profesional të nxënësve për tregun e punës.
Trajnim/praktike punë e paguar 1 vjeçare për 10 mijë te rinj pas shkollës së mesme, si urë lidhëse mes shkollës dhe tregut të punës me qëllim mbështetjen dhe aftësimin profesional të të rinjve në këtë fushë.
Problemet ne testin e Maturës janë pasoja. Partia Demokratike me programin e saj merret me shkakun e problemit dhe ofron zgjidhje.” – u shpreh Karabina, duke përmendur pjesë të programit të PD për arsimin.
