Vendi i parë ndaj vendit të fundit në klasifikim duhej të ishte një ndeshje pa shumë histori, por Bastia ja doli të frenojë Monaco duke treguar se ndonjëherë diferencat në fushë mund të zvogëlohen. Në Korsikë kryesuesit e Ligue 1 barazuan 1-1 pas një 90 minutëshi që dhe mund ta kishin humbur, pasi vendasit në pjesën e parë kryesonin 1-0. Monaco në fazën e parë, kishte fituar lehtësisht 5-0 ndaj Bastias, por skuadra nga Korsika këtë herë e vendosi shumë në vështirësi formacionin e Jardimit, duke kaluar madje në epërsi në minutën e 19-të me Diallo.
Epërsinë vendasit e ruajtën deri në të 52-tën, kur Bernardo Silva mundi të shënojë golin e barazimit 1-1 pas një asisti të Toure.
Nga ky moment, skuadra e principatës dominoi në lojë dhe raste, por pa mundur dot megjithatë të shënojë golin e fitores, duke lënë dy pikë shumë të rëndësishme për titullin, ndërsa Bastia mori një pikë që nuk e kishte menduar ndaj së parës në renditje.
