Shkrimtari italian, Roberto Saviano ka sot në lidhje me marrëveshjen e firmosur nga kryeministri Edi Rama dhe homologia e tij Giorgia Meloni, përmes një videoje në FaceBook. I njohur si një nga kundërshtarët më me zë të qasjes së kryeministres italiane, shkrimtari ka treguar disa nga “rreziqet” e kësaj marrëveshjeje.
Sipas tij protokolli mes Italisë dhe Shqipërisë për emigrantët nuk është vetëm një propagandë e pastër politike, por do të rezultojë e padobishme në nivel organizativ dhe menaxherial. Saviano, në një video për Fanpage.it, shpjegon gjithashtu dhe se rrethanat e marrëveshjes mund të përfshijnë krimin e organizuar (mafian shqiptare) në marrjen në dorë të menaxhimit të refugjatëve në kampet e Shëngjinit.
“Për momentin është vetëm një njoftim, ai i sjelljes së rreth 36 mijë emigrantëve në dy qendra paraburgimi në Shqipëri . Një i ndërtuar për menaxhimin e procedurave kufitare, pra identifikimin, origjinën, vizitat mjekësore. Një tjetër për të ndaluar emigrantët në pritje të riatdhesimit. Por si të gjitha gjërat e tjera që ka bërë kjo qeveri, është thjesht një reklamë elektorale. E shtrenjtë, megjithatë, dhe e paguar nga taksapaguesit. Për këtë Shqipërisë do t’i jepet një shumë, vetëm paraprakisht, prej 16 milionë eurosh. Para së gjithash, duke qenë një marrëveshje ndërkombëtare, ajo duhet të kalojë në Parlament. Por qeveria deklaron se, bazuar në Traktatin e Miqësisë ndërmjet Republikës Italiane dhe Republikës së Shqipërisë të vitit 1995, ajo nuk do të jetë e nevojshme. KJo një marrëveshje ndërkombëtare e këtij lloji kërkon gjithmonë mbikëqyrje parlamentare. Kjo marrëveshje është krejtësisht e palogjikshme, e bërë me nxitim dhe në mënyrë amatore.”- ka thënë Saviano.
Gjatë përfundimit të videos, ai shpjegon dhe shkaqet që të çojnë të mendosh se marrëveshja do të përfshijë mafian shqipatare e cila sipas tij do të marrë në menaxhim situatën që do të lidhet me kampin e refugjatëve.
“Dhe në fund, çfarë do të ndodhë në Shqipëri kur të nisë ky projekt? Kush mendoni se do të menaxhojë ardhjen, prokurimin, mensat, në disa raste edhe arratisjet nga këto qendra? Familjet mafioze shqiptare. Rreziku që krimi i organizuar shqiptar të marrë pjesë në këtë operacion është shumë i lartë. Pa kontroll të drejtpërdrejtë, siç dihet, kujt do t’i shkojë financimi italian? E pamë me Turqinë, me Tunizinë, me Libinë. Transferimi i kontrollit të kufijve tuaj nuk çon aspak në siguri më të madhe, nuk çon aspak në një kapacitet më të madh menaxhues, ai sjell vetëm tmerrin e padrejtësisë, torturës, korrupsionit.
Ne po lëvizim fizikisht kufijtë tanë në një vend tjetër: nga ana operacionale e gjithë kjo nuk do të përkthehet në një efektivitet më të madh në mbrojtjen e këtyre kufijve, por do të thotë shitje e tyre. Duke larë duart prej tij, duke u përpjekur të detyroni të tjerët të bëjnë punën e pistë. Nga njëra anë, emigrantët do të paguajnë për të gjitha këto. Nga ana tjetër qytetarët, të cilët mashtrohen dhe grabiten. Burimet ekonomike do t’u hiqen për t’u investuar në qendrat e paraburgimit në Shqipëri. E cila, megjithatë, nuk do të jetë e dobishme.”-përfundoi Saviano.
