Nga Mirela Karabina
Një tjetër vlerësim ndërkombëtar, Banka Botërore 2024, rrëzon propagandën e Ramës për Arsimin e lartë: cilësi e dobët, kurrikula të vjetra dhe larg tregut të punës, kështu është Arsimi i Lartë në Shqipëri cilësuar në raportin e BB.
Një situatë alarmante e paralajmëruar ndër vite, e sot qeveria po na thotë që do ndërmarrë reforma për “zgjidhje”.
Vetëm propagandë dhe dështim fatal për vendin!
Nga një anë vlerësimi i ulët “PISA 2022” për nxënësit 15 vjeҫarë dhe tani BB për Arsimin e Lartë.
Arsimi është në emergjencë kombëtare!
“Një skemë e re shërbimesh dhe finacimesh”, do ta propagandonte Rama më 2014-ën Reformën në Arsimin e Lartë duke e konkretizuar me Ligjin 80/2015 i cili u kundërshtua nga stafet akademike asokohe, por ҫdo mendin kundër u shpërfill me arrogancë.
Protestuan studentët më 2018-ën, thërritën, kërkuan arsimin cilësor e kushte normale, por qeveria i mashtroi përseri, i riktheu në auditor dhe sot ja ku jemi, edhe më rëndë.
10 vite reformë e dështuar në Arsimin e lartë, me pasoja afatgjata, të rinj të larguar për arsimim të mirë jashtë vendit, të rinj jo mirë të formuar që nuk i përgjigjen nevojave të tregut.
Edi Rama premtoi financimin në arsim në nivelin 5% të PBB që më 2013-ën, por nuk arriti dot ta ngreje nivelin e financimit as sa Kosova e Maqedonia, duke rrënuar universitetet në emër të reformës me rënie të numrit të studentëve pasi largohen jashtë vendit, mbyllje programesh apo shpikje programesh për të mbijetuar. Ndërsa për kërkimin shkencor nuk flasim fare, interesi zero dhe financimi i papërfillshëm. Pagesa për një student planifikuar në buxhet është e ulët, 500-600 euro, krahasur me 18 -20 mijë për student në vendet e OECD-së, diferencë e madhe që dëshmon ndryshimin e madh.
Nënfinacimi për arsimin për 2025-ën nuk premton përmirësim, nuk është as sa gjysma që pat premtuar Rama 10 vite më parë, është 2,36% e PBB.
Financim në arsimim do të thotë pedagogë të mirëinformuar e të kualifikuar, infrastrukturë që i përgjigjet nevojave të studentëve, praktika profesionale e shërbime përmes lidhjes së universiteteve me institucione e kompani prodhuese, trajnime për studentët e orientim me tregun e punës, programe prioritare dhe investimi për to.
Dhe kjo arrihet me vullnet politik përmes një buxheti, të paktën në nivelin 5% të PBB.
Dëmi është i madh në Arsimin e Lartë i cili duhet të jetë promotor i zhvillimit, por ka përgjegjës, i pari është Edi Rama i cili duhet të shpjegojë dështimin e Refomës, dhe më pas ministret e tij në këto 10 vite: Lindita Nikolla, Besa Shahini, Evis Kushi, Ogerta Manastirli. Ministre këto që i mbajtën ison kryeministrit duke gënjyer për suksese imagjinare dhe lanë Arsimin e Lartë në këtë gjendje.
Dhe sot, krahas vlerësimit nga profesionistët tanë edhe Banka Botërore ia vuri vulën e dështimit “reformave” propagandistike të Edi Ramës në Arsimin e Lartë.
