Në një intervistë për A2 CNN me gazetaren Denisa Pasholli, Mirela Karabina lëshoi akuza të forta ndaj kryeministrit Edi Rama dhe Sali Berishës, duke e cilësuar 11 majin si një datë ku pushteti u blindua përmes mekanizmave të krimit, parasë dhe pazareve politike.
Karabina theksoi se qytetarët janë lënë në mëshirë të fatit, ndërsa demokratët janë ndjerë të tradhëtuar. Sipas saj, pritshmëritë e qytetarëve për një ndryshim janë shuar për shkak të marrëveshjeve të prapaskenës mes PS dhe PD.
Ajo solli në vëmendje 9 shtatorin e vitit 2021, kur sipas saj Lulzim Basha kishte orientuar demokratët drejt një të ardhmeje ndryshe. “Nëse ajo rrugë do ishte ndjekur deri në fund, sot do kishim një PD fituese dhe një Edi Rama të rrënuar,” u shpreh Karabina.
Sipas saj, marrëveshjet mes dy partive të mëdha janë një pazar i turpshëm që zhvillohet në kurriz të qytetarëve shqiptarë.
Mes të tjerash, Karabina u shpreh:
“Edi Rama me pushtet të blinduar në 11 maj, përmes fuqisë së pushtetit, krimit, parasë por dhe pazareve me PD. Sot demokratët janë të tradhëtuar dhe qytetarët të braktisur, sepse ata pritën të ktheheshin në pushtet dhe qytetarët të fitonin. Nëse demokratët do të kishin qëndruar siç e nisën në 9 shtator 2021 ku Lulzim Basha i drejtoi drejt së ardhmes, sot PD do ishte fituese dhe Edi Rama i dështuar dhe i rrënuar. Por pazari PS-PD është pazari i turpshëm në kurriz të qytetarëve.”
