Duket se ish-ambasadores amerikane në OKB, Nikki Haley po i mbarojnë opsionet, pas fitores së Donald Trump në New Hampshire të martën mbrëma dhe fuqisë së tij në shtetet e mbetura. Haley do të duhet të përballet me realitetin që zyrtarët e lartë republikanë duan gjithnjë e më shumë që gara të përfundojë sa më herët. Dhe kjo më pas do të ishte hapja e rrugës edhe për një gjë tjetër: zgjedhjen e një kandidati për të garuar për zëvendës-president.
Në këtë drejtim thuhet se ka gjithashtu një presion të ri që 77-vjeçari të bëjë zgjedhjen e tij, në mënyrë që republikanët të mund ta kthejnë fokusin e tyre drejt zgjedhjeve të përgjithshme. Më poshtë hedhim një vështrim rreth emrave që duhen parë ndërsa ish-presidenti amerikan vazhdon përpjekjet për t’u rikthyer në Shtëpinë e Bardhë:
Ish-ambasadorja në OKB, Nikki Haley
Haley, e cila ka lënë të kuptohet se fushata e saj do të vazhdojë, ka thënë vazhdimisht se nuk është e interesuar të jetë zëvendëspresidente e askujt.
Senatori Tim Scott i Karolinës së Jugut
Senatori 58-vjeçar me tri mandate “miratoi” kandidaturën e Trump pak para zgjedhjeve paraprake në New Hampshire.
Guvernatori Ron DeSantis i Floridës
Trump dhe aleatët e tij kaluan më shumë se një vit duke sulmuar pamëshirshëm DeSantis.
Sen. JD Vance i Ohios
Pavarësisht se u zgjodh në Senatin e SHBA-së vitin e kaluar, Vance është paraqitur në mënyrë të përsëritur si një kandidat potencial për zëvendëspresident.
Dhe ai nuk thotë jo.
Marjorie Taylor Greene e Georgias
“Është folur shpesh dhe e di që emri im është në listë”, tha Greene për The Guardian në gusht. “Por me të vërtetë fokusi im më i madh tani është t’i shërbej distriktit që më zgjodhi”.
Por ka pak dyshim se një pjesë e bazës së Trump do të ishte e kënaqur me një përzgjedhje të tillë, nëse ai do të vendoste të shkonte në këtë drejtim.
Elise Stefanik e New Yorkut
Kryetarja e Konferencës së Republikanëve të Dhomës së Përfaqësuesve, Elise Stefanik është zyrtarja e rangut më të lartë që shihet si një zgjedhje e mundshme e Trumpit.
Kongresmenja e New Yorkut, e cila u ngjit në pozicionin e saj drejtues pas përmbysjes së Liz Cheney, ka pësuar dukshëm një ndryshim të mprehtë kur bëhet fjalë për Trumpin.
Kandidatja për guvernatore e Arizonës, Kari Lake
Lake, një ish-gazetare, përkushtimi i së cilët ndaj Trump është i pashembullt në mesin e republikanëve, po kandidon teknikisht për një tjetër punë tani: senatore e Senatit të SHBA-së për Arizona që aktualisht mbahet nga senatori, Kyrsten Sinema.
Guvernatorja e Dakotës së Jugut, Kristi Noem
Guvernatorja e Dakotës së Jugut, ndoshta më e njohur në nivel kombëtar për shkeljen e kufizimeve të vendosura për shkak të COVID-19 gjatë pandemisë, është ndoshta zgjedhja më e mundshme për zëvendësin e Trumpit.
“Unë mendoj se kujtdo në këtë vend, nëse do t’i ofrohet, duhet ta konsiderojë atë”, tha ajo në CBS në fillim të këtij muaji.
Guvernatori i Virginias, Glenn Youngkin
Youngkin, 57, ndryshe nga guvernatorët e tjerë në këtë listë, ka treguar se mund të fitojë një shtet konkurrues.
Guvernatorja Sarah Huckabee Sanders e Arkansas
Askush në këtë listë nuk e njeh Trump si Sanders – pasi ishte sekretarja e tij e dytë e shtypit në Shtëpinë e Bardhë. Dhe si guvernatore e Arkansas, ajo ka ndjekur një sërë politikash konservatore.
Guvernatorja Kim Reynolds e Iowa-s
Trump u përplas në mënyrë të përsëritur me Reynolds në ditët e fundit para fitores historike në Iowa. Trump ka sugjeruar gjithashtu që Prokurorja e Përgjithshme e shtetit Brenna Bird duhet të drejtojë Iowa-n një ditë në të ardhmen.
Biznesmeni Vivek Ramaswamy
Ashtu si disa kandidatë të tjerë në këtë listë, Ramaswamy nuk ka gjasa të zgjidhet si zëvendëspresidenti i ardhshëm i Trump. Por kjo nuk do të thotë se nuk ka njerëz që do të donin ta shihnin atë në atë vend.
