Presidenti i Republikës, Bujar Nishani, filloi dje një vizitë dyditore në Republikën e Kroacisë, ku u prit me nderimet dhe ceremonitë e rastit nga Presidentja kroate, Kolinda Grabar-Kitaroviç si dhe krerët e tjerë të lartë të shtetit kroat. Pas ceremonisë së mirëseardhjes, Presidenti Nishani dhe Presidentja kroate, Grabar-Kitaroviç zhvilluan një takim kokë më kokë dhe më pas, kryesuan takimet zyrtare mes delegacioneve të të dy vendeve, ku u diskutua mbi forcimin e mëtejshëm të miqësisë dhe bashkëpunimit dypalësh, si dhe për axhendën rajonale dhe bashkëpunimin ndërkombëtar. Presidenti Nishani shprehu gjithashtu mirënjohjen për mbështetjen që Kroacia dhe Presidentja Grabar-Kitaroviç personalisht i kanë dhënë procesit të integrimit evropian të Shqipërisë, duke shprehur besimin se kjo mbështetje do të vijojë edhe për hapjen e negociatave të aderimit dhe zhvillimin e tyre. Presidenti Nishani e konsideroi përvojën kroate, si një shembull të vyer për Shqipërinë dhe theksoi se: “Ne e konsiderojmë Kroacinë si vendin që mund të përcjellë shpirtin, zërin dhe problematikat e rajonit në Bashkimin Evropian”, si dhe e siguroi Presidenten kroate për përkushtimin e Shqipërisë në rrugën e integrimit në BE. “Për ne shqiptarët, integrimi në Bashkimin Evropian është dhe mbetet alternativa e vetme për stabilitet dhe zhvillim të qëndrueshëm”, u shpreh Nishani. Gjatë takimit një vëmendje e veçantë iu kushtua bashkëpunimit ekonomik e tregtar mes dy vendeve, ku Presidenti Nishani theksoi nevojën e nxitjes dhe promovimit të mëtejshëm të këtij bashkëpunimi në mënyrë që edhe bashkëpunimi ekonomik të afrohet dhe të jetë në harmoni me nivelin e shkëlqyer të bashkëpunimit politik. Në mbështetje të këtij qëndrimi Presidenti i Republikës evidentoi dhe prezencën e një përfaqësie biznesi shqiptar në delegacionin e tij, si dhe zhvillimin e forumit të përbashkët ekonomik Kroaci-Shqipëri, që pritet të mbahet në ditën e dytë të vizitës zyrtare në Zagreb. Duke u ndalur në bashkëpunimin rajonal, të dy presidentët evidentuan qasjen euroatlantike dhe angazhimin për paqen dhe stabilitetin në rajonin e Evropës Juglindore. Presidenti i Republikës vlerësoi rolin e Kroacisë në rajon dhe e siguroi mikpritësen kroate se Shqipëria është tërësisht e dedikuar për përmirësimin e frymës së bashkëpunimit dhe mirëkuptimit rajonal. Presidenti përshëndeti rolin e Kroacisë dhe të Presidentes Grabar-Kitaroviç veçanërisht në Procesin e Brdo-Brijunit, duke e konsideruar atë një platformë shumë të rëndësishëm për krijimin e një fryme miqësore e bashkëpunuese mes të gjithë liderëve të rajonit. Të dy bashkëbiseduesit u ndalën edhe në çështje me karakter ndërkombëtar, si dhe angazhimet e të dy vendeve në luftën kundër terrorizmit dhe krimit të organizuar, si dhe për çështjen e refugjatëve nga zonat në konflikt. Të dy presidentët u shprehën në favor të një zgjidhjeje evropiane të çështjes së refugjatëve, duke garantuar kontributin e secilit vend në këtë zgjidhje. Pas ceremonisë zyrtare dhe takimit mes dy delegacioneve, Presidenti i Republikës, Bujar Nishani vendosi dhe një kurorë me lule, me një dedikim të posaçëm për të rënët kroatë në luftë, tek Memoriali “Zëri i viktimave kroate – Muri i Dhembjeve”, në Varrezat Mirogoj të qytetit. Presidenti, Bujar Nishani, në kuadrin e vizitës zyrtare dyditore në Republikën e Kroacisë u takua sot edhe me Kryeministrin kroat Tihomir Orešković, me të cilin bisedoi mbi mundësitë e forcimit të mëtejshëm të bashkëpunimit mes dy vendeve, si në nivel dypalësh, ashtu edhe në nivel rajonal e ndërkombëtar. Kreu i Shtetit shprehu mirënjohjen për mbështetjen e Kroacisë gjatë procesit të integrimit evropian, si dhe besimin se kjo mbështetje do të vijojë edhe për hapjen e negociatave të aderimit, si dhe vijimin e procesit të tyre. Gjithashtu, Presidenti Nishani e siguroi Kryeministrin e Kroacisë se Shqipëria është e përkushtuar në rrugën e integrimit evropian, pasi e konsideron të vetmen alternativë për stabilitetin dhe zhvillimin e saj të qëndrueshëm. “Eksperienca e Kroacisë është një shembull i vyer për Shqipërinë dhe ne dëshirojmë të mësojmë sa më shumë nga kjo eksperiencë dhe përballur sfidën e procesit të negocimit dhe aderimit në Bashkimin Evropian.” – u shpreh Kreu i Shtetit. Presidenti Nishani, gjatë ditës së parë të vizitës zyrtare në Republikën e Kroacisë pati një drekë pune dhe me Kryetarin e Parlamentit të Kroacisë, zotin Željko Reiner, me të cilin bisedoi për shumë çështje me karakter dypalësh dhe rajonal.
