Një ditë pasi kryeministri Rama i quajtur shushunja investitorët e energjisë së rinovueshme, kanë reaguar ashpër shoqatat e energjisë si dhe institucionet që mbrojnë interesat e investitorëve italianë.

Në një deklaratë zyrtare, Shoqata Shqiptare e Energjisë së Rinovueshme (AREA), Shoqata e Investiorëve të Huaj në Shqipëri (FIAA), Confindustria Albania dhe Dhoma Italiane e Tregtisë (CCIA) shprehin indinjatën e thellë për deklaratën publike të kryeministrit të Shqipërisë, z. Edi Rama kundër prodhuesve të energjisë së rinovueshme, të cilët deri tani i kanë dhënë sistemit energjitik shqiptar plot 511 Mega fuqi të instaluar.

Ne jemi të tronditur se si prodhuesit e energjisë së rinovueshme, që kanë investuar deri tani mbi 630 milionë euro dhe kanë ndihmuar vendin me energjinë e prodhuar prej tyre, si dhe kanë hapur me mijëra vende punë në nivele të ndryshme, konsiderohen nga kreu i qeverisë, si “shushunja që thithin gjakun e organizmit të vendit, duke lënë shpeshherë toka të tëra pa burimin e nevojshëm ujor”.

Kjo deklaratë kundër investitorëve shqiptarë e të huaj, të ftuar për të investuar në Shqipëri, është dezinformuese, e pabazuar dhe dashakeqe. Përkundër kësaj deklarate, ne ndjejmë të nevojshme të theksojmë se HEC-et e vegjël i kanë dhënë gjak dhe do të vazhdojnë t’i japin ekonomisë shqiptare.

HEC-et e vegjël janë teknologjia më efikase dhe më e qëndrueshme si nga ana mjedisore dhe ashtu edhe përsa i përket eficencës së prodhimit të energjisë, e pranuar nga të gjithë ekspertët ndërkombëtarë të fushës.

Asnjë studim i deritanishëm, i bërë apo porositur nga qeveria, apo nga ekspertë të pavarur, nuk tregon se HEC-et e vegjël kanë sjellë thatësirë të tokave ku ato operojnë.

Sulmi i drejpërdrejtë i kryeministrit të Shqipërisë ndaj investimeve të bëra me kerkesë të qeverisë shqiptare dhe të mbështetura në studime shkencore, është në vazhdën e goditjeve të vazhdueshme që qeveria e drejtuar nga z. Edi Rama po u bën këtyre investimeve në mënyrë të padrejtë dhe antiligjore, për qëllime që nuk kanë të bëjnë aspak me përmirësimin e sistemit energjitik.

Deklarata të tilla publike janë jo vetëm të dëmshme për investitorët, por edhe për të ardhmen e ekonomisë së vendit.

HEC-et e vegjël janë një aset për sistemin energjitik shqiptar. Në pak vite ato do të prodhojnë energji me thuajse me kosto zero për konsumatorët dhe biznesin, pasi do të kthehen në pasuri të vetë shtetit me përfundimin e kontratave koncesionare.

Ne dëshirojmë të nënvizojmë se, energjia e prodhuar nga HEC-et e vegjël ka ulur në mënyrë të ndjeshme importin nga kompani të huaja të vendeve fqinje, duke u paguar edhe me një çmim më të ulët se importi, duke dhënë kështu një impakt direkt pozitiv në rritjen e ekonomisë dhe në vetë sistemin energjitik shqiptar, i cili, për fat të keq, po i faturon te prodhuesit e vegjël të energjisë dhe te konsumatorët, kostot e keqmenaxhimit nga shteti.

Shoqata Shqiptare e Energjisë së Rinovueshme (AREA), Shoqata e Investiorëve të Huaj në Shqipëri (FIAA), Confindustria Albania dhe Dhoma Italiane e Tregtisë (CCIA) pyesin sot kryeministrin e Shqipërisë të thotë po kaq publikisht se kujt i shërben ky sulm i paprecendent ndaj prodhimit 100 % shqiptar të energjisë elektrike?, përfundon deklarata.

 Deklarata e Ramës

Duke prezantuar projektin per HEC e Skavicës, kryeministri Rama tha se me të i jepet fund keqtrajtimit ekstrem të rezervave të energjisë së pastër në Shqipëri, si rezultat i një ecjeje në mënyrë të improvizuar dhe i copëzimit shpesh herë shumë dëmtues të këtij potenciali me ato HEC-et e vogla që në shumë raste kanë funksionuar si shushunja që thithin pikërisht gjakun e organizmit të vendit duke lënë shpesh herë toka të tëra pa burimin e nevojshëm ujor, duke lënë shpesh herë komunitete pa mundësinë për të punuar tokën si rezultat i tharjes së burimit, duke bërë dëme të mëdha edhe nga pikëpamja e ekosistemit.

Kryeministri Rama ka prezantuar dje projektin e hidrocentralit të Skavicës, i cili do të ndërtohet nga vetë shteti. Fuqia e instaluar e tij do të jetë 210 MW./Monitor/

Ekspertët e Ramës po japin shifra sureale me të infektuarit nga Covid-19. Dje dhe pardje këta “ekspertë” deklaruan se kishte 20 dhe 21 raste të prekurish me Covid, ndërsa sot e ulën shifrën në 13.

Mesa duket këta ekspertë po bëjnë lojën e Ramës pëer të mbajtur popullin nën terror psikologjik dhe në izolim.

Mjeku i njohur, Gëzim Xhepa shkruan në një postim në faqen e tij sociale se, presioni propagandistik dhe mediatik i këtyre ditëve për justifikimin e strategjisë totalisht të gabuar në izolimin e tejzgjatur, për së paku gjashtë javë thuajse pa praninë e sëmundjes dhe viktimave nga COVID-19…, po ndjell vetëm panik, stres dhe ankth për kalimin e jetës në normalitet…!!!

Mjekë të njohur dhe ekspertë të fushës së shëndetësisë kanë deklaruar se pandemia tashmë është pothuajse e zhdukur, ndërsa ekspertët e Ramës vijojnë të mashtrojnë.

Ja njoftimi i ministrisë së Shëndetësisë

Ju informojmë rreth situatës së COVID 19 në Shqipëri, në 24 orët e fundit. Kanë vijuar testimet në Laboratorin e Virologjisë në ISHP për të dyshuar të prekur me Covid19, dhe vazhdon puna intensive e epidemiologëve në terren për gjurmimin aktiv të rasteve.

Në 24 orët e fundit janë kryer 282 testime nga të cilat janë konfirmuar 13 raste pozitive, përkatësisht, 11 raste në Tiranë, 1 rast në Krujë dhe 1 rast në Shkodër.

Janë testuar 39 personel shëndetësor nga të cilët kanë rezultuar pozitivë 3 raste, kontakte të rasteve të mëparshme pozitive.

Gjatë 24 orëve të fundit janë identifikuar disa raste të reja për të cilat po vijon hetimi epidemiologjik.

Në spitalin infektiv aktualisht po trajtohen 23 të prekur, nga të cilët 5 janë në terapi intensive, njëri prej tyre është i intubuar. Rreth 8% e të prekurve aktivë po trajtohen në spital kurse pjesa tjetër po ndiqen nga mjekët e familjes.

Në vendin tonë janë 266 persona aktivë me COVID19, ku në Tiranë janë mbi 68 % e të prekurve, kurse pjesa tjetër janë kryesisht në Durrës, Kamëz, Krujë.

Nga fillimi i epidemisë janë kryer mbi 17 mijë testime molekulare dhe serologjike dhe janë konfirmuar pozitivë 1197 raste, ndërsa rreth 75% e të prekurve janë tashmë të shëruar.

Ministria e Shëndetësisë dhe Mbrojtjes Sociale fton qytetarët të tregohen të kujdesshëm, duke respektuar rregullat e vendosura, për të ruajtur veten dhe të afërmit.

Mos neglizhoni shenjat e sëmundjes dhe për çdo shqetësim telefononi në numrin unik të Urgjencës Kombëtare, 127. Për informacion në lidhje me COVID19 dhe këshillim psikologjik, ju lutemi, telefononi në linjën e gjelbër 0800 40-40.