Lëvizja “Vetëvendosje” ka kërkuar nga organet e drejtësisë në Shqipëri që ta lirojnë sa më parë aktivistin e tyre nga Tirana, Boiken Abazi. Sipas LVV-së, me ndalimin e Abazit shpresojmë të mos jetë hakmarrje e ndonjë idhnaku që mban inat për prishjen e pazareve me Vuçiçin.

“Vuçiçi mund të jetë mik individual i dikujt, por ai nuk mund të jetë kurrë mik i shqiptarëve, për shkak të historisë e politikës që ai përfaqëson”, thuhet në komunikatë

Postimi i plotë

Lironi mbrojtësit e Teatrit Kombëtar të Shqipërisë. Edhe sot po vazhdojnë të mbahen të burgosur disa nga protestuesit që kundërshtuan rrënimin e Teatrit Kombëtar nga Qeveria dhe Bashkia në Tiranë, mes tyre dhe Drejtori Ekzekutiv i Qendrës së Lëvizjes VETËVENDOSJE! në Shqipëri Boiken Abazi.

Boiken Abazi përveç kontributit të tij si aktivist i rëndësishëm për Lëvizjen VETËVENDOSJE! shquhet edhe si qytetar i kulturuar e intelektual i angazhuar. Ndalimi i tij shpresojmë të mos jetë hakmarrje e ndonjë idhnaku që mban inat për prishjen e pazareve me Vuçiqin. Vuçiqi mund të jetë mik individual i dikujt, por ai nuk mund të jetë kurrë mik i shqiptarëve, për shkak të historisë e politikës që ai përfaqëson.

Ndërtesa e Teatrit ishte vlerë e dashur për qytetarët, shkatërrimi i saj ishte barbari e paqytetëruar. Protestuesit ishin paqësorë, prishja e Teatrit ishte brutale. Ata po mbahen pa arsyetim dhe me urdhër të prerë politik. Përgjegjësit politikë atje duket qartazi se po dëshirojnë ta bllokojnë shprehjen qytetare në formë proteste dhe pjesëmarrjen publike me argumente në kundërshtimin e rrënimit të Teatrit Kombëtar. Mirëpo çdo përpjekje për ta ndaluar protestën qytetare me burgosje është e dëshmuar që vetëm e rrit protestën dhe rezistencën.

Kërkojmë nga organet e drejtësisë së Republikës së Shqipërisë që të ruajnë integritetin duke mos e vijuar më tej këtë burgim politik të protestuesve si dhe të nisin hetimet për rrënuesit e Teatrit Kombëtar dhe ata që ushtruan dhunë mbi protestuesit, për shkelësit e vërtetë të Kushtetutës të ligjeve në fuqi, e të procedurave demokratike dhe transparencës, sa i përket vendimmarrjes.

Duket sikur demokracia mezi po mbahet në Shqipëri. Por demokracia është aftësia e qytetarëve për t’i befasuar pushtetarët, e nuk është spektakli i propagandës së pushtetit, që ua ledhaton mjekrat atyre. Ata që kanë besuar se pushteti i tyre është i pakufishëm, dhe se mund të shkelin e të përjashtojnë grupet shoqërore duke i etiketuar si pakica, përfundojnë të zhgënjyer. Duhet liruar Boiken Abazi, duhen liruar protestuesit dhe të mbahen përgjegjës rrënuesit, që të mos rrënohet e gjitha.
Prishtinë, 20 maj, 2020

Policia e Shtetit ka kryer në orët e fundit një aksion të gjerë në disa qytete të vendit, kundër kultivimit të drogës. Mësohet se aksioni është shtrirë në disa qytete, pas hetimeve që kanë zgjatur për më shumë se një vit. Derimë tani bëhet me dije se janë shoqëruar 40 persona në Tiranë, Shkodër dhe në Kukës.

22 persona janë arrestuar deri më tani në Kukës, gjatë një operacioni anti kanabis. Burime për Dosja.al bëjnë me dije se mes të arrestuarve është edhe vëllai i Fran Tucit, kreut të Bashkisë së Fushë Arrëzit, Arben Tuci.

22 personat e arrestuar janë: Kreshnik Murataj, Beqir Murataj, Shkëlqim Skacaj, Sali Kovaçi, Arben Tuci, Zamir Myftari, Floriand Myftaraj, Pal Pergjergji, Ramiz Cenaj, Naim Kadiu, Akil Buna, Arben Bejko, Durim Vata, Besart Dreni, Tarzan Veseli, Besnik Coka, Petrit Pashku, Benard Kordhaku, Shpëtim Topuzi, Zejnel Mece, Ardiatik Hoxha dhe Rezart Tahiri.

Operacioni anti-kanabis po zhvillohet edhe në qytete të tjera të vendimit. Uniformat blu kanë më shumë se dy vite që po hetojnë dhe sot është zhvilluar operacioni blic. Prej ditësh forcat e rendit kanë nisur një operacion kundër drogës, pasi ka shumë informacioneve që ka nisur kultivimi i kanabisit në masë. Edhe më herët Policia ka njoftuar për aksione anti-kanabis në Krujë dhe Durrës, ku nuk kanë munguar as arrestimet. Vetëm pak ditë më parë u sekuestruan mijëra fara kanabisi, të cilat ishin nisur nga Spanja dhe do mbilleshin në Shqipëri.

Nënkryetari i Bashkisë së Tiranës, Arbjan Mazniku, ka befasuar jo pak me një deklaratë të dhënë mbrëmjen e së martës në emisionin “Opinion”. Teksa u pyet nga moderatori Fevziu se si ka mundësi që godina e selisë së PS-së është në listën e monumenteve të kulturës si ndërtesë “me vlerë” dhe Teatri Kombëtar monument “pa vlerë”, ai pohoi duke thënë: Po, patjetër!

Ai u përpoq të justifikonte shembjen e godinës së Teatrit duke thënë se ka pasur probleme në lidhje me strukturën, mirëpo këtu ndërhyri Gjergj Bojaxhi, i cili i tha se nuk ka struktura të pariparueshme.

Pjesë nga debati

Fevziu: Selia e Partisë Socialiste, monument kulture, ndërtesë me vlerë. Teatri Kombëtar monument pa vlerë. Selia e PS e ka ndërruar fasadën rreth 15 herë. Selia e Partisë Socialiste, e cila e mund të jetë më me vlerë se Teatri Kombëtar?

Mazniku: Po, patjetër! Që në vitin ’58…Objekti i Teatrit ka pasur probleme në lidhje me strukturën.

Fevziu: Ka shumë godina historike që mund të kenë probleme me strukturën. Mund të kenë probleme të pariparueshme.

Gjergj Bojaxhi: Nuk ka struktura të pariparueshme!

Mazniku: Patjetër që nuk ka gjë të pariparueshme. Mund ta bëjmë nga fillimi.

Përfaqësues dhe mjekë të repartit të epidemiologjisë në qytetin e Durrësit kanë protestuar ditën e sotme pasi nuk kanë marrë shpërblimin e premtuar të qeverisë për mjekët e vijës së parë në përballjen me Covid-19.

Ata kërkojnë që qeveria të mbajë premtimin për shpërblimin por edhe pagesën për punën e kryer të shtunave dhe të dielave, ditë për të cilat kanë punuar gjatë 3 muajve të fundit.

Kryetari i Konfederatës së mjekëve në qytetin e Durrësit, Zija Alhysa tha për ABC Neës se urdhrat e ministres dhe të qeverisë nuk zbatohen për më tepër nga ana e drejtuesve të drejtorisë së Spitalit të Durrësit ka përgjigje me arrogancë dhe nuk ka transparencë.

“Kemi urdhrin e ministres dhe të qeverisë të cilat nuk zbatohen fare. Deri tan i asnjë person nuk ka marrë asnjë shpërblim të premtuar. Kemi bërë nga 60 orë në javë dhe asgjë s’kemi marrë. Ky është muaji i tretë që punojmë në këtë situatë, dhe kanë marrë vetëm miqtë e drejtoreshës. Ne kishim lajmëruar për protestë por personeli ka frikë dhe kanë presion se i pushojnë nga puna. Edhe shefi i epidemiologjisë nuk ka dalë këtu se i bëjnë presion. Ne kemi lënë afat për 3 ditë që të na japin përgjigje dhe më pas do ndërpresim punën, nuk kemi ku shkojmë tjetër”, tha Alhysa.

Duket sikur qeveria e ka alokuar fondin por po keqmenaxhohet nga institucionet. Duke akuzuar drejtoreshën e spitalit znj. Aurora Hyka, Alhysa tha se është ç’organizuar puna.

“Kemi kërkuar transparencë dhe na janë përgjigjur me arrogancë dhe mospërfillje. Unë e di detyrën time, kur ka situatë epidemie dhe vatra infeksioni duhet të jemi në krye edhe pa qenë drejtoresha fare por drejtoresha e ka ç’organizuar punën” deklaroi ai.

Aktori i njohur Çun Lajçi është përfshirë në debatin e madh të ditëve të fundit, atë për shembjen e Teatrit. Aktori ndër të tjera thotë se ajo godinë vërtetë nuk shërbente si teatër po kurrsesi nuk duhej shembur, aq më pak nga një artist si Edi Rama. Nuk kam dashur të mbaj anën e asnjërës palë thotë aktori por ai teatër nuk duhej shembur edhe pse e di se Rama do e ndërtoje të riun por nuk do ketë atë vlerë si ai që u shemb.

Aktori shkruan

(Une shkrova se n’çfarë gjendje ishte ai teatër, e s’i dola krah pushtetit, as Edit, as nuk thashë “rrenojeni”. Lexojeni siç shkrova, jo siç doni Ju)
Për çka po protestoni?

S’deshta,

o s’deshta me shkrua,

se dashtë e kam ma shumë se ju, që çirreni sheshit, tue derdhë lot pa lot, e tue mallkua pushtetin e Edin! O dashtë e kam ma shum se ju, betohem, dhe e dini pse? Se nji shekull m’ka nda me at teatër, nji bjeshkë kufi deri n’qiell,

– ju e kishit aty, unë veç n’andërra e kisha!

S’deshta, veç po iu them juve, që brenda hy s’i keni që dy dekada, e kam dashtë sa krejt atdheun, se viti 1972 m’futi n’zemrën e tij, e shfaqja “Viti 61″ me mori me vete, e shpirti me mbeti tek Naimi, Pitarka, Edi, Ndreka, Maria, Agimi….Por juve magjepsë iu kanë yjet që s’jetojnë, e arti i shpirtit tyne, e ditë s’keni për deshtoret e vogëla me tavane t’ulta, këthinat mizerje mbrapa s’kenës, tualetët që kutërbonin, e minjët që brenin kostumet! Ju kurrë pyet s’keni për pluhnin që aktorët thithnin, e t’ftoftit që t’prente n’ije! Zatën, këto kushte ia moren jetën Naim Frashêrit, e sa e sa të tjerëve!

Ju pelqye e keni nji sallë, e pyet si keni artistët për kushtet e vitit 1938 n’shekullin 21, ndaj shani e mallkoni e bani politikë me mjerimin e artistit!

Kjo asht turp!

Unë shkrova poezi për kolloset e tij, e mija rrole n’at skenë, jo për teatrin, se luejt kam edhe unë aty, dhe e di sa i mjerë ishte, dhe s’mund t’i dënoj artistet e rinjë me nji godinë që s’ishte kurrë teatër!

Tiranës i duhet teatri i ri, ashtu siç asht arti e koha, se e imja, dhe e atyne që ishin, nuk zhduket, pse rrenohet nji godinë. Ato mbesin n’letra, n’zemra, n’kujtime. Ajo mbetet histori që nuk rrenohet me nji godinë! Ju betohem ma shumë se ju dashtë e kam, se dy vite emnin e Kosovë e mbajti, por pse protestoni tani, kur s’asht ma? Pse, kur 20 vjet iket nga ajo godinë!
Pse e politizoni? Për çka?

Për Shqipërinë? Për Kosovën? Jo, s’asht e vërtetë, sepse po t’ishit patriot, do t’protestonit atë ditë, kur Vuçiç e Rama banin minishengene!

Teatri na duhet, e teatri besoj se do t’bahet, mija herë ma i mirë se ç’ishte. Edi asht i çmendun, por çmenduria e tij, ndoshta do t’nae sjell edhe nji teatër si ate të Shkupit! Duhet pritë e duhet pa!

Mos bani politikë me nji ngrehinë që kishte mbetë si fantazmë, e nuk e shikonit fare, se po dukeni vërtetë qesharak”.!

Në kundër përgjigje të këtij reagimi Edi Rama me anë të një statusi në Facebook shkruan se edhe pse nuk e njeh personalisht thotë se “aktori ka postuar me një vrazhdësi kaq të kthjellët, mbi këtë sherrnajën vulgare për një godinë të gabuar që u shemb me një vonesë dhjetra e dhjetra vjeçare!

Uroj ta takoj Çunin e Bjeshkëve të Namuna kur si dy “të çmendun” mes plot normalësh, të hapim dyert e Teatrit të Ri Kombëtar”, shkruan Rama.

Postimi i Ramës

ÇUN LAJÇIN e njoh si Çuni i Plisit të Bardhë e i një “grushti dhé”, ai që lidhi me një fill emocionesh unike diasporën shqiptare me tokën amë që digjej nga lufta andej bjeshkëve dhe u kthye përmes artit të tij, në ikonën shpirtërore të popullit gjatë asaj kohe të mallkuar… Po ta njihja personalisht apo po të mos më kishte thumbuar edhe mua në rreshtat bashkëlidhur, nuk do ta postoja këtu çka ai ka postuar me një vrazhdësi kaq të kthjellët, mbi këtë sherrnajën vulgare për një godinë të gabuar që u shemb me një vonesë dhjetra e dhjetra vjeçare!

Uroj ta takoj Çunin e Bjeshkëve të Namuna kur si dy “të çmendun” mes plot normalësh, të hapim dyert e Teatrit të Ri Kombëtar, i cili nuk do të jetë si ai i Shkupit nga forma neoklasike e zgjedhur për arsye ideologjike, por padiskutim do të jetë një Teatër Kombëtar që do të hyjë në listën e teatrove më të bukur europianë të ndërtuar në kohët moderne” .

Duket se aktori nuk e ka lënë me aq reagimin e tij i cili mbrëmjen e sotme i është përgjigjur kryeministrit në koment në statusin për të njëjtën temë ku shkruan:

Komenti i Lajçit

Zoti Rama.
Me vjen mirë që e paskeni postua letrën time, për t’vetmën arësye:Se ne të dy, kurrë përshendet s’jemi, e vërtetë s’nifemi!Por unë, edhe pse s’deshta me shkrua( sepse e dija se do t’shahem) e mora mundin të mos rrejë, dhe jo t’ua bëj qejfin artistëve, opozitës por as Ty. Shkrova përshtypjet e mia, t’vitit 1972, kur u ngjitëm me “Ervehenë” për herë t’parë në atë skenë!

Me muaj, kur jemi kthye n’Prishtinë, kemi folë për kushtet e vêshtira t’atij teatri. Dhe kur jam ngjitë me “Pasardhësin” e Kadaresë, para 4 vitësh, jam dëshpërua n’palcë. Vetës i kamë thënë: Si mund t’i thuesh nji artisti, krijo n’mujsh me krijua n’kushtet e teatrit të 1938-tës, tue jetua n’shekullin 21!

E kam ditë, se s’do t’pëlqejë as Ty, kur t’quejta të”çmendur” sepse kështu po t’quejnë e gjithë Tirana, por e kisha qëllimin t’iu them, se edhe ai n’çmendurinë e vet, e din se ç’asht arti, dhe do ta ndërtoi nji tjetër, mija herë ma t’mirë! M’shanë edhe n’letren e sotit, dhe iu drejtova: Atdhe, a ti shajë a ti nemi, këta që bëjnë gjumë, e kur zgjohën, i bashkangjitën t’parit që bërtet, pa e ditur pse?

Por, po ta them n’katër sy: Ajo godinë s’ishte kurrë teatër, por megjithate, ti si artist, asht dashtë ta restaurosh në mënyrën ma përfekte t’mundshme, e nga brenda t’krijosh kushte luksi, vetëm e vetëm, qe shpirtnat e atyne që u rropatën atyne dërrasave, t’mos lëkunden nga ajo skenë! Unë jam i bindun se do ta ndertoni tjetrin, por ai fatkeqësisht s’do t’jetë aty, me pa madhështinë e artit n’teatrin modern!

Dhe përfund. Mjerë ata që edhe artin e politizojnë, sepse tregojnë, sa shumë t’varfër shpirtërisht janë.

Ta shkrove me t’thanë se s’kam tituj si aktorët tuaj, por kam zemër me thanë t’vërtetën! Dëshiroj t’jeshë aç i çmendur, që ta ndërtosh nji teatër aç modern, me ballinën e njetë të t’vjetrit, që t’çmendemi edhe ne artistët me bukurinë e artit!

Qofsh i nderuem prej Çunit t’Bjeshkëve t’nemuna, i nemun edhe vet, që e flas të vërtetën!