21.5 C
Tirana
E diel, 25 Maj, 2025
type here...

Tryeza për Reformën Zgjedhore, reagon BE: Një arritje e rëndësishme për rivendosjen e stabilitetit politik

Në lidhje me uljen në tryezën për Reformën Zgjedhore të 4 përfaqësuesve të opozitës parlamentare dhe jo parlamentare dhe të mazhorancës ka reaguar edhe BE përmes ambasadorit të saj Luigi Soreca.

Soreca është shprehur se BE mirëpret marrëveshjen e sotme ndër-partiake për Reformën gjithëpërfshirëse Zgjedhore e cila është një arritje e rëndësishme, për rivendosjen e stabilitetit politik të Shqipërisë, dhe rrugën drejt integrimit evropian.

“Ne mirëpresim marrëveshjen e sotme ndër-partiake mbi rrugën përpara për një reformë gjithëpërfshirëse zgjedhore, në përputhje me rekomandimet e OSBE / ODIHR. Është një arritje e rëndësishme për rivendosjen e stabilitetit politik të Shqipërisë dhe në kontekstin e procesit të integrimit të BE të Shqipërisë.

Ne besojmë se të gjitha partitë do të vazhdojnë të punojnë së bashku për të përfunduar një reformë zgjedhore në kohë që do të miratohet nga Parlamenti, në të mirë të qytetarëve shqiptarë dhe të ardhmen e tyre evropiane”, shkruan Soreca.

Bylykbashi: Dokumenti garanton një reformë zgjedhore me konsensus dhe asistencë ndërkombëtare

Përfaqësuesit e opozitës në Këshillin Politik, Oerd Bylykbashi dhe Petrit Vasili komentuan pas takimit që zgjati një orë, vendimin për të nisur punën për reformën zgjedhore.

“Sapo dakordësuam dokumentin që ne si opozitë, dhe pala tjetër, ramë dakord për fillimin e një procesi të rëndësishëm siç është ai i reformës zgjedhore. Ky dokument garanton që reforma zgjedhore të bëhet me konsensus, të jetë gjithëpërfshirëse dhe në këtë mekanizëm do kemi asistencën ndërkombëtare. Së fundmi, edhe pas kaq kohësh nga kërkesa jonë, për të arritur këtë do të ngrihet një forum që do quhet Këshilli Politik, që do të mandatojë punën për të kryer këtë reformë”, tha Bylykbashi.

Kurse Petrit Vasili u shpreh: “Praktikisht është hedhur një hap në raport me një moment të rëndësishëm që ka të bëjë me plotësimin e një kushti kyç të Bundestagut gjerman.

Do adresohen ato çështje që kanë qenë shkaku i shkatërrimit të besimit, por edhe në praktikë të procesit zgjedhor. Baza krijon mundësinë që të gjithë aktorët dhe faktorët të kenë mundësi të shprehen dhe të realizohet gjithëpërfshirja. Besoj se në këtë moment është hedhur një hap në këtë drejtim, i cili në rast të luajalitetit nga pala tjetër do ishte një mundësi për të ecur përpara drejt integrimit europian”.

I pyetur se përse opozita pranoi të ulej në tryezë me Damian Gjiknurin, të akuzuar më parë prej tyre, Vasili tha: “Nuk imponojmë zgjedhjet e palës tjetër”.

Presioni ndërkombëtar, pranohet propozimi i opozitës: Reformë zgjedhore konsensuale jashtë parlamentit

Komisioni i Reformës Zgjedhore nuk do të jetë vendi ku do të arrihet konsensusi mes qeverisë dhe opozitës për reformën zgjedhore. Këtë e përcakton “Kuadri i Bashkëpunimit për Reformën Zgjedhore”, i dakordësuar mes qeverisë dhe opozitës.

Pas disa muajve rezistencë dhe pas presionit ndërkombëtar, Partia Socialiste ka rënë dakord që diskutimet kryesore për reformën t’i bëjë një grup pune me përbërje të barabartë prej 4 anëtarësh.

Ata janë bashkëkryetarët e Komisionit për Reformën Zgjdhore, Damian Gjiknuri, Rudina Hajdari, si dhe përfaqësuesit e koalicionit opozitar, Oerd Bylykbashi, Petrit Vasili.

Propozimi që diksutimet për reformën zgjedhore të bëhen jashtë komisionit për reformën zgjedhore ishte pikë kyçe në dokumentin me 5 pika që opozita i paraqiti qeverisë në muajin tetor, në të cilin komisioni i reformës cilësohej si ilegjitim.

Përfaqësuesit e partive kanë rënë dakord për një tekst të përbashkët me 8 pika, ku janë reflektuar kërkesat e opozitës për ecjen përpara me reformën zgjedhore.

1. Miratim i reformës zgjedhore në mënyrë transparente, gjithëpërfshirëse, konsensuale mes partive politike.

2. Hartimi dhe diskutimi i reformës jashtë parlamentit në tryezën politike të partive.

3. Miratimi pa ndryshime nga komisioni dhe Parlamenti i produktit konsensual të tryezës politike.

Partitë e qeverisë dhe opozitës kanë rënë dakord të formojnë Këshillin Politik, një tryezë ku marrin pjesë, përfaqësues të opozitës së bashkuar, drejtuesit e Komisionit Parlamentar të Reformës Zgjedhore, si dhe përfaqësues të grupeve parlamentare në Kuvend.

Përveç rekomandimeve të OSBE/ODIHR-it, palët kanë rënë dakord të diskutojnë edhe çdo problematikë tjetër zgjedhore, që i shërben arritjes së standardeve zgjedhore ndërkombëtare.

Duke u angazhuar që të përfundojnë Reformën deri në 15 mars, qeveria ka rënë dakord të mos ndryshojë produktin e dakortësuar me opozitën, në Komision apo në seancë plenare.

Berisha: Vuçiç dhe argatët e tij në Tiranë e Shkup, thikë pas shpine Kosovës

Ish-Kryeministri Sali Berisha ka pasur një takim të rëndësishëm dje me ambasadorin e Kosovës në Tiranë, z. Nait Hasani. Berisha ka bërë të ditur, përmes një mesazhi në FB se i ka përcjellë shqetësimin e tij qeverisë së Kosovës për një marrëveshje të re kulisash, të hartuar nga Beogradi dhe që pritet të firmoset në Serbi, nga krerë të qeverisë shqiptare: “Me këtë marrëveshje, nënvizon Berisha, çështja e emergjencave në rajon, de facto, i besohet Serbisë dhe më saktë Rusisë, e cila ka ngritur në Nish prej kohësh një qendër “emergjencash”, e cila de facto, drejtohet nga zbulimi dhe shërbimet sekrete ruse.”

Mesazhi i plotë i Berishës në Fb, mbi bisedën që pati me ambasadorin Nait Hasani

Takim me Ambasadorin e Kosovës!

Të dashur miq, dje prita në një takim, Ambasadorin e Kosovës, z. Nait Hasani.

Pasi i urova mirëseardhjen në misionin e tij diplomatik në Shqipëri, si Ambasador i Kosovës, diskutuam gjerësisht mbi marrëdhëniet midis dy vendeve dhe situatën rajonale.

Në këtë takim, shfrytëzova rastin ta siguroj Ambasadorin Hasani, për përpjekjet e pandërprera në zhvillimin e marrëdhënieve vëllazërore midis Shqipërisë dhe Kosovës, si marrëdhënie shumë të rëndësishme në rrafshin kombëtar dhe ndërkombëtar. Gjithashtu, denoncova përpjekjet destabilizuese të Beogradit, vasalëve të tij në Tiranë dhe Shkup, për të rivendosur hegjemoninë e Serbisë në rajon, hegjemoni që në të shkuarën ka sjellë luftra dhe konflikte të përgjakshme.

Me projektin e Jugosllavisë së Re, me emrin maskë “minishengen”, serbomadhi Vuçiç dhe argatët e tij në Tiranë dhe Shkup, i fusin Kosovës një thikë pas shpine dhe shndërrojnë Shqipërinë dhe Maqedoninë e Veriut në dy vasalë të Beogradit. Në këtë kontekst, qëndresa e Kosovës ndaj këtij projekti ogurzi, merr rëndësi përcaktuese jo vetëm për Kosovën, por edhe për paqen dhe stabilitetin në mbarë rajonin.

Në këtë takim, gjithashtu i kërkova Ambasadorit Hasani, t’i përcjellë Qeverisë së Kosovës shqetësimin tim, për një marrëveshje të përgatitur nga Beogradi në kulisa, gjoja për emergjencën dhe që pritet të firmoset në Beograd nga Serbia dhe vasalët e saj në Tiranë dhe Shkup.

Me këtë marrëveshje, çështja e emergjencave në rajon, de facto, i besohet Serbisë dhe më saktë Rusisë, e cila ka ngritur në Nish prej kohësh një qendër “emergjencash”, e cila de facto, drejtohet nga zbulimi dhe shërbimet sekrete ruse.Takimi ishte i hapur.“

Valverde flet pas shkarkimit: Rroftë Barcelona, rroftë Katalonja

Ernesto Valverde u ka thënë lamtumirë tifozëve të Barcelonës përmes një letre të hapur, pas më pak se 24 orëve pas shkarkimit të tij nga posti i trajnerit të Barcelonës, ku i fitoi dy tituj radhazi të La Ligës.

E ardhmja e Valverdes në Camp Nou kishte qenë e pasigurt që një kohë, por presioni u shtua pas eliminimit të Barcelonës nga Atletico Madridi në Superkupën e Spanjës.

Barcelona mbetet ende në garë për të fituar tituj këtë sezon, pasi që është në krye të tabelës së La Ligës dhe është kualifikuar në 1/8 e finales së Ligës së Kampionëve. Megjithatë, përkundër kësaj, Valverde u bë trajneri i parë që shkarkohet nga Barcelonë në 17 vjet.

Valverde u kritikua më së shumti për eliminimet dramatike nga Liga e Kampionëve në dy sezonet e fundit, kundër Romës dhe Liverpoolit, mirëpo 55-vjeçari po largohet me kokën lart dhe krenar me arritjet e tij me klubin katalonas.

“Koha ime si trajner i Barcelonës ka marrë fund. Kanë qenë dy vjet e gjysmë shumë intensive që nga fillimi. Gjatë kësaj kohe, unë kam shijuar momente të lumtura, duke festuar fitore dhe trofe, por edhe disa momente që kanë qenë të vështira”, ka shkruar Valverde.

“Megjithatë, mbi të gjitha, do të doja ta theksoja përvojën time me tifozët dhe dashurinë që ata e kanë shfaqur me mua gjatë kohës sa kam qenë trajner”.

“Do të doja ta falënderoj presidentin Josep Maria Bartomeu dhe bordin e drejtuesve, që ma dhanë mundësinë ta drejtojë ekipin e parë dhe më besuan gjatë gjithë kësaj kohe”.

“Gjithashtu do të doja t’i falënderoj të gjithë njerëzit me të cilët kam punuar në klub për përkrahjen e tyre dhe mënyrën se si më kanë trajtuar gjatë këtyre dy vjetëve e gjysmë, veçanërisht ata që kanë punuar me ekipin e parë dhe me të cilët kemi ndarë aq shumë momente të veçanta në kampin stërvitor dhe në rrugëtimet tona”.

“Natyrisht, dua t’i falënderoj lojtarët për të gjitha tentimet e tyre, të cilat na i kanë mundësuar t’i fitojmë katër trofe së bashku. Nga kjo ditë, unë ua uroj të gjithë fatin e botës atyre dhe trajnerit të ri Quique Setien”.

“U pritshin të mirat të gjithëve. Rroftë Barcelona dhe rroftë Katalonja”.

Tërmeti e la pa shtëpi dhe pa mbështetje, banori nga Kurbini apel shtetit për ndihmë

Tërmeti i 26 nëntorit ka lënë gjurmë edhe në fshatin Shpërdhet të Kurbinit. Në këtë fshat janë me janë 83 banesa të dëmtuara, nga të cilat 10 kanë dalë jashtë funksionit. E tillë është edhe banesa e Pashkë Qepurit. Për shkak të frikës se shtëpia mund tu shembet familjen e ka zhvendosur në një shtëpi në Tiranë, por vetë vazhdon dhe qëndron aty.

I zoti i shtëpisë kërkon nga shteti që ti tregojë nëse shtëpia e tij është e banueshme apo jo, pasi në shtëpi ka edhe një vajzë të sëmurë për të cilën duhet të kujdeset.

“Jam ankuar dhe ka ardhur një komision, kanë bërë këto verifikime dhe thonë, banesa juaj të riparohet. Unë dua verifikim tjetër edhe jam me një invalide të grupit të parë, në pozita shumë të vështira”, shprehet ai.

Qepuri tregon se në grupet e verifikimit i kanë thënë se banesa kërkon vetëm një rikonstruksion dhe se mund të të qëndrojë në shtëpi. Por për kryefamiljarin fjala e tyre është e pamjftueshme.n
Vath Myrta kryetari i fshatit shprehet se në këtë zonë verifikimi është bërë në mënyrë selektive.

“Ajo është prishur në strukturë totalishte dhe çatia është prishur totalisht”, thotë kryeplaku.
Si familja qepuri në këtë fshat janë edhe shumë familje të tjera, të cilat presin nga shtetit që të merren masa për rikonstruksioni ose rindërtimin ku është e nevojshme./abcnews.al

Telefoni bie në mes të natës: “Më ndihmo” – Mino Raiola zbulon çmendurinë e Arda Turanit

Arda Turan e përfundoi huazimin dyvjeçar te Basaksehir me shumë skandale, për t’u rikthyer kështu te Bracelona. Mund ta imagjinoni se cila ishte biseda e tij me agjentin e tij, Mino Raiolan, por jo edhe detajet që i kanë biseduar.

Kur kishte kaluar mesi i një nate, mesfushori turk e kishte telefonuar agjentin italian që ta ndihmonte dhe t’i shpëtonte karrierën.
Raiola ka zbuluar se si Turan e thirri atë me numër të fshehur dhe i kërkoi ndihmë në mes të natës.

“Jam Arda”. Raiolas nuk i bije në mend për të: “Arda, kush?”.
“Çfarë do të thuash? Jam Arda Turan. Shiko, Mino. E di se është vonë, por më duhet ndihma juaj. Jeni njeriu i vetëm që mund ta bësh këtë. Më duhet një klub”.

Raiola më pas e kupton se është ai dhe e di se sa i dëshpëruar është për një klub të ri dhe e vazhdon bisedën me të.
“Por, ti ke tashmë një klub. Je te Barcelona”, i thotë italiani.
“Nuk do të shkoj më atje”, ia kthen Turan.

“Pasi ata (Barcelona) nuk të duan”.
“Pasi unë nuk i dua ata. Shiko, ti e di si janë gjërat me mua dhe Barcelonën. Ata asnjëherë nuk më ofruan një shans. Më duhet një ndryshim, një start i ri”.

“Në rregull, do të shikojmë”, ka thënë Raiola, duke filluar t’i mbledhë të dhënat e tij.
“Arda Turan. 32-vjeçar. Atletico Madridi, 178 paraqitje, 22 gola, Barcelona, 55 paraqitje, 15 gola. Klubi ku ka luajtur së fundmi, Istanbul Basaksehir, aty ku i është ndërprerë huazimi, pasi i gjuajti me armë në spital. 42 ndeshje, vetëm dy gola”, tregon agjenti italian.

Mino Raiola
“A nuk ështëkjo një rënie në karrierë?”.
“Po e mendon seriozisht këtë gjë”, ia ka kthyer mesfushori turk.
“Po”, Raiola ia kthen. “Dëshiron të bisedosh incidentin me armë?”.

“Jo, nuk dëshiroj”, thotë Turan.
“Mirë, ti ju afrove një këngëtarit në Turqi në një klub nate dhe u përleshe, shkove në spital e gjuajte me armë dhe frikësove gruan e tij, më pas të arrestuar. Storie të ndryshme.

Çfarë thua për kohën kur u dënove me 16 ndeshje mos-lojë? T’u reduktuan në dhjetë nga apeli. Pasi godite gjyqtarin. Më pas e kërcënove një gazetar në një ndeshje ndërkombëtare”, ia kthen agjenti.

“Shiko, kam nevojë për një klub në janar. A je ti një agjent apo gjyqtar?”, ia kthen turku.
“Të dyja”, ia kthen Raiola, me një ton të nervozuar. “Të gjitha këto gjëra të testojnë dhe asnjë klub nuk të dëshiron me këtë sjellje”.

“Nëse vazhdon kështu, as unë nuk të ndihmoj, një lojtar të rebeluar askush se do. Do të shikojmë këto ditë. Nëse mund të bëjë diçka dhe të gjej një skuadër që është e interesuar për ty edhe pse është e vështirë”, ka zbuluar më tej Mino Raiola.

Agjenti italian më tej ka shtuar se Turan është i dëshpëruar për të gjetur një skuadër të re dhe mund të ndodhë që në këtë afat kalimtar të janarit ai të transferohet në ndonjë ligë.

Si do të ndahet pushteti në Kosovë, LDK merr Presidentin dhe…

Lëvizja Vetëvendosje të hënën mbrëma i ka bërë edhe një ofertë Lidhjes Demokratike të Kosovës për bashkëqeverisje, ku është propozuar që Qeveria e ardhshme të ketë 14 ministri, e jo 12 siç ishin pajtuar më parë këto dy subjekte politike.

Burime të Telegrafit bëjnë të ditur se LVV i ka ofruar LDK-së që të udhëheq me 6 ministri, LVV me 5 dhe 3 sosh për minoritetet.

Sipas këtij burimi, në ofertën që ka bërë LVV, kjo parti është pajtuar që LDK të merr edhe postin e Presidentit, shkruan Telegrafi.

LDK do t’i kishte edhe dy zëvendësministra më shume së LVV.
Ndryshe, nga LDK ka konfirmuar se LVV ua ka dërguar një ofertë të re për bashkëqeverisje dhe se do ta shqyrtojnë gjatë ditëve në vijim.

Shkodra përkujton 30 vjetorin e demostratës së parë, Ademi: Të gjithë bashkë të përfundojmë atë që nisëm në 1990!

Nga Voltana ADEMI

Sot mbushen 30 vjet nga lëvizja e parë qytetare që ishte preludi i ndryshimeve demokratike në dhjetorin e vitit 1990. 14 janari 1990 është përballja e parë frontale në Shqipëri, përballja e shkodranëve me diktaturën, që edhe pse në grahmat e fundit, ishte më e rrezikshme se kurrë.

Ajo që më pas u quajt protesta e heshtur e 14 janarit 1990, ishte vazhdimësi e qëndresës 45 vjeçare që Shkodra e shkodranët, me të gjitha mënyrat e me çdo çmim, i bënë regjimit të egër komunist. Jo rastësisht, ata që ishin organizatorët e pjesëmarrësit e kësaj ngjarje, vinin nga familje që e kishin vuajtur mbi shpinë terrorin e regjimit.

14 janari 1990 ishte sinjali që Shkodra e shkodranët i dhanë Shqipërisë e shqiptarëve. Ashtu si në momentet më të rëndësishme për fatet e vendit, Shkodra e shkodranët vranë të parët frikën. Busti i Stalinit nuk mund të qëndronte më në sheshin kryesor të Shkodrës!

14 janari ishte jo vetëm hapi i parë i rëndësishëm drejt shembjes së simboleve të komunizmit në këtë vend, edhe zanafilla e lëvizjeve të tjera që pasuan e kulmuan me 12 dhjetor 1990 me krjimin e të parës parti opozitare pas 45 viteve diktaturë.

Sot, 30 vjet pas 14 janarit 1990, është moment reflektimi: Për të nderuar e vlerësuar kontributin e organizatorëve e pjesëmarrësve në protestën e heshtur të 14 janarit. Por edhe se 14 janari duhet parë edhe si një mësim për ata që sot mbase kanë moshën e pjesëmarrësve të protestës së 30 viteve më parë.

A e kemi Shqipërinë që ëndërruam të gjithë në vitin 1990, a është vendi ynë aty ku e meriton të jetë, a është sistemi ku jetojmë ne sot – sistemi që kërkuam të gjithë në vitin 1990?

Shqipëria e bashkë me të edhe Shkodra jonë e shkodranët, meritojnë më shumë. Fillimisht punë, mirëqenie, zhvillim dhe prosperitet. Por mbi të gjitha, duan demokraci të vertetë, të drejta të pacënueshme nga askush, barazi para ligjit dhe ndëshkim të krimit e korrupsionit. Këmbanat e alarmit për demokracinë, ka kohë që bien. Është detyra jonë që, të gjithë bashkë të përfundojmë atë që nisëm në 1990!

Duke larguar njëherë e mirë të gjitha rudimentet e diktaturës komuniste që po tenton të rikthehet me një pamje më të sofistikuar, por me të njëjtat qëllime të errëta si gjatë 45 viteve diktaturë.

Nderim, mirënjohje e respekt për të gjithë organizatorët e pjesëmarrësit e 14 janar 1990! Nderim dhe respekt për familjet e tyre, për sakrificat që vuajtën.
Nderim për Shkodrën e shkodranët!

Shaqirin e kërkon Roma, Liverpool refuzon

Liverpooli e ka refuzuar ofertën e Romës për ta transferuar në formë huazimi Xherdan Shaqirin gjatë afatit kalimtar të janarit, sipas gazetarit të famshëm sportiv, Fabrizio Romano.

Roma e drejtuar nga Paulo Foncesa e identifikoi zviceranin me origjinë shqiptare si zëvendësues potencial të Nicolo Zaniolos, i cili do të mungojë për pjesën e mbetur të sezonit për shkak të një lëndimi serioz në gju.

Megjithatë, Liverpooli e ka refuzuar menjëherë ofertën e Romës dhe ia ka bërë të qartë gjigantit italian se nuk ka asnjë mundësi që 28-vjeçari të largohet nga Anfieldi këtë muaj.

Shaqiri i ka bërë vetëm dhjetë paraqitje në 38 ndeshjet e Liverpoolit këtë sezon dhe ka qenë titullarë vetëm tre herë gjithsej.

Përkundër që ka kontribuar vetëm me një gol në këto ndeshje, trajneri Jurgen Klopp ia ka bërë të qartë drejtuesve të Liverpoolit se dëshiron ta mbajë Shaqirin në skuadër. Kloppi beson se mund të ketë mungesa në skuadër nëse lejohet largimi i 28-vjeçarit.

Në anën tjetër, nuk dihet nëse Shaqiri do të kishte dashur të kthehej në Serie A, ku në të kaluarën kishte luajtur për Interin. Ai më herët kishte deklaruar se nuk është i kënaqur me minutat e pakta të lojës në Anfield.

1...3 9353 9363 937...8 334Faqja 3 936 nga 8 334

Kryesore

Continue to the category
Më shumë
© 2024 Rilindja Demokratike Euroatlantike