Mënyra se si jetoni, ajo çfarë hani dhe pini, si dhe trajtimi që i bëni trupit tuiaj mund të ndikojë në kujtesën tuaj po aq shumë sa mirëqenia dhe shëndeti fizik.
Ja çfarë mund të bëni çdo ditë që të mbani si trupin edhe mendjen të shëndetshme:

Menaxhoni stresin
Streset ditore si presioni i afateve kohore apo zënkat e vogla, mund t’ju shpërqendrojnë dhe të ndikojnë në aftësinë tuaj për t’u përqendruar dhe për t’u kujtuar. Por, problem më i madh është një ndjenjë e vazhdueshme ankthi, që mund të çojë në dëmtimin e aftësisë për të kujtuar. Frymëmarrjet e thella, meditimi dhe joga, mund të jenë mënyra se si ta menaxhoni stresin.

Bëni një gjumë të mirë
Njërëzit që nuk flenë mirë gjatë natës, harrojnë më shumë se sa ata që bëjnë një gjumë të rehatshëm. Një natë e mirë gjumi është thelbesore për konsolidimin e kujtimeve. Arsyeja më e shpeshtë e mungesës së gjumit është insomnia, vështirësia për të rënë dhe për të qëndruar në gjumë.

Fatkeqësisht, shumë ilaçe që përdoren për të trajtuar insomninë, gjithashtu mund të dëmtojnë kujtesën dhe funksionin e përgjithshëm të trurit. Kjo është arsyeja se përse është më mirë që fillimisht të përmirësosh zakonet e të fjeturit dhe t’i përdorësh ilaçet si një zgjidhje të fundit. Nëse keni nevojë për ilaçe, përdorni dozën më të vogël të mundshme për një kohë sa më të shkurtër deri në përmirësimin e gjumit.

Hiqni dorë nga duhanpirja
Konsumuesit e duhanit kanë një shkallë më të lartë të humbjes së kujtesës dhe probleme të tjera me kalimin e moshës , se sa ata që nuk e konsumojnë duhanin. Personat që pijnë më shumë se dy paketa cigaresh në ditë gjatë moshës së mesme kanë një risk më shumë se të dyfishuar për zhvillimin e demencës gjatë plakjes, se sa ata që nuk pijnë duhan.

Nëse pini alkool, bëjeni këtë në mënyrë të kontrolluar
Konsumimi i tepërt i alkoolit rrit riskun për humbje të kujtesës dhe demencë. Njerëzit e alkoolizuar kanë vështirësi në kujtesën afatshkurtër, si përshembull mbajtja mend e listave. Një tjetër lloj i humbjes së kujtesës për shkak të alkoolit quhet sindroma e Korsakofit.

Në këto raste, defiçenca afatgjatë e vitaminës B1 e kombinuar me efektet toksike të alkoolit në tru, mund të shkaktojë amnezi të papritur dhe të menjëhershme. Në disa raste kjo humbje e kujtesës mund të jetë e përhershme, por nëse kapet herët, mund të kthehet deri në njëfarë mase.

Mbrojeni trurin nga dëmtimet
Trauma e kokës është një shkak kryesor i humbjes së kujtesës dhe rritjes së riskut për të zhvilluar demencë. Përdorni gjithmonë mjetet e duhura gjatë aktiviteteve me shpejtësi të madhe dhe sporteve të kontaktit.

Mbani një kokore kur i jepni biçikletës, motorçikletës, kur bëni ski etj. Vendosni rripin e sigurimit kur udhëtoni me mjete motorike. Aksidentet me makinë janë ndër shkaqet më të shpeshta të dëmtimeve të trurit, dhe vendosja e rripit të sigurimit, redukton në sasi të mëdha shanset për një dëmtim të rëndë të kokës.

Joga e përmirëson shëndetin fizik në disa mënyra të ndryshme. Disa nga këto mënyra vijnë si pasojë e një menaxhimi më të mirë të stresit. Të tjera janë pasojë më direkte e lëvizjeve fizike dhe pozicioneve në joga, që mund të përmirësojnë fleksibilitetin dhe të reduktojnë dhimbjen e kyçeve.

Studimet paraprake tregojnë se joga mund të ndihmojë me migrenën, osteoporozën, problemet me balancimin dhe lëvizjen, sklerozën multiple, sëmundjen inflamatore të zorrëve, fibromialginë dhe ADHD.

Ndërsa efekte pozitive në shëndet, të mbështetura dhe nga shkenca janë:
Reduktimi i dhimbjes së shpinës

Dhimbja e shpinës është një nga problemet më të zakonshme me shëndetin me kalimin e moshës. Por joga mund të ndihmojë me këtë. Një meta – analizë e 10 studimeve të randomizuara, e vitit 2013, zbuloi “ prova të forta për efekte afatshkurtra dhe prova të moderuara për efekte afatgjata të jogës në dhimbjen kronike të shpinës”.

Në fakt, Shoqata Amerikane e Dhimbjes, nxit doktorët që të konsiderojnë rekomandimin e jogës në pacientët me dhimbje kronike të shpinës.

Edhe pse është tunduese të qëndroni në krevat, pa lëvizur, kur keni dhimbje shpine, mjekët nuk e rekomandojnë këtë. Ndërkohë që të qëndruarit shtrirë minimizon stresin mbi vertebrat lumbare, gjithashtu shkakton muskujt që të humbasin lëvizshmërinë, ndër probleme të tjera.

Joga ndihmon në largimin e dhimbjes së shpinës duke rritur fleksibilitetin dhe forcën e muskujve. Një rol mund të luajnë dhe relaksimi, reduktimi i stresit dhe njohja më e mirë e trupit, që sjell joga.

Në një studim, të publikuar në revistën shëndetësore “Shpina”, personat me dhimbje të shpinës që bënë dy seanca 90 – minutëshe në javë, për 24 javë, patën një reduktim të dhimbjes me 56%.

Ata kishin gjithashtu depresion më të ulët, krahasuar me personat me dhimbje shpine që morën kujdes të standartizuar, si ilaçe kundra dhimbjes. Rezultatet sugjeruan nje trend drejt uljes së përdorimit të ilaçeve kundra dhimbjes, në ata persona që bënin joga.

Dhimbje e reduktuar e artritit
Është parë që aktiviteti fizik mund të ndihmojë në largimin e dhimbjes dhe mpirjes që vjen si pasojë e osteoartritit. Problemi është që këto simptoma mund ta bëjnë të vështirë të merresh me aktivitet fizik.

Joga ofron një formë më të lehtë uhtrimesh që ndihmon në përmirësimin e shkallës së lëvizjeve dhe forcimin e muskujve rreth kyçeve që dhembin.
Në një studim të vitit 2014 me 36 gra me osteoartrit në gjunjë, ato që bënë joga, përjetuan një përmirësim domethënës të simptomave të tyre krahasuar me gratë e tjera që nuk e bënë këtë.

Joga mund të ndikojë dhe tek personat me artrit reumatoid. Në një studim të vitit 2015, gratë me artrit reumatoid, raportuan përmirësime në shëndetin e tyre fizik, në aftësinë për të ecur, në nivelet e dhimbjes, energji, humor dhe më pak dhimbje dhe enjtje në kyçe, pasi bënë dy orë seanca joge në javë për 8 javë.

Studime të shumta veçse kanë dëshmuar se të punuarit për më gjatë se 39 orë në javë është gjë e pashëndetshme për gjithsecilin.

Por, tani duket se orari i gjatë i punës është më i dëmshëm posaçërisht për gratë.
Në fakt, femrat të cilat punojnë mbi 45 orë në javë janë deri në 63% më të prira ta zhvillojnë diabetin sesa ato të cilat punojnë mes 35 dhe 40 orë në javë.

Të paktën kështu e thotë një studim i ri, i cili është publikuar në revistën ‘BMJ Open Diabetes Research & Care’.

Për plot 12 vjet, hulumtuesit kishin monitoruar 7,065 punëtorë (3,502 prej tyre femra dhe 3,563 meshkuj) në Kanadë, të cilët nuk kishin pasur diagnozë të mëhershme të diabetit.

Ndonëse nuk ishte gjetur ndonjë lidhje mes zhvillimit të diabetit dhe orëve të gjata të punës për meshkujt, studimi ka zbuluar se shkaku i orarit të gjatë të punës, te femrat rritet në mënyrë drastike rreziku për diabet.