Gjiganti kinez i telekomunikimeve, Huawei, ngriti padi kundër Qeverisë së Shteteve të Bashkuara, për shkak të një ndalese që i kufizon agjencitë federale të përdorin prodhimet e tij.
Huawei tha se SHBA-ja nuk ka arritur të sjellë prova për të mbështetur ndalesën dhe shtoi se kompania nuk ka lidhje me Qeverinë e Kinës.
“Ndalesa jo vetëm që është e paligjshme, por gjithashtu e pengon Huawein nga angazhimi në konkurrencë të ndershme, duke i dëmtuar në fund konsumatorët amerikanë”, tha kryetari i Huaweit, Guo Ping.
Padia u ngrit në një gjykatë federale në Teksas.
SHBA-ja ka thënë se ka kufizuar përdorimin e prodhimeve të Huaweit për shkak të shqetësimeve për sigurinë kombëtare.
Ajo ka ngritur një mori akuzash penale kundër kompanisë, të cilat përfshijnë mashtrimin bankar, pengimin e drejtësisë dhe vjedhje të teknologjisë nga kompania amerikane T-Mobile.
SHBA-ja po ashtu ka lobuar tek aleatët që të shmangin kompaninë kineze.
Huawei është një nga ofruesit më të mëdhenj të pajisjeve dhe shërbimeve të telekomunikimit në botë.
Por, Shtetet e Bashkuara dhe vendet e tjera perëndimore kanë shprehur shqetësim se Qeveria e Kinës mund ta përdorë teknologjinë e tij për t’i zgjeruar kapacitetet e spiunimit, edhe pse firma këmbëngul se nuk ka kontroll qeveritar.

Zyrtarët amerikanë kanë paralajmëruar gjatë një konference për energjinë në Bruksel se administrata e Presidentit Trump do të ndërmarrë veprime ndëshkuese ndaj kompanive evropiane që po ndërtojnë linjën e tubacioneve të gazit natyror “Nord Stream 2” , të parapëlqyer nga Kremlini, për transportimin e gazit nga Rusia në Gjermani, duke anashkaluar Ukrainën.
Linja e tubacioneve “Nord Stream 2” (NS2) do të zëvendësojë kryesisht një tubacion të vjetër që kalon nëpër Ukrainë dhe Poloni dhe ka mbështetjen e qeverisë gjermane. Por kjo ka shkaktuar alarm tek qeveritë e Evropës Qendrore, zemërimi i të cilave është shtuar edhe më shumë nga minimalizimi i shqetësimit të tyre nga ana e Berlinit.
Këto vende kundërshtojnë linjën e tubacioneve të gazit “Nord Stream 2” (NS2), e cila do të përshkojë 1,200 kilometra nga Vyborgu i Rusisë në Lubmin të Gjermanisë, duke kaluar nën Detin Baltik, jo vetëm sepse do të humbasin tarifat fitimprurëse të tranzitit nga tubacionet e vjetëra, por sepse ato druhen se Kremlini dëshiron të zhvillojë tubacionin NS2 kryesisht për arsye politike dhe jo komerciale.
Duke folur në konferencën për energjinë në kryeqytetin belg, Nicole Gibson, zëvendës drejtoreshë e zyrës së Departamentit të Shtetit për Evropën, paralajmëroi se nëse kompanitë evropiane rifillojnë të vëndosin tubacionet nga fundi i vitit, ato rrezikojnë “sanksione të forta”.
Duke refuzuar të jepte detaje rreth sanksioneve kërcënuese, zonja Gibson tha se Uashingtoni nuk e pranon se “Nord Stream 2” është një marrëveshje tashmë e kryer. “Disa njerëz thonë se ajo është fakt i kryer” Ne nuk e shohim kështu. Ne u bëjmë thirrje udhëheqësve evropianë që të sigurohen që “Nord Stream 2 të mos realizohet”, tha ajo.
Udhëheqësi i Ukrainës Petro Poroshenko ka paralajmëruruar se NS2 do të lejonte Kremlinin që të mbyllte rubinetin e gazit për Ukrainën dhe Evropën Qendrore kur të dëshironte dhe të shantazhonte fqinjët më të afërt pa ndërprerë furnizimet për Evropën Perëndimore, duke ulur kështu kundërshtimin nga vendet më të fuqishme evropiane, por duke luajtur me shtetet më të dobëta.

Paralajmërimi i zyrtares së lartë amerikane vjen dy muaj pasi Richard Grenell, i dërguari amerikan në Gjermani, u dërgoi letra disa dhjetëra kompanive evropiane të energjisë dhe të ndërtimit, duke thënë se ato përballen me sanksione, nëse rifillojnë vendosjen e tubacioneve të betonuara të linjës NS2. Konstruksioni i linjës u pezullua në dhjetor si rezultat i motit të ashpër.
Kundërshtimi i Uashingtonit ndaj NS2 ka qënë i vazhdueshëm, edhe administrata e Presidentit Obama ishte kritike.
Kundërshtimi i Presidentit Donald Trump ka një prirje më të fortë, ndërsa zyrtarët shohin një kërcëmim politik që fshihet pas tubacionit të ri. Ata argumentojnë se NS2 do të minojë sigurinë evropiane, do të thellojë varësinë e Evropës Perëndimore ndaj energjisë ruse dhe do t’i japë Kremlinin një mundësi më të madhe për të përdorur burimet e gazit natyror për të ushtruar ndikim politik dhe shantazhuar qeveritë e Evropës Perëndimore.
NS2, që do të jetë nën pronësinë e gjigandit Gazprom të drejtuar nga Kremlini, do të dyfishojë kapacitetet e dërgimit të gazit në Gjermani, që është ekonomia më e fuqishme e Bashkimit Evropian.
Ndërtimi i rrjetit të tubacioneve do të kushtojë miliarda dollarë. Rusia është furnizuesi i më shumë se një të tretës së nevojave për gaz natyror në Evropë. Ndërsa shtohet kërkesa, furnizimi mund të shkojë në 50 përqind të nevojave gjatë dhjetë vjeçarit të ardhëshëm, parashikojnë ekspertë të industrisë energjitike.
Korrikun e kaluar gjatë një vizite në takimin e përvitshëm të NATO-s në Bruksel, Presidenti Trump shprehu zhgënjimin e tij me Kancelaren Angela Merkel lidhur me tubacionin e gazit Rusi-Gjermani, duke thënë: “Supozohet se ne do t’ju mbrojmë ju nga Rusia, por Gjermania po bën marrëveshje me Rusinë për gazin.”
Por zonja Merkel është përballur me presion nga bizneset gjermane, të cilat thonë se NS2 do të shkurtojë koston energjitike për vendin. Kancelarja gjermane duket se po e distancon veten nga një premtim që ajo bëri vitin e kaluar ndaj udhëheqësve të Evropës Qendrore, kur ajo pranoi për herë të parë shqetësimet gjeopolitike të aleatëve, duke thënë se NS2 do të vazhdojë, vetëm Ukraina do të ishte përsëri një vend tranzit i gazit rus.

Gjermania së bashku me vendet tranzite të linjës së gazit NS2, Finlandën, Suedinë, Danimarkën, argumentojë se tubacioni do të shtojë sigurinë energjitike për Evropën, duke menjanuar mundësinë e ndërprerjeve nga rruga e vjetër përmes vendit të paqëndrueshëm politikisht, Ukraina. Uashingtoni beson se tubacioni NS2 po ashtu është një përpjekje e Rusisë për të dëmtuar Ukrainën ekonomikisht, duke i hequr tarifën si vend tranzit i gazit.
Zyrtarët ukrainas përllogarisin se humbjet nga NS2 do të jenë të larta, duke kapur shifrën 2.5 miliardë dollarë në vit.
“Kur të përfundojë NS2 këtë vit, nuk do të ketë nevojë përdorimi i sistemit të tranzitit të gazit përmes Ukrainës” tha Yuriy Vitrenko drejtues i kompanisë Naftogaz të Ukrainës që zotërohet nga shteti, në konferencën për energjinë në Bruksel. “Ukraina do të humbasë afërsisht 4 përqind të prodhimit të brendshëm brudo”, shtoi ai.
Zyrtarët e Kremlinit thonë se Uashingtoni dëshiron ta ndalojë NS2, sepse gjigandët amerikanë të energjisë po shpresojnë të eksportojnë gaz natyror të tepërt në Evopë në formë të lëngëzuar. Zyrtarët amerikanë nuk e kanë mbajtur sekret shpresën që firmat energjitike amerikane të jenë në gjendje të përfitojnë nga ndalimi i gazësjellësit NS2, por thonë se kjo nuk është arsyeja kryesore për kundërshtimin ndaj tubacionit.
Alarmi i zyrtarëve amerikanë rreth NS2 ka patur mbështetjen edhe të zyrtarëve evropianë të sigurisë. Ish shefi i NATO-s Anders Fogh Rasmussen e ka cilësuar NS2 si “gabim gjeopolitik” për Bashkimin Evropian. Ai ka thënë ky veprim binte ndesh me sanksionet evropiane ndaj Moskës për aneksimin e Krimesë nga Rusia.

Zëvendës sekretari amerikan i Shtetit, David Hale, i tha të përditshmes serbe Danas, se nuk u takon Shteteve të Bashkuara që të “diktojnë përfundimin e bisedimeve ndërmjet Prishtinës dhe Beogradit”, për normalizimin e marrëdhënieve ndërmjet tyre.
Zoti Hale i cili do të qëndrojë më 8 dhe 9 mars në Beograd dhe në Prishtinë për të nxitur te dyja palët që të ulen në tryezën e bisedimeve, tha se “ka mundësi që gjatë këtj viti të arrihet një marrëveshje, nëse fillojnë bisedimet. Është koha që të marrin fund provokimet nga të dyja palët: të pezullohen tarifat, që Beogradi dhe Prishtina t’u kthehen bisedimeve të drejtuara nga Bashkimi Evropian dhe që të dyja palët të jenë të përcaktuara për paqe”.
Ai tha se Shtetet e Bashkuara nuk kanë një “recetë për zgjidhjen që duhet të jetë e zbatueshme dhe t’i kontribuojë qëndrueshmërisë afatgjatë të rajonit”.
Zoti Hale pritet që këto qëndrime t’i diskutojë në Beograd dhe në Prishtinë. Në një njoftim të departamentit amerikan të shtetit, thuhet se “në Beograd ai do të bisedojë me zyrtarët serbë marrëdhëniet dypalëshe dhe do të nxis kthimin në tryezën e bisedimeve për normalizimin e marrëdhënieve me Kosovën. Ai do të diskutoje edhe me drejtuesit e shoqërisë civile për çështje rajonale e globale, përfshirë ndikimin rus dhe kinez në Ballkanin Perëndimorë”.
Më pas më 9 mars në Prishtinë, ai do të takojë udhëheqësit e lartë të Kosovës “për të nënvizuar mundësinë historike për të arritur një marrëveshje të plotë të normalizimit të marrëdhënieve me Serbinë dhe për të kërkuar masa për të arritur një zgjidhje”.
Zoti Hale i cili më parë qëndron në Londër dhe në Ukrainë, është zyrtari më i lartë amerikan që kohët e fundit viziton Kosovën për të nxitur autoritetet që të hapin rrugën për vazhdimin e bisedimeve me Serbinë, të cilat janë pezulluar për shkak të kushtëzimit të tyre nga Beogradi me pezullimin e tarifave ndaj mallrave serbe, që u vendosën nga qeveria e Kosovës në nëntor të vitit të kaluar.
Javën që lamë pas, dy zyrtarë të lartë të Këshillit Kombëtar të Sigurisë, qëndruan për dy ditë në Kosovë për të siguruar pezullimin e tarifave ndërsa paralajmëruan shtimin masave ndëshkuese nëse Kosova vazhdon të refuzojë kërkesat e tilla.
Kërkesat amerikanë kanë nxitur përplasje të brendshme në Kosovë ndërmjet atyre që ngulin këmbë të dëgjohen këshillat amerikane dhe atyre që pohojnë se tarifat duhet të pezullohen vetëm me garanci për përfundimin e bisedimeve me Serbinë me njohje të ndërsjellë.