Ambasada e SHBA ndryshon qendrim në lidhje me protestën e së hënës së shkuar, duke dënuar edhe dhunën e ushtruar ndaj protestuesve, përfshirë këtu edhe deputetët e opozitës. Në qendrimin e parë të saj, ambasada nuk deklaroi se dënonte dhunën e ushtruar ndaj protestuesve, por citonte vetëm dënimin e protestës së dhunshme dhe hedhjen e tymuesve në sallën Kuvendit. Por pas një letre që deputetja Kejdi Mehmetaj, e dhunuar nga deputeti socialist, Bujar Çela i dërgoi ambasadorit Lu ku shprehte rezervat e qendrimit të Ambasadës në lidhje me qendrimin e saj ndaj protestës dhe dhunës ndaj protestuesve, Ambasada ka ndryshuar qendrim. Dje, Ambasada amerikane në Tiranë, përmes Zëdhënësit Ryan Roberts, thotë se dënon dhunën, pavarësisht nga vjen ajo. Ky reagim vjen pas letrës që deputetja e LSI-së, Kejdi Mehmetaj, i ka drejtuar ambasadorit Donald Lu, një ditë më parë. Zëdhënësi i kësaj ambasade rikonfirmoi se Ambasadori Lu e ka marrë letrën e saj dhe ka biseduar me deputeten, duke rishprehur edhe një herë qëndrimin se Ambasada dënon dhunën pavarësisht nga vjen. “Ambasadori Lu e mori dhe e lexoi letrën e Znj. Mehmetaj. Po ashtu, pati mundësinë të bisedonte me Znj. Mehmetaj dhe të shihte pamjet, të cilave ajo i referohet në letrën e saj. Ritheksojmë se Ambasada e SHBA dënon me forcë dhunën që ndodhi gjatë protestave. Theksojmë se dhuna, pavarësisht nga vjen, nuk ka vend në demokraci”, thuhet në reagim, raporton Ora News. Një ditë më parë deputetja e LSI i ka drejtuar një letër Ambasadorëve Lu dhe Vlahutin, përkatësisht diplomatë të SHBA dhe BE-së, në lidhje me reagimet e tyre pas protestës së opozitës para Kuvendit të Shqipërisë, ditën e zgjedhjes së Kryeprokurorit të përkohshëm. “Unë jam Kejdi Mehmetaj, deputete e Kuvendit të Republikës së Shqipërisë në mandatin tim të dytë. I lexova me shumë vëmendje deklaratat tuaja dhe po ashtu si Ju edhe unë e dënoj maksimalisht dhunën që u ushtrua ditën e djeshme në Parlament dhe në rrugë. Fatkeqësisht unë nuk e gjeta veten në deklaratat tuaja, përkundrazi u ndjeva e dhunuar edhe nga ju. Në të drejtën time, si deputete që me bindje kam votuar për ndryshimet kushtetuese të mesnatës së 21 korrikut në vitin 2016, ndjeva përgjegjësinë të protestoj dhe kundërshtoj që, Kushtetuta e vendit tim të cënohet nga një Kryeministër, i cili mendon se është i gjithëpushtetshëm dhe se ligjet e këtij vendi mund t’i shkelë me këmbë. Unë jam bërë deputete kur isha vetëm 20 vjeç dhe kauza ime ishte dhe është të luftoj për ëndrrat e bashkëmoshatarëve të mi, të cilët çdo ditë e më shumë po marrin rrugët e emigrimit. Ata po largohen nga Shqipëria, sepse shkollat i ka marrë peng qeveria, sepse vendi po varfërohet dhe punë për ta nuk ka, sepse detyrohen të kthehen në punonjës të plantacioneve të hashashit dhe si pagë të marrin kokainë, sepse policia nuk mbron qytetarët, por kriminelët, sepse urgjencat e spitaleve prishen rrugës si pasojë e konçesioneve korruptive në shëndetësi, sepse taksat tona Kryeministri i përdor për të pasuruar veten nëpërmjet tenderave dhe PPP-ve dhe sepse ish-ministri i Brendshëm, Saimir Tahiri edhe pse bashkëpunëtor i Habilajve është sot i lirë”, thuhet ndër të tjera në letrën që Mehmetaj i drejton dy ambasadorëve.

Kejdi Mehmetaj u procedua penalisht bashkë me 9 deputetë të tjerë të opozitës

Deputetja e LSI-së, Kejdi Mehmetaj, e cila së bashku me 9 deputetë të tjerë të opozitës u procedua penalisht pas tensioneve dje në Kuvend, u ka dërguar letër Ambasadorit amerikan Donald Lu, por edhe ambasadores së BE-së, Romana Vlahutin. Mehmetaj thotë se, nuk e ka gjetur veten në deklaratat e tyre dhe se është ndjerë e dhunuar edhe nga ata. Kejdi Mehmetaj u bën me dije dy ambasadorëve se ajo është dhunuar fizikisht dhe verbalisht nga deputeti Bujar Çela. Ajo shkruan se pas dhunës që është ushtruar ditën e djeshme në Parlament dhe jashtë tij, ndihet e dhunuar dyfish edhe nga deklaratat e tyre, pasi në asnjë moment nuk është përmendur ajo se çfarë ndodhi në të vërtetë. Mehmetaj i fton ambasadorët që në protestën e radhës të bëhen pjesë e saj nëse vërtet e duan Shqipërinë demokratike. “I lexova me shumë vëmendje deklaratat tuaja dhe po ashtu si Ju edhe unë e dënoj maksimalisht dhunën që u ushtrua ditën e djeshme në Parlament dhe në rrugë. Fatkeqësisht, unë nuk e gjeta veten në deklaratat tuaja, përkundrazi u ndjeva e dhunuar edhe nga ju. Në të drejtën time, si deputete që me bindje kam votuar për ndryshimet kushtetuese të mesnatës së 21 korrikut në vitin 2016, ndjeva përgjegjësinë të protestoj dhe kundërshtoj që Kushtetuta e vendit tim të cënohet nga një Kryeministër, i cili mendon se është i gjithëpushtetshëm dhe se ligjet e këtij vendi mund t’i shkelë me këmbë. Unë jam bërë deputete kur isha vetëm 20 vjeç dhe kauza ime ishte dhe është të luftoj për ëndrrat e bashkëmoshatarëve të mi, të cilët çdo ditë e më shumë po marrin rrugët e emigrimit”, shkruan Mehmetaj.

Pasiguria dhe kontrolli i dobët i kufijve në Shqipëri është kryefjala e shqetësimit të ngritur nga Bashkimi Europian në një raport të fundit të hartuar për lëvizjen e lirë të qytetarëve krahas shqetësimit serioz në lidhje me rritjen dramatike të kërkesave nga shqiptarët për azil drejt vendeve të BE shprehet shqetësimi për pasigurinë e pikave kufitare çka i ka hapur rrugë trafikut të drogës dhe qenieve njerëzore gjithashtu. Bashkimi Europian dhe Komisioni Europian i kanë listuar Shqipërisë një listë me tetë rekomandime në lidhje me kontrollin dhe sigurinë e kufijve ashtu si edhe zbatimin e marrëveshjes së lëvizjes së lirë. Në raport, Bashkimi Europian i kërkon qeverisë shqiptare të përmirësojë më tej efektivitetin e përpjekjeve të zbatimit të ligjit për të luftuar trafikimin drejt Kosovës të qenieve njerëzore, kontrabandimit të emigrantëve, trafikimit të drogës dhe krimit të organizuar ndaj pronës. BE i kërkon Shqipërisë të rriten hetimet dhe ndjekja penale e grupeve kriminale, veçanërisht atyre që merren me drogë trafikimit dhe kontrabandimit të emigrantëve. Në raport theksohet dosmosdoshmëria e vendosjes së një zyrtari ndërlidhës të Europolit, që do të kontribuojë më tej në një përmirësim bashkëpunimi në luftën kundër krimit të organizuar. Komisioni i Parlamentit Europian dhe Këshillit ka bërë dje publik raportin për lëvizjen e lirë të qytetarëve në zonën Shengen. Siç edhe konstatohet në pjesën për Shqipërinë, BE dhe PE-ja kanë kritika të shumta, sidomos për sigurinë e kufijve, por edhe të bandave kriminale shqiptare që veprojë në të gjithë Europën. Në raport thuhet se, Shqipëria duhet të rrisë sigurinë në kufijtë e saj. Edhe pse cilëson si të sigurtë pikën e kalimit kufitar të Rinasit, BE thotë se, kontrolli në pikat e tjera kufitare të vendit është i dobët. Një nga këshillat që jepet për Shqipërinë është edhe rikthimi i ‘intervistave në kufi’, me qëllim që qytetarët, të cilët nuk kanë një qëllim të caktuar për udhëtimin e tyre drejt BE-së të mos lejohen të kalojnë. Raporti flet edhe për azilantët shqiptarë. Sipas shifrave, në disa vende ka rënë numri i shqiptarëve, që kërkojnë azil, e në disa vende të tjera është rritur.

5900 kërkesa për azil në BE në tre muaj

5900 shqiptarë kanë aplikuar për herë të parë për azil në një nga shtetet e BE-së vetëm në muajt korrik-shtator 2017. Të dhënat i bën publike Eurostat. Me këtë shifër shqiptarët renditet ndër të parët në listën me azilkërkuesit më të shumtë, duke lënë pas vetëm vende ku aktualisht po zhvillohet luftë, ose vende të botës së tretë, si Siria e Eritrea. Numri i madh i kërkesave nga azilkërkuesit që tentojnë për herë të parë është bërë në Gjermani, Itali e Francë, nisur dhe nga politikat që këto shtete kanë ndjekur, duke pranuar kërkesa nga vende të pasigurta origjine siç është Siria. Numri i lartë i kërkesave për azil nga shqiptarët është bërë ndër shqetësimet kryesore të kohëve të fundit për shtete si Franca, Holanda e Luksemburgu. Të gjithë këto shtete e kanë shpallur Shqipërinë vend të sigurtë origjine, pra që në mënyrë direkte tregon se çdo kërkesë për azil nga shqiptarët do të refuzohet. E megjithatë, kjo nuk i ka ndaluar shqiptarët të aplikojnë për azil, nisur kryesisht nga gjendja e dobët ekonomike në atdhe.
Pak javë më parë, Franca dhe Holanda kanë shprehur idenë e rikthimit të regjimit të vizave për Shqipërinë, për shkak të numrit të lartë të azilkërkuesve shqiptarë.

Departamenti i Shtetit e ka futur zyrtarisht Shqipërinë në listën e vendeve kryesore të pastrimit të parave në botë. Sipas përcaktimeve ligjore, qeveria amerikane konsideron vend kryesor të pastrimit të parave një vend “institucionet financiare të të cilit janë të përfshira në transferta parash që përfshijnë sasi të ndjeshme të ardhurash që burojnë nga trafiku ndërkombëtar i drogës”. Ky vendim është bërë i njohur në Raportin e Departamentit amerikan të Shtetit për Kontrollin e Narkotikëve për vitin 2017. Raporti përgatitet çdo vit nga Departamenti i Shtetit për Kongresin e SHBA-ve dhe mbulon gjendjen dhe përpjekjet e vendeve të ndryshme të botës në luftën kundër drogës dhe pastrimit të parave. Raporti 2017, i cili mbulon si periudhë vitin 2016, thekson se Shqipëria është bazë e krimit të organizuar, pikë e rëndësishme e trafikut ndërkombëtar të drogës, vend ku pastrohen lehtë paratë dhe ku sundon korrupsioni i shfrenuar.

Dimitris Avramopulos, komisioneri për Migracionin, punët e brendshme, dhe qytetarinë në BE, deklaron se vendi ynë mbetet ende shteti që ka numrin më të madh të kërkesave të pabazuara për azil dhe se ky fenomen po shqetëson vendet anëtare të Bashkimit Europian
Sot ne raportojmë për funksionimin e regjimit të heqjes së vizave me vendet e Ballkanit, ashtu si dhe me vendet e partneritetit të Lindjes. Raporti i sotëm është vlerësimi i parë i plotë, që ne publikojmë pas hyrjes në fuqi të mekanizmit të ri të pezullimit të vizave. Bëhet fjalë për monitorimin e procesit të heqjes së vizave për 8 vendet që përfitojnë nga liberalizimi i vizave. Në raportin tonë ne bëjmë monitorimin e procesit, por nuk marrim vendime. Liberalizimi i vizave është një nga instrumentat më të fuqishëm të Bashkimit Europian, që lehtëson kontaktin direkt midis njerëzve dhe forcon lidhjet me qytetarët përtej kufijve të Bashkimit Europian. Ne jemi tërësisht të angazhuar për mbrojtjen e heqjes së vizave për qytetarët e Shqipërisë dhe qytetarët e tjerë të vendeve fqinje Lindore. Ne po punojmë së bashku me qeveritë për të arritur këtë objektiv. Dua të jem shumë i qartë: Ne nuk po propozojmë apo vendosim pezullimin e heqjes së vizave, por heqja e vizave shoqërohet me përgjegjësi si për qytetarët e Shqipërisë, ashtu dhe për autoritetet kompetente. Luftë kundër emigracionit të paligjshëm dhe kërkesave të azilit të pabazuara përbëjnë sfidën më të madhe për Shqipërinë në këtë kuadër. E mirëpres faktin që autoritetet shqiptare kanë qenë aktive në forcimin e masave për të luftuar kundër migracionit të paligjshëm dhe përmirësimin e bashkëpunimit me shtetet anëtare që janë më të prekura nga kjo çështje. Këto përpjekje duhet të shtohen, veçanërisht duke zbatuar më tej aksione bilaterale të aprovuara me shtetet anëtare, sensibilizimin e qytetarëve përmes fushatave të informimit për përgjegjësitë gjatë lëvizjes së lirë në zonën Shengen, përmirësimin e mbrojtjes së kufijve, por gjithashtu rritjen e hetimeve në luftën kundër trafikut të drogës, trafikut të qenieve njerëzore dhe forcimin e luftës kundër krimit të organizuar.
-A keni marrë njoftime nga shtete anëtare për problematikën e azilërkërkuesve shqiptarë? Ditët e fundit, ministri i Brendshëm francez vizitoi Shqipërinë dhe një nga çështjet kryesore që preku ishte ajo e azikërkuesve shqiptarë në Francë. Të njëjtën çështje e kanë ngritur më parë edhe autoritetet holandeze?
“Dua të jem shumë i qartë për këtë. Eshtë një çështje problematike. Ka disa shtete anëtare, prej të cilëve ju përmendët dy, që janë shumë të shqetësuara. Por isha shumë i gëzuar kur mësova, që bisedimet në Tiranë ishin shumë pozitive dhe të suksesshme. Besoj, se nuk do të ketë probleme në të ardhmen. Gjithsesi, autoritetet shqiptare duhen të bëjnë pjesën e tyre të punës. Duhet të jenë më të ashpër në zbatimin e angazhimeve që kanë marrë përsipër. Ne jemi të gjithë në favor të hapjes së rrugës për integrimin e Shqipërisë në familjen europiane, por, se edhe shtetet që janë anëtarësuar më parë duhet të kryenin detyrat e shtëpisë”.
-Dhe një nga detyrat e shtëpisë që përbën dhe një nga kriteret për hapjen e negociatave të anëtarësimit është lufta kundër krimit të organizuar. Ju u shprehët se duhen rritur hetimet në luftën kundër drogës. Çfarë nënkuptoni konkretisht me këtë, duke qenë se bëhet fjalë për një nga çështjet më të rëndësishme dhe të ndjeshme aktualisht?
Nëse përbën një nga shqetësimet kryesore në vend, kjo do të thotë që jemi në rrugën e duhur. Sepse kjo do të thotë që autoritetet dhe spektri politik e kanë marrë seriozisht në konsideratë këtë detyrim. Ju e dini që unë jam prej kohësh një mik i Shqipërisë. E dua Shqipërinë dhe e kam vizituar disa herë vendin. Roli im si komisioner është shumë i qartë, por si mik i Shqipërisë dua t’i jap një këshillë secilit. Shqipëria duhet destigmatizuar kryesisht me çështjet lidhur me krimin e organizuar dhe drogën. Shqipëria është një vend i madh me njerëz të mëdhenj. Vendi meriton një reputacion më të mirë dhe është shumë e padrejtë të flitet për të siç flitej për Kolumbinë në Shtetet e Bashkuara të Amerikës 20 vjet më parë. Këtë e them sinqerisht, sepse dua të ndihmoj. Shqiptarët janë njerëz që punojnë fort dhe kanë shumë iniciativë. Shqipëria ka kaluar periudha shumë të vështira dhe tani po ndërton bazat e një demokracie moderne. Vendi duhet të përmbushë detyrimet (acquis) apo ndryshe arritjet e deritanishme të BE-së, në emër të integrimit europian, por edhe në emër të shumicës së qytetarëve shqiptarë./abcnews.al

-Përmirësimi i kontrolleve kufitare, duke përfshirë “intervistat dalëse” në PKK, të kryera në një mënyrë që respekton plotësisht të drejtat themelore të udhëtarëve.
-Vazhdimi i zbatimit efektiv të marrëveshjes së ripranimit, nëse është e nevojshme sipas protokolleve të zbatimit me shtetet anëtare.
-Vazhdimi i zbatimit të veprimeve të dakorduara në mënyrë bilaterale me shtetet anëtare të BE-së për të reduktuar flukset e emigracionit të parregullt.
-Organizimi i një fushate të informimit të profilit të lartë mbi të drejtat dhe detyrimet e lëvizjes pa viza dhe zonat e destinacionit të udhëtimit.
-Ngritja e asistencës ndaj popullit në nevojë dhe të atyre që janë më të prirur për t’u larguar nga vendi në mënyrë të parregullt dhe duke ofruar mbështetje për riintegrimin e shqiptarëve të kthyer.
-Të përmirësojë më tej efektivitetin e përpjekjeve të zbatimit të ligjit për të luftuar trafikimin drejt Kosovës të qenieve njerëzore, kontrabandimit të emigrantëve, trafikimit të drogës dhe krimit të organizuar ndaj pronës.
-Të rriten hetimet dhe ndjekja penale e grupeve kriminale, veçanërisht atyre që merren me drogë trafikimit dhe kontrabandimit të emigrantëve.
-Vendosja e një zyrtari ndërlidhës të Europolit që do të kontribuojë më tej në një përmirësim bashkëpunimi në luftën kundër krimit të organizuar.