Ngjarja e 18 shtatorit në Elbasan, ku u godit makina e policisë nga një “Audi” i blinduar ka detyruar Prokurorinë të hapë edhe dosje të vjetra mbi bandat e qytetit. Një prej emrave më të lakuar është ai i Suel Çelës, djalit të biznesmenit Petrit Çela, që administron Tregun Agroushqimor të qytetit. Emri i tij ka qenë i njohur për Policinë e Elbasanit, pasi është i përfshirë në disa ngjarje kriminale, por që forcat e policisë ishin të pafuqishme për ta arrestuar për shkak të mbështetjes publike, që ka nga kreu i Bashksisë së Elbasanit, Qazim Sejdini dhe vetë kryeministri Rama.
Suel Çela me bandën e tij i kanë sigurar votat Sejdinit për t’u zgjedhur kryetar Bashkie nëpërmjet presionit dhe kërcënimeve me armë të votuesve. Dy vjet më parë, gjatë fushatës së zgjedhjeve lokale, Suel Çela me bandën e tij ushtruan terror me armë tek komuniteti rom që të votonin për Sejdinin. Suel Çela u akuzua me emër dhe mbiemër nga komuniteti rom i qytetit se i armatosur me disa persona të tjerë po kërcënonte qytetarët për të mbledhur vota për kandidatin e PS-së, Qazim Sejdini.
“Ishte Sueli që më kërcënoi. Ishte bashkë me të vëllain dhe ishin të armatosur me kallashnikov”, tha një nga dëshmitarët. Ai tregoi atëherë se në këtë zonë të tillë personat afrohen vetëm kur ka zgjedhje për të terrorizuar banorët dhe për t’i kërcënuar ata që nuk votojnë PS-në. Në atë kohë, kjo ngjarje u mohua nga deputeti i PS, Taulant Balla, që sipas të cilit, bëhej fjalë vetëm për një incident mes dy familjeve të varfëra pa prapavijë politike.

Ushtari i bandës së Suel Çelës ruante qytetin me kamera

Ushtari i bandës së Suel Çelës, Enea Bekteshi, kishte instaluar në qytetin e Cërrikut katër kamera sigurie, të cilat monitoronin të gjitha lëvizjet e Policisë dhe Forcave Speciale. 31-vjeçari dyshohet se drejtonte makinën e blinduar që goditi më 18 shtator makinën e Policisë në Elbasan. Sipas burimeve nga organi i akuzës, në gjendje pune kanë qenë katër kamera. E para ishte vendosur te rrethi i konviktit të qytezës, e dyta pranë Medresesë, e treta tek rrugica që të dërgon te banesa e kunatit të tij dhe e katërta ishte vendosur poshtë një pallati pesë katësh.
Serverat e këtyre kamerave u sekuestruan nga Policia e Elbasanit dhe u dërguan për veprime të mëtejshme pranë Prokurorisë së Krimeve të Rënda. Në këtë mënyrë, ai ruante lëvizjet e policisë dhe ishte gjithmonë i gatshëm të lëvizte në rast se pikaste një tentativë për të mësyrë në banesën ku fshihej.
Sipas burimeve, hetimet kanë zbuluar se, Bekteshi kishte lënë gjurmë gishtërinjsh te makina ‘Audi A8’ që goditi policinë. Pavarësisht këtyre provave, i prangosuri Bekteshi vijon të mos flasë gjatë marrjes në pyetje. Ai ka kërkuar më shumë kohë dhe procesin e marrjes në pyetje kërkon ta zhvillojë në prani të avokatit.
Emri i Enea Bekteshit ka qenë më herët i skeduar për disa ngjarje të rënda kriminale të ndodhura në qytetin e Elbasanit. Organi i akuzës së rrethit, kishte kërkuar që ai të mbahej nën mbikëqyrje nga forcat e operacioneve speciale, pasi kishte dyshime se ishte përfshirë në atentatin me antitank ndaj banesës së familjes Çapja. Kjo ngjarje e pazakonte ndodhi në fillim të gushtit të këtij viti, por fatmirësisht pa viktima. Sipas burimeve nga Prokuroria, 31-vjeçari Enea Bekteshi dyshohet se ka qenë në drejtim të automjetit të vjedhur në Durrës, tip BMW X3, që u dogj në periferi të qytetit të Elbasanit, pasi goditi me antitank ndërtesën e Çapjave. Për atë ngjarje u kërkua që të mbaheshin nën përgjim edhe dy persona të tjerë, por deri më tani nuk ka asnjë të arrestuar.

Parku Antik i Butrintit vazhdon të masakrohet me beton. Për këtë skandal ka patur një debat të ashpër edhe në mbledhjen e Këshillit Bashkiak të Sarandës, ku këshilltarët e djathtë kanë kërkuar spjegime se përse nuk ndërhyhet për të ndalur betonizimin në Parkun e Butrintit, por këshilltarët socialistë janë përgjigjur se, “ndërtimi në Park po bëhet me leje nga Ministria e Kulturës dhe nuk mund të ndalohet”. Këshilltarët e djathtë kanë kërkuar që të ngrihet një komision nga Këshilli Bashkiak për të ndaluar këtë masakër, por një kërkesë e tillë nuk është pranuar nga të majtët.
Pas reagimit të mediave për këtë skandal, Parku i Butrintit është rrethuar dhe nuk lejohet të futen as gazetarët dhe as qytetarë të thjeshtë. Në Park futen vetëm kamionët me beton dhe tulla. Sipas banorëve të zonës, në mes të Parkut po ndërtohet një lokal me pronar nga Tirana. Po ashtu është planifikuar që të ndërtohet edhe një lokal tjetër mbi shkallët e Amfiteatrit antik të Butrintit.
Objekti po ndërtohet në Akropolin e qytetit të lashtë të Butrintit, pranë Kullës Veneciane, e cila është më e larta në Butrint. Ditën e djeshme punëtorët kanë marrë urdhër për ta mbuluar me barriera jeshile vendin në mes të Parkut ku tashmë janë hedhur themelet e betonit të lokalit. Ndërtimi i lokalit po bëhet ngjitur me murin prehistorik që daton në shekullin 7-8 para Krishtit. Në këtë kantier nuk ka tabelë për punimet, ndërsa punëtorët nuk kanë frikë të flasin. As ata nuk e dinë se çfarë po ndërtohet. Punëtorët hedhin tulla e beton dhe kyçin gojën për çfarë po ndodh brenda mureve të lashta të Butrintit.
Një zyrtar nga Bashkia e Sarandës bëri të ditur se, lokali që po ndërtohet në Butrint është i një njeriu të afërt të kryeministrit Rama ndaj dhe e gjithë zona është rrethuar me policë dhe nuk lejohet askush të futet në Butrint. Pak ditë më parë, një qytetar nga Saranda i dërgoi një mesazh ish-Kryeministrit Berisha dhe fotot e ndërtimit të lokalit në mes të Parkut, duke shkruajtur se ndërtimi që po ngrihet është i Kryeministrit. Sipas UNESCO, brenda Parkut Arkeologjik nuk lejohet asnjë lloj ndërtimi, përveç punimeve për mirëmbajtje dhe restaurim. Ministria e Kulturës vazhdon të heshtë për dhënien e lejes së ndërtimit në Parkun e Butrintit.
Të gjitha qytetet, parqet apo zonat e shpallura si zonë e mbrojtur nga UNESKO në çdo vend të botës janë një aset i çmuar jo vetëm turistik, por edhe historik. Por ndryshe ndodh në Shqipëri me Parkun Antik të Butrintit. Edhe pse është e ndaluar çdo lloj ndërhyrje në ketë Park Arkeologjik i mbrojtur nga UNESCO, punëtorë ndërtimi po kryejnë punime, madje duke shtruar edhe beton.
E gjithë zona rreth qytetit antik të Butrintit në Jug të Shqipërisë është strehë e një sërë speciesh globalisht të rralla dhe ka një histori kulturore të pasur që justifikon njohjen e saj si të Trashëgimisë Botërore të UNESCO-s. Tashmë në këtë zonë jo vetëm që po rrezikohen speciet e rralla, por edhe vetë Parku i Butrintit. Me një leje të firmosur dhe vulosur nga Ministria e Kulturës, Parku i Butrintit po shkon drejt rrënimit. Të gjitha parqet apo zonat e shpallura si zonë e mbrojtur nga UNESKO në çdo vend të botës janë një aset i çmuar historik, por Ministria e Kulturës as që sdo t’ia dijë. Babëzia e pushtetarëve nuk njeh limit.

R.POLISI

Një 19-vjeçar është marrë peng nga një bandë në Fier para tre ditësh dhe është torturuar, ndërsa ngjarja është mbajtur e fshehtë nga policia. Denoncimi është bërë nga një qytetar nga Fieri, i cili i është drejtuar me një mesazh ish-Kryeministrit Berisha. Qytetari i shkruan Berishës se, banda ka lidhje me drejtorin e Policisë së Fierit, nëndrejtorin dhe kryetarin e Bashkisë, Armando Subashi. “Narko-bandat e Fierit të lidhura me pushtetin marrin peng dhe torturojnë 19-vjeçarin, ndërsa çunat e krimit me uniformë mbulojnë krimin! Lexoni mesazhin e qytetarit dixhital”, shkruan Berisha në një postim në Facebook.
“Zoti Berisha po denoncoj një ngjarje shumë herë më të rëndë nga ajo e Elbasanit. Në Fier, 3 ditë më parë është marrë peng një djalë i ri, 19 vjeç, është torturuar 24 orë nga një bandë kriminale me lidhje të drejtpërdrejta me drejtorin e Policisë Fier, nëndrejtorin dhe kryetarin e Bashkisë, Armando Subashi. Policia po mundohet të fshehë ngjarjen. Ju lutem verifikojeni. Djali është i shtruar në spital me inicialet F.L.
E kanë masakruar me thikë nga këmbët. Policia ju tha familjarëve; shkoni dhe e gjeni vetë se do jetë i fshehur. Mbas 30 minutave peng, pasi e kanë torturuar e kanë liruar të riun.

Në vendin më piktoresk të Grykës së Këlcyrës, atje ku rrjedhja e Vjosës bëhet fantastike, prej disa ditësh po hidhet beton. Megjithëse Bashkia e Këlcyrës pohon që nuk ka dhënë leje pronari i fabrikës që prodhon ujin Trebeshina, vazhdon punimet duke ndërtuar një kullë betoni që mbledh ujërat e ujëvarës dhe një urë që kalon mbi Vjosë për të çuar ujin në fabrikë.
Organet e rendit kanë mbetur të paralizuara, pasi siç thuhet në zonë, për këtë ndërtim, janë futur në sherr drejtuesit socialistë të pushtetit lokal me pronarin e firmës ndërtuese që pohon se ka marrë lejen nga kryeministri për këtë investim. Dhe situata është aq absurde sa askush nuk ndërhyn, ndërkohë që betoni shkatërron rrjedhën e Vjosës.
Ndërkohë, fshati Mursi në Sarandë, prej disa ditësh është në protestë për mbrojtjen e shkollës 9-vjeçare, e cila daton prej 176 vjetësh. Shkak u bë një njoftim që kjo shkollë, e cila është në territorin e Bashkisë Konispol do të mbyllet. Banorët kërkojnë ta ndalojnë këtë akt si e vetmja mundësi për të parandaluar analfabetizmin ne fshat. Komuniteti i Mursisë, fajëson bashkinë Konipol se favorizon ndërtimin e një shkolle në një fshat tjetër dhe mbylljen qëllimisht të shkollës së Mursisë. Por Kryetari i bashkisë Konispol, Shuaip Beqiri u tha atyre se do ndikojë që shkolla të mos mbyllet. Ky fshat ngelet ndër më të populluarit në jug të Shqipërisë e favorizuar kjo nga industria e agrumeve dhe bujqësisë.

Gjykata e Durrësit ka dhënë dje masën e sigurisë “burg” për Mariel Fierzën, të njohur si besnikun e Lul Berishës, ish-kreut të bandës së njohur kriminale dhe ka urdhëruar masën “detyrim paraqitjeje” për mikun e tij Genti Ndërjakun. Fierza dhe Ndërjaku janë të dy me precedentë penalë të mëparshëm. Ata u arrestuan të martën gjatë operacionit të koduar “Vjeshtë 2017” dhe në mjetin me të cilin udhëtonin iu gjetën dy armë zjarri. Marjel Fierza në dëshminë e tij para Gjykatës ka thënë se armën e kishte gjetur rastësisht dhe ishte nisur për ta dorëzuar në polici. “E gjeta tek disa depozita uji dhe do e dorëzoja në polici, por më kapi policia, kur isha nisur ta dorëzoja”, ka thënë ai.
I arrestuari tjetër, Genti Ndërjaku ishte i pajisur me një armë pistoletë me leje të drejtorit të Përgjitshshëm të Policisë, Haki Çako.
Marjel Fierza njihet për lidhjet me kreun e bandës së Durrësit, Lulzim Berisha, ndërsa një raport i Ministrisë së Brendshme e cilëson atë si “ushtar” të këtij të fundit. “Po drekonim te lokali në “Vollga”. Kur po dilnim, gjeta në parkim pistoletën. E mora dhe u nisëm që ta dorëzoja në komisariatin e policisë. Por policia na ndaloi dhe gjatë kontrollit më gjeti këtë armën që unë e kisha gjetur dhe do shkoja ta dorëzoja. Dhe më arrestuan”, tha ai.
Prokurori tha se, në kohën e ndalimit, ai kishte tentuar të hidhte nga dritarja e makinës çantën, ku kishte futur pistoletën. Ndërsa Genti Ndrëjaku, e kishte me leje armën e dytë që u gjet në makinë, ndaj u la në detyrim paraqitje.
Një raport i Ministrisë së Brendshme, i publikuar në prill të vitit 2016 tregon se, një nga të arrestuarit në Durrës, 30-vjeçari Marjel Fierza është “ushtar” i Lul Berishës, njeriu që e drejtoi për 10 vjet me radhë “Bandën e Durrësit” mes vrasjesh, trafiqesh drogës dhe armëve.
Raporti fliste për bashkim të Berishës me Emiljano Shullazin. Në të jepeshin të dhëna se, aktiviteti i dy kapobandave ishte ai i gjobitjes së disa personave, biznesmenë të njohur në fushën e basteve sportive, tregtisë së kafesë dhe tregtisë së naftës.
Dokumenti sekret saktësonte se Lul Berisha e drejtonte bandën e tij nga burgu dhe i delegonte urdhërat tek njerëz të besuar si Julian Meçaj e Marjel Fierza, Mond Çekiçi, e Plarent Dervishaj, për të cilin në prill të 2015 Apeli i Krimeve të Rënda i ka pushuar të gjitha akuzat.

Banorët e Himarës janë hedhur në protestë sërish ditën e djeshme për pronat e tyre, të cilat do të preken nga plani urbanistik. Qindra banorë kanë pritur me revoltë ministrat Damjan Gjiknuri dhe Mirela Kumbaro, të cilët kanë shkuar për të zhvilluar një takim me ta. Emrat e banorëve pjesëmarrës në këtë takim janë të përcaktuar në një listë, dhe askush që nuk preket nga ky projekt nuk do të jetë i pranishëm. Shmangia nga dëgjesa publike i ka revoltuar banorët, të cilët kanë kërkuar të jenë prezentë. Si pasojë e revoltës së banorëve në vendin e takimit kanë shkuar forca të shumta policie.
Takimi i dy ministrave të Ramës me përfaqësinë e banorëve ka nisur me vonesë për shkak të tensionit të krijuar nga forcat e policisë dhe banorëve. Nën masa të rrepta sigurie, dy ministrat e qeverisë dhe banorët e Himarës qëndruan për orë të tëra në takim, por nuk kanë arritur të bien dakord. Por as dëgjesa e dytë me banorët e Himarës për planin urbanistik nuk u finalizua me një marrëveshje.
Ministri Gjiknuri pas takimit tha se, qeveria do të çojë përpara projektin dhe se do të dëmshpërblehen banorët në bazë të ligjeve shqiptare. Por banorët vetë e kundërshtuan atë, duke thënë se duan të gjithë të pajisen me çertifikatë pronësie. Ndërsa banorët janë shprehur të revoltuar se do t’i mbrojnë me gjak pronat e tyre. “Nuk do lemë asnjë të vazhdojë rrugën, do derdhim gjak atje. Atje do të rrimë ditë e natë. Nuk do lejojmë asnjë, nuk e duam projektin”, u shpreh një nga banorët.
“Objektet janë përfshirë të gjitha në skemën e shpronësimit. Nga ana tjetër, ka persona që kanë pretendimin lidhur me trojet ku kalon projekti. Ne kemi marrë angazhimin për të sjellë një grup që do të bëjë matjet e duhura, identifikimin dhe për të ndihmuar që këta njerëz të marrin çertifikatat, kur i takojnë në përputhje me ligjin. Qeveria është e vendosur që projekti të vazhdojë, por të gjithë banorët do të kompensohen sipas ligjit”, u shpreh ministri Gjiknuri.
Por banorët e zonës kanë kundërshtuar me forcë, duke deklaruar se nuk janë dëmshpërblyer. “Mua në 500 metra nuk më ka mbetur 1 metër, m’i ka marrë për rrugë, m’i ka marrë për çdo gjë dhe nuk jam shpronësuar”, u shpreh një banor. “Ne kërkuam diçka, që të na njohin si pronarë”, tha një banor tjetër i Himarës.
“Konstatuam dy gjëra që asnjë nga banorët nuk ishte dakord me projektin dhe të gjithë duan çertifikatat e pronësisë. Të gjithë banorët që folën dhe që preken nga projekti janë himariotë autoktonë, janë me kombësi dhe shtetësi greke, pikërisht këtu ndodh edhe diskriminimi etnik dhe fetar”, u shpreh përfaqësuesi i OMONIA-s. Projekti i planit urbanistik përfshin 22 banesa që duhet të prishen, por banorët e kanë kundërshtuar me tensione gjatë punimeve.

Ish-ministri i Drejtësisë, Ylli Manjani do të thirret si dëshmitar në procesin gjyqësor ndaj ish-drejtorit të Përgjithshëm të Burgjeve, Artur Zoto në Gjykatën për Krimet e Rënda. Ish-zyrtari i lartë i burgjeve po gjykohet për akuzën e “korrupsionit pasiv” në një nga procedurat e tenderimit për furnizimin me ushqimet të institucioneve në varësi të tij.
Përveç ish-ministrit, në seancën e së premtes, Gjykata ka pranuar kërkesën e avokatëve, për thirrjen si dëshmitar në proces të ish-zv/drejtorit të Burgjeve, Iliaz Labi, i pandehur në një proces tjetër tek Krimet, si edhe të ish-zv/drejtorit Bledar Skënderi.
Vetë i pandehuri Zoto ka lexuar një qëndrim para trupit gjykues, në thelb të të cilit ka qenë mohimi i akuzës së ngritur ndaj tij. “Jam i pafajshëm”, është shprehur ai.
Në seancën e radhës, e caktuar në 18 tetor, pritet të niset me pyetjen e dëshmitarit Labi, aktualisht në “arrest shtëpiak” për llogari të një gjykimi ku akuzohet për “korrupsion”.
Prokuroria për Krimet e Rënda pretendon se, Artur Zoto ka konsumuar elementë të veprës penale të “korrupsionit pasiv të funksionarëve të lartë shtetërorë ose të të zgjedhurve vendore”, kryer në bashkëpunim. Ish-zyrtari ka mbajtur qëndrim mohues duke pretenduar se Prokuroria është bazuar në deklarimet e ish-vartësit të tij, Iliaz Labi, i cili e ka akuzuar për të shmangur përgjegjësinë penale nga vetja.

Gjykata e Krimeve të Rënda ka vendosur të marrë dëshminë e 7 qytetarë holandezë për vrasjen e trefishtë të dy viteve më parë në Bulevardin “Zogu i Parë”. Ngjarja ka ndodhur me 27 maj 2015. Të akuzuarit janë dy shqiptarë dhe një italian. Konkretisht vëllezërit Markeljan dhe Klevi Doçi, si edhe italiani Salvatore Letizia, të cilët akuzohen nga Prokuroria për Krime të Rënda se kanë kryer veprime aktive në konfliktin e armatosur, ku mbetën të vdekur shtetasit Mentor Lufi (Doçi), Gerti Goxhaj dhe Besnik Sulku.
Gjatë seancës së të premtes tek Krimet e Rënda, të pandehurit Klejvi e Markelian nuk pranuan të pyeten para gjykatës, duke lejuar administrimin e deklarimeve të dhëna në fazën e hetimit.
Në përgjigjet e tij para prokurorëve, në dhjetor të vitit të kaluar, Klejvi Doçi përjashtonte veten nga masakra, duke u vetëkonsideruar si dëshmitar i pjesshëm në ngjarje.
Ai mohonte kategorikisht të kishte lidhje me vrasjen e Durim Sulkut në Holandë. “Unë i pata thënë xhaxhait tim Mentor Lufi, që nëse procedohej, do ta merrja unë përsipër vrasjen e Durim Sulkut në Holandë. Ditën e arrestimit nuk e dija që xhaxhai kishte vdekur”, kishte pohuar ai. I pandehuri tjetër Markelian Doçi mbante qëndrim pohues për vrasjen e Sulkut në bulevard.
Në lidhje me vrasjen në Holandë, ai pretendoi se do të shprehet në një moment të mëvonshëm.
Në seancën e radhës së procesit, Gjykata do të thërrasë si dëshmitarë në proces shtatë shtetas holandezë. Ata do të pyeten në lidhje me vrasjen e Durim Suklut në një parking mjetesh në Roterdam. Çdo seancë e këtij procesi gjyqësor ndiqet nga Gjysere Sulku, nëna e dy të vrarëve Besnik e Durim Sulku. Ajo shpreson në dënimin e të pandehurve.
Në masakrën e majit 2015, përveç Mentor Lufit u vra edhe Gerti Goxhaj dhe atentatori Besnik Sulku. I pandehur në të njëjtin proces është edhe Salvatore Leticia, i dyshuar si anëtar i “CAMORRA”-s.
E pranishme në seancën gjyqësore, e ëma e dy vëllezërve të vrarë Sulku apeloi për drejtësi. “Drejtësia të japë dënimin maksimal për autorët. E vështirë t’i shoh vrasësit e djemve në Gjykatë. Drejtësia mos korruptohet e t’i dënojë autorët. Nuk e di çdo bëj nëse drejtësia s’dënon autorët”, u shpreh Gysleren Sulku.
Nga hetimet e Prokurorisë për Krime të Rënda është arritur në përfundimin se ngjarja e ndodhur në muajin maj 2015 në Tiranë është vijim i një konflikti të nisur më parë po në kryeqytet, në dhjetor 2014 dhe që ka vazhduar në Holandë, në prill 2015 e më tej është shoqëruar me ngjarjen për të cilën akuzohen tre të pandehurit.

Një person në Peqin ka mbetur i plagosur rëndë, pasi është goditur disa herë me thikë. Burime zyrtare nga policia bëjnë me dije se i plagosur ka mbetur E.Sh., ndërsa në kërkim është shpallur K.C., 41 vjeç. Ndaj 41-vjeçarit, banues në Peqin, specialistët për Krimet e Rënda në Drejtorinë Vendore të Policisë Elbasan bënë referimin e materialeve në Prokurori dhe po punojnë për kapjen e tij.
K.C., në Lagjen “Xhami”, gjatë një konflikti për motive të dobëta dyshohet të ketë goditur disa herë me thikë shtetasin 61-vjeçarin banues në Peqin, shtojnë të njëjtat burime. E.Sh., pasi mori ndihmën e parë mjekësore në Spitalin Kirurgjik Elbasan, u dërgua për mjekim më të specializuar në Tiranë. Materialet për rastin i kaluan Prokurorisë së Rrethit Gjyqësor Elbasan për veprime të mëtejshme për veprën penale “Vrasja me dashje e mbetur në tentativë” dhe “Prodhimi dhe mbajtja pa leje e armëve të ftohta”.