Gjatë një eventi të datës 6 tetor në Shtëpinë e Bardhë ku festohej Muaji i Trashëgimisë Hispanike, Presidenti Donald Trump tha se administrata e tij është duke punuar për prosperitet dhe liri dhe qëndron në krah të popullit të Kubës dhe Venezuelës kundër sistemeve autoritare të komunizmit dhe socializmit.
“E njëjta ideologji e dështuar që ka sjellë shtypje në Kubë, nuk ka sjellë gjë tjetër veçse vuajtje dhe mjerim kudo, në çdo vend të botës ku ka ekzistuar ndonjëherë”, tha Trump. “Komunizmi është e shkuara, liria është e ardhmja”, vazhdoi ai i ndjekur me duartrokitje dhe brohoritje nga turma.
Regjimet komuniste kanë vrarë mbi 100 milionë njerëz gjatë shekullit të kaluar, sipas “Librit të zi të komunizmit” të publikuar nga Universiteti i Harvardit në vitin 1999. Të tjerë vlerësojnë se numri i viktimave të komunizmit afrohet më shumë me 150 milionët.
Aleksandr Solzhenitsyn, nivelist dhe historian i mirënjohur rus, ka vlerësuar se ish-diktatori komunist, Joseph Stalin ka vrarë mbi 60 milionë njerëz dhe në librin “Mao: Historia e Panjohur” historianët June Chang dhe Jon Halliday tregojnë se, Partia Komuniste kineze me liderin e Mao Zedong është përgjegjëse për vrasjen e 70 milionë njerëzve.
Ideologjia shtypëse e komunizmit bazohet në ateizëm dhe luftë. Funksionon duke shkatërruar traditën dhe besimin, duke i kthyer njerëzit kundër njëri-tjetrit dhe duke fabrikuar armiq me të cilët njerëzit të përballen. Trump tha se: “Jemi duke punuar çdo ditë për të siguruar një të ardhme të sigurt paqeje, prosperiteti dhe sovraniteti për çdo amerikan dhe shpresojmë për një të ardhme në liri dhe prosperitet për të gjithë hemisferën perëndimore. Për këtë arsye, administrata ime ka marrë vendimin deçiziv për të qëndruar në krah të popullit të mirë të Kubës dhe Venezuelës”.
Ai theksoi se, siç kishte deklaruar më parë në Havanën e vogël në fillim të vitit, asnjë sanksion nuk do t’i hiqet regjimit të Kubës derisa të ofrojë lirinë politike për popullin e Kubës. Trump denoncoi gjithashtu ideologjinë autoritare të socializmit. “Ne qëndrojmë edhe përkrah popullit të Venezuelës që vuajnë nga socializmi i pamëshirshëm i regjimit të Maduros. Ne e kundërshtojmë shtypjen socialiste dhe kërkojmë rivendosjen e demokracisë dhe lirisë për qytetarët e Venezuelës”, tha ai.
Shkrimtari komunist, Karl Marx i referohej komunizmit si një nënndarje të socializmit dhe ish-lideri sovjetik Vladimir Lenin i referohej si një “monopol i shtetit kapitalist”. Adolf Hitleri ka përdorur një tjetër formë socializmi, “socializmin nacional” dhe platforma me 25 pika e partisë së tij naziste i përngjan shumë politikave të regjimeve socialiste të ditëve të sotme.
Në një fjalim të vitit 1927, Hitleri deklaroi: “Ne jemi socialistë. Ne jemi armiq të sistemit kapitalist të shfrytëzimit”. Regjimi i socializmit nacionalist të Hitlerit ka vrarë rreth 11 milionë njerëz dhe kjo shifër nuk përfshin ata që janë vrarë në luftë.
Trump theksoi se administrata e tij qëndron kundër regjimeve autoritare të komunizmit dhe socializmit gjithashtu. “Shumë amerikanë hispanikë e kuptojmë personalisht përse është kaq e rëndësishme për ne që të mbrojmë vendin tonë dhe lirinë që na ka dhënë Zoti bashkë me rregullin e ligjit”.
“Përkushtimi ynë për këto vlera ka qenë burimi i prosperitetit amerikan, themeli i sigurisë tonë dhe këto vlera na kanë bërë vendin pararojë të botës”.
Trump: Jo, shtypjes socialiste do të rivendosim demokracinë
Basha: Rama kompromisin e ka me krimin, me opozitën ka vetëm përballje
Kryetari i PD, Lulzim Basha i drejtoi një mesazh të prerë Edi Ramës dje, ndërsa deklaroi se me Partinë Demokratike, ai dhe qeveria që ai drejton do të ketë vetëm përballje dhe asnjë kompromis. Basha tha se tashmë është e qartë, të vetmin kompromis që Rama ka dhe që me të cilin po qeveris edhe vendin është krimi i organizuar. Deklaratat, Basha i bëri pas mbledhjes së Grupit parlamentar demokrat, ndërsa paralajmëroi forcimin e qëndresës opozitare në Parlament.
“Mbledhja sot ka zgjatur, pasi kemi marrë disa vendime sa i përket qendrimeve të Grupit parlamentar të Partisë Demokratike në seancë plenare dhe në aktivitetin parlamentar, kjo në vijim të ngjarjes të shëmtuar të javës së kaluar, dhe të dy javëve më parë, ku Edi Rama përmes Gramoz Ruçit u mundua të dhunojë rregulloren, duke i mbyllur gojën opozitës. Kjo nuk ka për t’u pranuar kurrë dhe nuk do të ndodhë. E kundërta do të ndodhë; ne do të intensifikojmë aktivitetin tonë parlamentar, duke rikthyer një praktikë konform rregullores që është praktika e pyetjeve, seancës së pyetjeve për të vendosur Edi Ramën dhe ministrat e tij para përgjegjësisë, diçka prej të cilës po mundohet të largohet çdo ditë, duke dalë një ditë si bahçevan, një ditë si kopshtar. Tani paska hapur edhe Pallatin e Brigadave, pallatin mbretëror. Këtej rrit taksat, këtej më shumë bar për qytetarët. Sigurisht që, nuk është as bahçevan, as kopshtar është përgjegjësi për një Shqipëri të fundosur nga krimi; të vetmit vend që nuk i hapen negociatat, ndërkohë që Serbia dhe Mali i Zi ecin përpara.
Në këto kushte, ta harrojë që me opozitën dhe me Partinë Demokratike do të ketë diçka tjetër përveç përballjes totale. Ai e ka zgjedhur kompromisin, kompromisin e ka me krimin e organizuar, e ka me sejdinët jo vetëm në Elbasan, por anembanë Shqipërisë, me sejdinët e krimit. Dhe në këtë rreshtim është e qartë Edi Rama ka vënë Partinë Socialiste dhe qeverinë në funksion të aleancës me krimin. Ne jemi në funksion të aleancave të vlerave me qytetarët shqiptarë e kjo do të shpaloset në çdo aspekt të përballjes parlamentare”, tha Basha në një prononcim për mediat pas mbledhjes së Grupit demokrat.
Basha bëri të ditur se Reforma Zgjedhore do të jetë kryefjala e kësaj jave. Basha tha se rivendosja e institucionit të zgjedhjeve, ku në qeveri vjen ajo forcë që votohet me vullnet të lirë, vendi nuk do të mund të çlirohet dot kurrë nga keqqeverisja, korrupsioni, oligarkia etj.
“Theksi këtë javë mbetet tek zgjedhjet e lira dhe të ndershme. Duket si një përsëritje, por në fakt pa “rivendosur institucionin e zgjedhjeve, shqiptarët kurrë nuk do të kenë një qeveri që të mendojë për ta, por do mendojnë për ata që i sollën në pushtet. Edi Ramën e sollën në pushtet bandat, e solli në pushtet krimi, e sollën në pushtet droga dhe paratë e drogës. Dhe ky është haraçi që paguan çdo shqiptar nga mëngjesi deri në darkë sot, qoftë sa i përket përkeqësimit të qeverisjes, rritjes së taksave, mungesës totale të shërbimeve nga shëndetësia tek arsimi, qoftë përsa i përket gjendjes së përgjithshme ekonomike të vendit, të cilat nuk janë gjë tjetër. veçse efektet e një qeverie që bashkëqeveris me krimin dhe që është robe, i një kryeministri, që është rob i marrëdhënies korruptive me oligarkët. Në Shqipëri ka një paradoks, një grusht njerëzish pasurohen dhe vazhdojnë të pasurohen edhe në këtë moment që flasim, ndërkohë që shumica e shqiptarëve duan të largohen nga ky vend.
Dhe themeli i kësaj të keqeje është një qeveri që nuk i njeh zgjedhjet. Pa rregulluar këtë themel, asgjë tjetër nuk do të shkojë mirë në vendin tonë të dashur që është Shqipëria”.
Kriza e call center, fillon të rritet numri i të rinjve të papunë
Të rinjtë e papunë, nga mosha 15-29 vjeç shënuan rritje për herë të parë pas gati dy vitesh në tremujorin e dytë të vitit 2017, duke reflektuar ngadalësimin e aktivitetit të call center.
Sipas të dhënave zyrtare nga INSTAT, numri i të papunëve të moshës 15-29 vjeç në tremujorin e dytë 2017 ishte rreth 78.4 mijë (78,419), me një rritje prej gati 1% në krahasim me tremujorin e mëparshëm. Kjo është hera e parë që nga tremujori i katërt 2015, kur konstatohet rritje e numrit të të rinjve të papunë.
Tendenca e numrit të të rinjve të papunë ka qenë e kundërt me totalin, ku për popullsinë 15 vjeç e lart, të papunët në total ranë me gati 1%, duke arritur në 191.5 mijë. Ndërsa popullsia mbi 30 vjeç rezulton se e ka pasur më të lehtë të gjejë një punë, statistikat e fundit të INSTAT tregojnë, se të rinjtë që mbarojnë shkollën po hasin në vështirësi që të sigurojnë vetë jetesën.
Kjo tendencë është në linjë me fillimin e rënies së kompanive call center, që deri tani kishin qenë burimi kryesor i punësimit të të rinjve, përfshirë edhe studentët, që ishin të tërhequr nga pagesat e larta dhe oraret fleksibël.
Të dhënat e mëparshme të INSTAT për prodhimin e brendshëm bruto, po për tremujorin e dytë 2017, konfirmuan se “Grupi i Aktiviteteve profesionale dhe Shërbime Administrative u shfaq me një rënie prej 2,31%, i ndikuar kryesisht nga rënia në aktivitetin e Call Center”. Është hera e parë që ky sektor raporton rënie, pas rritjes së vrullshme vitet e kaluara, duke reflektuar goditjen që qeveria italiane i dha sektorit në Shqipëri, në një përpjekje për të ndaluar eksodin e punës drejt Shqipërisë. Në Itali, në datën 1 prill 2017, hyri në fuqi ligji “Për delokalizimin” e call center, i cili shtrëngoi rregullat për zhvendosjen e aktivitetit nga Italia drejt shteteve joanëtare të BE-së. I miratuar në dhjetor të vitit të kaluar, ligjit iu la një periudhë tranzitore për të hyrë në fuqi me qëllim që kompanitë të njiheshin me rregullat e reja, zbatimin e standardeve, raportimin e numrit të punonjësve, adresave të selive, mbrojtjes së të dhënave etj.
Në total, në sektor në Shqipëri ka rreth 800 kompani, me rreth 25 mijë të punësuar, sipas të dhënave zyrtare. Pas goditjes nga qeveria italiane, shumë kompani call center kanë mbijetuar, pasi po diversifikojnë aktivitetin e tyre, duke u kthyer në ndërmjetës financiarë, çka do t’u japë mundësinë atyre të ndërmjetësojnë për investimin e parave të shqiptarëve në aktivitete me risk si veprimet me kurset e këmbimit apo të ashtuquajturat Binary option’ (Një opsion binar është një opsion financiar, ku pagesa është ose një sasi e caktuar monetare ose asgjë).
Shumë kompani call center tashmë kanë parësor aktivitetin në Forex, ku operatorët marrin në telefon qytetarët italianë, (por shumë shpejt edhe shqiptarët) dhe përpiqen t’i bindin të investojnë në platforma online tregtimi apo në aktivitetet e kursit të këmbimit. Një pjesë e kompanive të vogla të mbyllura i kanë transferuar punonjësit në sipërmarrje të tilla.
Teksa një aktivitet i tillë mbart spekulime të larta mbetet e paqartë se, për sa kohë do të vijojnë të mbijetojnë call center-at e kthyera në kambiste.
Monitor
Rama me zv.ministra biznesmenë, sepse edhe qeveria është biznes që paguhet nga shqiptarët
Pjesa më e madhe dolën të shastisur nga mbledhja, një pakicë fare e vogël që njihnin dikë në atë listë, dolën të llahtarisur. “Plusi” (+) nuk ka lidhje me PS, madje nuk janë as rreshti i “specialistëve në fushat e tyre” që Edi pretendoi kur u lexoi emrat.
Por edhe PS nuk është kërkund.
Me përjashtim të Petro Koçit të rikthyer, dhe një djali që donte të bëhej kryetar i FRESSH, në atë rresht të gjatë 33 njerëz, nuk ka asnjë socialist, as nga ata pink, as nga ata violë, madje as nga ata rosë të dalë boje. Por lajmi nuk është ky.
Lajm është që atë rresht, e ka mbushur gruaja, pasi ka ikur prej aty burri apo burri, pasi ka ikur nga aty gruaja, çuni i mamit, madje edhe çuni i mamit dhe dhëndri i babit, ceo shitjesh, sipërmarrëse shëndeti familjarisht, “çunat e Fullanit”, “gocat e Çilit” dhe shumë, po shumë fare “no name”, ekzakt në profesionin e tyre. Ky është problemi.
Ndërkohë që gjithkush priste “shkurtim të qeverisë”, siç ishte premtuar xhanëm dhe, ekselencë, zëvendësit e Edit nuk janë kërkushi në fushat ku u thirren sot të kontribuojnë.
Duke nisur nga Ministria e Jashtme, ku Artemisa Dralo, një mësuese province nuk ka asnjë lidhje me diplomacinë e është aty për t’u thënë grekëve se, ne e kemi një të tillë. Etjen Xhafaj është shoku i Lalit dhe Kleopatra Maliqi, jo vetëm që nuk është eksperte e fushës, por është aty pasi burri, domethënë Redi Shtino-zëvendësministër i Arsimit deri tani, del nga qeveria për t’i bërë vend gruas.
Në Ministrinë e Brendshme, Julian Hodaj zëvendëson mamin e bëhet pjesë si dhëndri i babit, ndërkohë që Romina Kuko, sot sekretare në një zyrë për sigurinë në OSCE.
Në Ministrinë e Financave dhe Ekonomisë, ku Albana Shkurta le me dhimbje rolin e drejtores së Gimes se Red Bull-it për t’i dhënë një zyrë në qeveri, në fushën ku ai ka interesat-sistemin fiskal, ndërkohë që Elton Haxhi po le pa fjalë prej mesditës këdo që e njeh në bllok për engledisjet nëpër parukeri ku shtrin flokët çdo mëngjes para se të vërë mbi to një borselino.
Në Ministrinë e Energjëtikës dhe Infrastrukturës, ku Artan Shkreli-tmerri i fondeve publike, është aty fill pasi doli gruaja pa lënë asnjë gjurmë, ndërkohë që Hantin Bonati është i mbijetuari i madh qysh nga Bashkia e Edit, për t’u marrë më pas me një punë që e ndriti në Kryeministri, ujin e pishëm që thuajse mungon kudo.
Në Ministrinë e Shëndetësisë dhe Çështjeve Sociale, ku Mira Rakaçolli-mjeke, gruaja e shefit të Sanatoriumit, por edhe sipërmarrëse në biznesin e shëndetit, konflikt dramatik interesi, do të përfaqësojë e vetme mjekët, ndërkohë që një mësuese në gjimnaz, pastaj drejtoreshë shërbimesh sociale në Lezhë, do të mbulojë pikërisht çështjet madhore që lidhen me të pamundurit e Shqipërisë.
Në Ministrinë e Bujqësisë, ku Dhimo Kote është thirrur të lërë biznesin e tij dhe të fshatarëve po të tij me mandarinat e klementinat për të mbuluar padijen e ministrit në këtë lëmë, ndërsa Roland Kristo, rikthehet të merret me peshkun dhe midhjen me shpresë se do të bëjë ndonjë gjë më shumë se çdo herë që ka qenë në atë ministri, domethënë gjithë jetën.
Në Ministrinë Turizmit dhe Mjedisit, ku Ornela Çuçi, administratorja e bizneseve të Henri Cilit, do të merret me një prioritet, të bindë njerëzit e zakonshëm se, importi i disa mbetjeve lëndë e parë për industrinë e riciklimit është në frymën liberale, jo komuniste dhe nuk bën dëm.
Në Ministrinë e Arsimit dhe Sportit, ku Ervin Demo është huazuar këtë sezon të mbrojë e reformojë arsimin publik, tamam aty ku bashkë me Dhorin e tij bënë bizneset e tyre sa plasën, ndërsa Nine Shkurti, o zot çfarë figure, thuajse binjak me Fullanin, do jetë partneri me serioz i presidentëve që menaxhojnë sportin e rrënuar shqiptar, duke filluar me Armando Dukën.
Në Ministrinë e Drejtësise, ku Teuta Godo është thirrur nga Brukseli të bëjë drejtësinë, ndërkohë që Toni Gogu, truri juridik i Fullanit të parë, do jetë garant si pastor për etikën e qeverisë Rama 2.
Tani, a e mbani mend kolonën zanore të këngës së famshme “Janinës ç’i panë sytë”?
Taksë biznesit të vogël në Rajon kur kalon 66 mijë euro xhiro, këtu kur kalon 2 mijë euro
Nëse do të miratohet plani i qeverisë për të hequr fare kufirin ku bizneset fillojnë e paguajnë TVSH, duke e çuar në zero, Shqipëria do të ishte ndër të paktat vende në Europë, që nuk do të kishte incentivë për bizneset mikro dhe të voga, që në fakt janë zemra e ekonomisë vendase me mbi 40% të të punësuarve.
Shqipëria aktualisht ka një nivel të ngjashëm pragu me Bashkimin Europian për aplikimin e Tatimit mbi Vlerën e Shtuar tek bizneset.
Në vendin tonë, një biznes përfshihet në pagesën e TVSH kur realizon një xhiro vjetore mbi 5 milionë lekësh ose 36 mijë eurosh në vit, por me ndryshimet e shpallura nga Rama, kjo xhiro do të ulej në 2 milionë në vit. Të dhënat e Komisionit Europian tregojnë se, mesatarja e xhiros vjetore për aplikimin e TVSH-së në vendet e BE është 25- 35 mijë euro, por me ndryshime të dukshme ndërmjet vendeve. Italia taton me TVSH bizneset me qarkullimin vjetor mbi 25-50 mijë euro, ndërsa Bullgaria aplikon një kufi prej 25 mijë eurosh.
Edhe në Rajon ka një nivel të ngjashëm qarkullimi vjetor që tatohet me TVSH. Kroacia e ka pragun e tatimit me TVSH 30 mijë euro, sipas të dhënave të vitit 2017 të azhurnuara nga KE. Bosnja e aplikon TVSH në bizneset që qarkullojnë më shumë se 25 mijë euro në vit. Ndërsa shihet se pragun më të lartë e ka Serbia, e cila e nis të vjelë TVSH në bizneset që kanë xhiron vjetore mbi 66 mijë euro. Në Maqedoni, kufiri i përfshirjes në TVSH aktualisht është 15 mijë euro. Maqedonia e uli pragun në vitin 2015, teksa para këtij viti pragu ishte 30 mijë euro. Në Mal të Zi, pragu është 18 mijë euro. Në Bosnjë, kufiri është 25 mijë euro.
Nga shtetet e BE-së, vetëm Spanja dhe Holanda nuk kanë kufi të regjistrimit në TVSH. Një tjetër shtet që e ka aplikuar këtë praktikë është Turqia, që e ndërmori këtë lëvizje pas një reforme gati 10-vjeçare në sistemin e administrimit fiskal.
Dy janë arsyet kryesore se pse qeveritë vendosin kufij për pagimin e TVSH-së, sipas teorive ekonomike. Së pari, kjo është një nxitje për biznesin e vogël, që nga ana e tij është i rëndësishëm për gjenerimin e punësimit, duke qenë se, biznesi i vogël në ditët e sotme po krijon pjesën më të madhe të vendeve të punës në botë. Në Shqipëri, sipas të dhënave të INSTAT, mikrondërmarrjet (me 1 deri në 9 punonjës) krijojnë 42% të vendeve të punës, ndërsa pesha që ato kanë në shitje neto është vetëm 24% e totalit.
Argumenti i dytë lidhet me vështirësitë në kontrollin dhe kontabilizimin e pjesës së fundit të zinxhirit të shitjeve, teksa pjesa e fundit e zinxhirit bie pre më lehtë e abuzimit, keqpërdorimit dhe korrupsionit, si dhe kërkon përqendrim të lartë burimesh njerëzore, që nuk është eficient, duke pasur parasysh nivelin e të ardhurave që mblidhen. Kjo çon në një rezultante futja e bizneseve pa kufi në TVSH më tepër dëmton sesa krijon të ardhura.
Ministri i Financave, Arben Ahmetaj, deklaroi së fundmi se TVSH do të shtrihet deri tek bizneset me qarkullim nga zero, por theksoi se kjo nuk ka rritje të kostos. “Ka rritje të kostos për ata që punojnë në informalitet. Për ata që janë formalë kjo ska kosto”, tha ministri.
Schäuble paralajmëron krizën e re
Shefi i Financave gjermane që është në prag të largimit nga ky post ka deklaruar se politikat e Bankës Qendrore rrezikojnë të formojnë “flluska të reja” dhe se nivelet spirale të borxhit global dhe likuiditeti paraqesin një rrezik madhor për ekonominë botërore.
Në një intervistë të dhënë për “Financial Times”, eurofili, i cili ka drejtuar një nga ekonomitë më të mëdha të botës gjatë këtyre tetë viteve të fundit, tha se ekzistonte rreziku i formimit të “flluskave të reja” për shkak të triliona dollarëve që bankat qendrore kanë hedhur në tregje. Z. Schäuble paralajmëroi gjithashtu për rreziqet që i kanoseshin stabilitetit në eurozonë, veçanërisht ato të paraqitura në bilancet bankare pas krizës së kredive me probleme.
Ai do të mbahet mend si një avokat i fortë i drejtësisë fiskale dhe kryesisht si politikanit më pro-europian në kabinetin e kancelares gjermane Angela Merkel, shumë i aftë në shitjen e përfitimeve të euros dhe të integrimit më të thellë europian në një publik skeptik gjerman. Ai u shpreh për FT se, votimi i Brexit vitin e kaluar kishte treguar se sa “budallallëk’” ishte të dëgjonin “demagogët që thonë. . . ne po paguajmë shumë për Europën”. “Në këtë drejtim, ata dhanë një kontribut të madh për integrimin europian, edhe pse në një afat të shkurtër që nuk e ndihmon vërtet Britaninë”.
Z. Schäuble do të zhvendoset në një detyrë të re, në atë të kryetarit të Bundestagut gjerman në mes të shqetësimeve në lidhje me legjislaturën e re, e cila do të ndikohet nga ardhja e 92 deputetëve nga partia “Alternativa për Gjermaninë” një parti populiste e djathtë që tronditi krijimin politik, duke fituar 12.6 për qind në zgjedhjet gjatë muajit të kaluar.
Z. Schäuble, i cili do të marrë pjesë në takimin e tij të fundit të ministrave të Financave të eurogrupit këtë të hënë, kërkoi të risigurojë aleatët e Gjermanisë se suksesi i habitshëm i Aleancës për Gjermaninë nuk do të ndikonte aspak në angazhimin e vendit ndaj demokracisë liberale. Nuk ka asnjë mundësi, që Gjermania të përkeqësoshet akoma më shumë.
Reagimi i votuesve të partisë Alternativa për Gjermaninë, vjen pasi ata ishin të pakënaqur, ndiheshin të përjashtuar, dhe ishin të zemëruar për padrejtësinë e perceptuar dhe të shqetësuar për mënyrën se si bota po ndryshonte. “Por nuk ka asnjë arsye për të besuar se demokracia dhe sundimi i ligjit janë në rrezik”, tha zoti Schäuble.
Megjithatë, ai paralajmëroi se bota rrezikohej nga “inkurajimi i krijimit të flluskave të reja”. “Ekonomistët në mbarë botën janë të shqetësuar për rreziqet në rritje që vijnë nga akumulimi gjithnjë e më shumë likuditeteve dhe rritja e borxhit publik dhe privat. Unë vetë jam i shqetësuar edhe për këtë, vazhdoi ai më tej. Komentet e tij vijnë një ditë, pasi Christine Lagarde, drejtuesja e Fondit Monetar Ndërkombëtar, tha se bota po shijonte kulmin e saj më të mirë që nga fillimi i kësaj dekade, por paralajmëroi për “kërcënimet e mundshme” nga nivelet e larta të borxhit dhe marrjen e rreziqeve të shumta në tregjet financiare.
Pikëpamjet e zotit Schäuble janë gjithashtu në sintoni me ato të Bankës për Rregullimet Ndërkombëtare, e cila ka argumentuar gjatë se, lehtësimi agresiv i parasë nga bankat qendrore ka nxitur në krijimin e flluskave në çmimet e aseteve. Banka e Rregullimeve Ndërkombëtare paralajmëroi muajin e kaluar, se bota ishte mësur aq shumë me përdorimin e kredive të lira saqë normat më të larta të interesit mund të pengonin rimëkëmbjen e ekonomisë globale. Zoti Schäuble mbrojti masat shtrënguese, duke përshkruar sipas një mënyre anglo-saksone se një politikë e qëndrueshme financiare, nuk i shikon më defiçitet e larta si një gjë e mirë.
Ai tha se, bumi ekonomik i tanishëm i Gjermanisë, me rritjen e kërkesës së brendshme dhe investimeve dhe shkallën më të ulët të papunësisë që nga ribashkimi, ishte justifikim i një politike ekonomike, që i dha përparësi “zbatimit të rregullave të caktuar” gjithashtu edhe duke shmangur deficitet. Nën administrimin e tij vendi ka drejtuar buxhetet e balancuara që nga viti 2014. “Britania e Madhe gjithmonë e ka tallur kapitalizmin e Rhinelandit”, tha ai, duke kundërshtuar modelin e tregut social të drejtuar nga konsensusi gjerman, me tregjet e lira anglo-amerikane dhe derregullimin.
Por ne kemi parë se mjetet e ekonomisë së tregjeve sociale ishin më efektive në trajtimin e krizës financiare… sesa në vendet ku ajo u rrit. Zoti Schäuble vlerësoi “iniciativat e fuqishme” të Emmanuel Macron për rishikimin e BE-së, pa iu referuar në mënyrë të drejtpërdrejtë propozimeve të presidentit francez për reformën e eurozonës.
Ai tha vetëm se, detyra kryesore në të cilën përballet zona e përbashkët e monedhës është që “të zvogëlojë rreziqet, të cilat janë akoma shumë të larta. Ne duhet të sigurohemi se do të jemi mjaftueshëm elastik nëse do të përballemi ndonjëherë me një krizë të re ekonomike, shtoi ai. “Ne nuk do të kemi gjithmonë një situatë kaq pozitive sa tani”.
(Monitor)
Çi lipset Skënderbeu Edi Ramës?
Fatmir GUDA
Është bërë fakt vendimi i qeverisë për ta shpallur 2018-ën, vitin e Skënderbeut. Madje rrugës ju sajua dhe termi “mbarëkombëtar”, për t’i dhënë nismës atë që kryeministri e ka më shumë kompleks, sesa ndjesi.
Teksa rrekem të gjej motivet që mund ta kenë shtyrë Edi Ramën të bëjë një propozim të tillë, më vjen nëpërmend se pikë reference ndaj Skënderbeut kanë marrë kohë më parë edhe rilindasit shqiptarë. Natyrisht që ata të vërtetët, rilindasit me pushkë dhe me penë për mëmëdhenë, të cilët në fillimshekullin e kaluar pikërisht për të ngjallur ndjenjën kombëtare në veprat e tyre vunë në epiqendër heroin kombëtar të shqiptarëve Gjergj Kastrioti Skënderbeun. Evokimi i figurës së Skënderbeut pas një sundimi 500-vjeçar të otomanëve bëhej për të rritur frymën kombëtare ndër shqiptarë, për t’u pararendur kryengritjeve anë e mbanë trevave shqiptare, që u finalizuan me aktin e pavarësisë më 1912. Pas këtyre vijave le të themi paralele, lind apriori pyetja: Këta “rilindasit” e Edi Ramës në fakt po u referohen metodave të rilindjes kombëtare për rindërgjegjësimin e ndjeshmërisë patriotike apo thjesht politikisht po aplikojnë një taktikë të njohur, sipas të cilës nën strehën e pseudopatriotizmit duhet strukur maskarallëku i ditës?
Të gjithë preçedentët mbi të cilat qeveris Edi Rama të shtyjnë drejt së dytës. Pra, identifikimi sistematikisht i kryeministrit, si përgjegjësi kryesor në vend për gjendjen mizerabël ku gjendet ndjeshmëria e patriotizmit për shkak të mbizotërimit të fenomeneve më negative politiko-socialo-ekonomike, sigurisht që ja rrëzojnë kredencialet Edi Ramës, i cili drejtpërdrejt është edhe anunçuesi i kësaj nisme. Që të ketë një vit kalendarik ku aktivitetet të fokusohen rreth figurës së heroit tonë kombëtar, kjo është padyshim pozitive. Madje edhe sikur ta zgjasnin në kohë, gjatë të katër viteve të mandatit qeverisës së “rilindjes”, absolutisht nuk do ishte gjë e keqe. Sepse në fund të fundit, Skënderbeu me dimensionet përtej kombëtare ka shërbyer në të gjitha kohërat si institucioni kryesor në Shqipëri, pikë reference për cilindo shqiptar, që i është dashur të shpalosë krenarinë kombëtare.
Sikundër çdo tentativë për të abuzuar duke krijuar një patriotizëm të remë apo fasadë prej emrit të Gjergj Kastriotit, nuk do t’i ngjiste kujdo, qoftë ky dhe profilit të parit të qeverisë, i cili gjithsesi, më shumë do të shihej si përfitues prej figurës së heroit kombëtar, sesa si evokues i lavdisë që Skënderbeu përfaqëson.
Ndërsa nisma për shpalljen e vitit 2017 ka marrë trajtën institucionale të një VKM-je, pikëpyetjet e publikut mbi motivet e saj do mbesin qartësisht pa përgjigje, ashtu siç ndërgjegjja kombëtare ka gjasa të mbetet një ndjesi, që s’do të mundet dot të kapërcejë prapambetjen social-ekonomike ku ndodhen shqiptarët, të cilët edhe në optikën ndërkombëtare nuk gëzojnë ato konsiderata që më kot po tentohen t’u vishen me zor. Dmth, njëlloj si fasadat e pallateve, që bojatisen vetëm në pjesë ballore për të kuruar imazhin e shëmtuar të tyre, pa u marrë aspak me problemin që mund të ketë pallati në brendësi të vet, pritet të ndodhë, që të tregohet kujdesi deri në detaj për t’u shkaktuar mjaftueshmërisht zhurrmë, aq sa dhe do mund të arrihet deri aty, sa me doza njëtrajtësisht të barabarta, të glorifikohet njëlloj prijësi legjendar Gjergj Kastrioti me liderin “global” Edi Rama. Kësaj këmbane ka nisur t’i bjerë vetëm disa muaj më parë deputetja e “rilindjes” Elisa Spiropali, e cila pa u menduar dy herë se do merrte riskun e shndërrimit në një person qesharak do ta etiketonte Edi Ramën si Skënderbeun që do ta integronte Shqipërinë në BE.
Megjithatë për t’i vënë kapak vendimit si aspak i konsultuar në mënyrë kolegjiale, i cili mban ekskluzivisht ideimin dhe vulën personale të kryeministrit, është e pamundur të shmaget paqartësia e opinionit mbarë shqiptar, fillim mbarim të këtij eventi: “Edi Ramës për ç’i lipset Skënderbeu”?
Hajdutë, larg duart nga Shtypshkronja “Demokracia”!
Mafia e ndërtimit ka zgjatur duart ditët e fundit tek një objekt që për vite ka qenë simbol i shtypit të printuar në Shqipëri. Bëhet fjalë për Shtypshkronjën “Demokracia”. Kjo është shtypshkronja e parë e shtypit të lirë në Shqipëri, e cila është një donacion i qeverisë amerikane në majin e vitit 1992 kryesisht për gazetën “RD” dhe tre gazeta të tjera të vogla të asaj kohe, që sot janë jashtë tregut. Investimi amerikan kapte shifrën e 1 milion dollarëve në atë kohë dhe përfshinte koston e shtypshkronjës dhe të truallit.
Shtypshkronja ndodhet pranë rrugës “Jordan Misja” dhe shtrihet në një zonë që kohët e fundit është bërë mjaft e frekuentuar për ndërtuesit për shkak të shtrirjes së Bulevardit të Tiranës deri në zonën e Paskuqanit. Prej kohësh ndaj shtypshkronjës janë ndërrmarë sulme duke e dëmtuar atë. Qëllimi ka qenë që të nxjerrin jashtë funksionit të plotë makineritë e shtypshkronjës dhuratë e qeverisë amerikane. Ky ka qenë hapi i parë i mafies së ndërtimit. Prej javësh, kjo shtypshkronjë ka rënë pre e gjuetisë së këtyre banditëve që kanë koperturë politike. Muret janë dëmtuar dhe po ashtu edhe shtypshkronja.
Qëllimi për ta përfituar shtypshkronjën në mënyrë të njëanshme nga një bandë me koperturë politike vlon në fakt prej kohësh. Pjesë e këtij plani ka qenë edhe plani për ta falimentuar atë kohë më parë. Autorët kanë pasur si qëllim që të ndjekin strategjinë e tokës së djegur, duke shkatërruar gjithçka dhe më pas ta përvetësojnë për të ndërtuar mbi atë truall. Ditët e fudit janë vënë në lëvizje disa individë që kërkojnë ta përvetësojnë në mënyrë të paligjshme.
Gazeta “RD” e cila është pjesë e pronësisë së kësaj shtypshkronje me të gjitha dokumentat nuk do të lejojë këtë mafia të ndërtimit të tjetërsojë këtë pronë që është një investim amerikan dhe që për kontributin në kohën që ka pasur duhet të ishte kthyer në një monument të lirisë së shtypit.
“RD” paralajmëron këta hajdutë që ditën shesin moral politik dhe natën zhvasin pasuritë, ku “RD” është pjesë se do të ndërmarrë të gjitha hapat ligjorë dhe denoncimet publike dhe penale ndaj tyre. Nuk mund të lejojë kurrsesi që këta grabitqarë politikë dhe minj të tjetërsimit të pronave në hipoteka të livadhisin me Shtypshkronjën “Demokracia”. Eshtë koha të kuptojnë se “RD” ka përfaqësuesit e vet ligjorë dhe se loja me mafien e ndërtimit do t’i diskretitojë akoma më shumë përpara opinionit publik.
“RD” do të ndërmarrë po ashtu hapa ligjorë për të kuptuar kushdo se përse ata që e kanë administruar deri tani në mënyrë të njëanshme këtë objekt e kanë degraduar në këtë pikë dhe do të vihen para drejtësisë.
Askush nuk do të mund të shpëtojë nga kjo katrahurë që kanë ndërmarrë disa individë me këtë investim amerikan prej 1 milion dollarësh. Do të denoncohet e gjithë skema e tyre, si e ushtarëve ashtu edhe e ustallarëve që qëndrojnë pas tyre. Mjaft keni abuzuar. Ka ardhur koha të mbani përgjegjësi për atë që keni bërë dhe më tepër akoma për atë që po kërkoni të bëni.
“RD”
SHBA kërkon arrestimin e “peshqve të mëdhenj”
Ambasadori amerikan ka kërkuar sërish arrestimin e peshqve të mëdhenj të krimit dhe të drogës në një koment në rrjetet sociale. “Të lumtë, Skënder Minxhozi! Të gjithë nxitojnë ta shohin këtë betejë si kundër PS-së apo PD-së. Ne amerikanët, duam veprime vendimtare kundër peshqve të mëdhenj të krimit. Ne duam që të gjithë shqiptarët të ndalojnë grindjen dhe të fillojnë punën drejt një synimi të përbashkët: këta gangster të futen në burg. Mjaft u zutë dhe futjuni punës”, shkruan ambasadori Donald Lu.
Pak ditë më parë ambasadori amerikan, tha se në Shqipëri janë disa familje mafioze, të cilat komandohen nga 4 klane kriminale.
“Katër klane kryesore kontrollojnë 20 familje kriminale që menaxhojnë operacione kriminale ku përfshihet trafiku njerëzor, shantazhi, vjedhja e makinave dhe pastrimi i parave. Janë disa emra të famshëm kriminelësh shqiptarë si trafikanti i drogës, Emiljano Shullazi për të cilin media pretendon se vazhdon të bëjë trafik nga qelia e paraburgimit, apo Lul Berisha, kreu i bandës së Durrësit që gabimisht u lirua herët nga zyrtarë të burgut, kjo çoi në arrestimin e drejtorit dhe avokatit po në mënyrë të mistershme është i lirë. Së fundmi, Klement Balili, trafikant droge i kërkuar nga Greqia dhe DEA e SHBA po që ka dalë t’i shpëtojë drejtësisë shqiptare për 18 muaj falë paaftësisë së prokurorëve, policisë dhe Ministrisë së Drejtësisë. Ka dhe shumë shullazë, Lul Berisha dhe Klement Balilë të tjerë në Shqipëri”, tha Lu.
Duke shtuar se ka një duzinë trafikantësh të lirë, ambasadori parashikoi një luftë të egër.
“Është me rëndësi kritike që policët, prokurorët dhe shërbimet inteligjente të punojnë më ngushtë për të luftuar krimin e organizuar. Me gjasë do jetë luftë e egër, në vitin 2014 pati 72 bomba në makinë, shumica besohet se ishin rezultat i dhunës mafioze”, u shpreh ambasadori i SHBA.
Kryesore
Continue to the category
