Nëpunësit publikë, kryesisht zyrtarët e lartë të shtetit kanë shkaktuar të paktën 534 milionë euro dëme ndaj buxhetit në 2 vite e gjysmë. Shifra, e cila është sa 5.3 për qind e Prodhimit Kombëtar është bërë publike nga Kontrolli i Lartë i Shtetit në raportin e sapopublikuar për vitin 2016. Sipas raportit, gjatë vitit të kaluar enti më i lartë auditues i shtetit ka ushtruar 154 kontrolle të plota në institucione apo kompanitë publike. Por edhe pse kontrollet janë kryer vitin e kaluar, shkeljet e zbuluara në to i përkasin periudhës nga 1 janari i vitit 2013 deri në shtator të 2016-ës. Sipas KLSH, nga totali i dëmeve të zbuluara 346 milionë euro janë shkelje të disiplinës financiare me pasoja negative në buxhetet e institucioneve të audituara, ndërsa pjesa tjetër prej 188 milionë euro janë parregullsi në të ardhurat apo shpenzimet e kryera. Brenda këtij zëri shkeljet më të mëdha i përkasin privatizimit dhe dhënies me qira të pronës publike me rreth 110 milionë euro, si dhe abuzimeve në tendera dhe prokurime me rreth 25 milionë euro. Kontrolli i Lartë i Shtetit deklaron se për këto shkelje ka kallëzuar penalisht 191 zyrtarë. Sipas raportit, pjesa më e madhe e tyre tashmë janë nën hetim nga Prokuroria dhe paralelisht është kërkuar masë administrative nga gjoba deri në largim nga puna për 1515 punonjës të sektorit publik. Në prill të vitit 2015, KLSH në raportin drejtuar Kuvendit konstatonte se abuzimet në Dogana dhe Tatime ishin rritur rreth 14 herë më shumë, krahasuar me një vit më parë. Sipas këtij raporti 123 milionë euro ishte shuma e abuzimit nga këta sektorë ose rreth 13 për qind të totalit prej 1 miliard euro të dëmit që iu shkaktua shtetit për vitin që shkoi nga qeverisja e rilindjes. Mbetet për t’u parë këtë vit sa do të jetë dëmi total, por trendi i shifrave është në rritje. “Për vitin 2015, një dëm të konsiderueshëm kemi konstatuar në sektorin e Tatimeve dhe Doganave në rreth 13% të dëmit total të konstatuar, kundrejt 10% të dëmit të konstatuar në këtë sektor për vitin 2014 dhe 3% të konstatuar në vitin 2013. Po të analizojmë në vlerë trendin në rritje të dëmit në sektorin e Tatimeve dhe Doganave do të vërejmë një rritje me 14 herë krahasuar me shifrën e dëmit të konstatuar në vitin 2014”, raporton KLSH. Kështu nga 1,220,319 mijë lekë të vitit 2014 konstatimet në këtë sektor kanë arritur në 16,854,733 mijë lekë në vitin 2015. Për vitin 2015, kemi rritje të konsiderueshme të vlerës së dëmit të konstatuar në fushën e prokurimeve publike krahasuar me vitin 2014. Gjithashtu, rritje ka pësuar edhe dëmi në prokurime arriti në 2,621,594 mijë lekë, krahasuar me 678,118 mijë lekë të konstatuar për vitin 2014 me një rritje 3.8 herë. Por KLSH referon se, për vitin 2015 pjesa më e madhe e dëmit vjen kryesisht nga fusha e menaxhimit të pasurisë shtetërore, ku rezulton se është konstatuar rreth 84% e dëmit total në sektorin e energjisë e sektorin e hidrokarbureve.
BERZH: Pengesa për të bërë biznes në Shqipëri
Banka Europiane për Rindërtim dhe Zhvillim ka realizuar një vrojtim me vendet e Ballkantit Perëndimor për performancën dhe pengesat në bërjen e biznesit. Në Shqipëri, pengesat më të mëdha lidhen me konkurrencën e pandershme, kostot energjetike, aksesin ndaj financës apo edhe administrimi i taksave. Në anketim kanë marrë pjesë 1,800 pronarë dhe menaxherë sipërmarrjesh në Shqipëri, Bosnje–Hercegovinë, Maqedoni, Kosovë, Mal i Zi dhe Serbi. Nga analiza rezultoi se në rajon vihet re një nivel i lartë i konkurrencës së pandershme nga sektori informal, por gjithashtu renditen edhe faktorë të tjerë. Sidoqoftë efekti është i ndryshëm nga sektori në sektorë, nga orientimi i tregut, nga përvoja menaxheriale, lloji i pronësisë etj.Në analizë janë marrë 15 barriera.
Konkurrenca nga sektori informal
Kjo është veçanërisht më e dëmshme në Maqedoni, ku 26% e sipërmarrjeve e kanë renditur si pengesën më të madhe, të ndjekur nga Kosova (23.3%) dhe Shqipëria 16.8%. Raporti, thekson se që nga momenti kur ka nisur vrojtimi qeveria shqiptare ka ndërmarrë një fushatë të madhe kundër informalitetit.
Aksesi ndaj financës
Është gjithashtu një nga barrierat që shqetëson sipërmarrjet ballkanase, duke qenë 12.7%. Shumë biznese kanë raportuar se ata kanë nevojë për kredi, por iu është refuzuar. Interesat e kredive kanë shënuar rënie. Megjithatë ky ka qenë një problem më pak shqetësues se në vitet e tjera.
Stabiliteti politik
Ky është një problem, i cili theksohet si i rëndë veçanërisht nga sipërmarrjet në Bosnje–Hercegovinë (30.2%), e ndjekur nga Serbia (26.7%).
Niveli i taksave
Rreth 11.9% e të anketuarve në vendet e Ballkanit Perëndimor e kanë cilësuar si problem. Bizneset malazeze e kanë cilësuar si një problem të madh, ndoshta për shkak të nivelit të lartë të TVSH-së nga 17-19%.
Korrupsioni
Sistemi i korrupsionit është një tjetër problem i vazhdueshëm për Ballkanin Perëndimor. Megjithatë është vënë re se disa vende kanë bërë progres në luftën ndaj këtij fenomeni. Përjashtim bën vetëm Kosova, e cila është në “fazat e para” të luftës kundër korrupsionit.
Projekti 1 miliard euro apo “lavatriçja” 1 miliard euro
Sa herë që afrojnë zgjedhjet, fillojnë dhe premtimet elektorale! Gjatë fushatës së vitit 2013 Partia Socialiste premtoi se do të ulte taksat dhe do të mendonte për popullin, deri diku të mërzitur me qeverisjen e atëhershme. Taksa këto që nuk u ulën asnjëherë vetëm u ngritën, kurse ato pak premtime për investimet nuk u përmenden më dhe ngelën në letër.
Pas zgjedhjeve rritmin më të madh e mori mbjellja e kanabisit, si mënyra më e shpejtë e pasurimit, si dhe PPP-të, një mënyrë tjetër e të pasuruarit të militantëve të partisë në kurriz të popullit. Në lidhje me këto kanë folur dhe organizmat ndërkombëtare që po dëmtojnë ekonominë dhe rrisin dhe borxhin e shtetit që është një barrë më shumë për taksapaguesit shqiptarë, të cilëve në ndryshim nga premtimet elektorale për ulje taksash po i rritin dita-ditës.
Por t’i kalojmë dhe këto dhe të vijmë tek projekti 1 miliard euro i premtuar pak ditë më parë nga Kryeministri se çfarë në të vërtetë është ai. Bandat dhe mafia qeveritare duket që janë fuqizuar së tepërmi dhe problemin më të madh sot ato e kanë se si të pastrojnë këto lekë që kanë siguruar në rrugë të paligjshme. Zgjidhja këtë herë është e mirëmenduar si një premtim elektoral, ku biznesi do të hedhë këto lekët e pakontrolluara në treg, pra do i investojë ato, qeveria do ja pastrojë zyrtarisht ato dhe populli shqiptar përmes taksave të tij do të vazhdojë për 10-15 vitet e ardhshme t’i paguajë ato. Fundja po ua lëmë ju lexuesve ta vlerësojnë, a kemi të bëjmë me projektin 1 miliard euro në të mirë të Shqipërisë apo “lavatriçen” 1 miliard euro pranë mafias qeveritare.
syri.net
Mustafa fton investitorët e huaj të investojnë në Kosovë
Kryeministri i Republikës së Kosovës, Isa Mustafa, në kuadër të pjesëmarrjes në Forumin e Bashkëpunimit Ekonomik ndërmjet Kosovës dhe Italisë zhvilloi takime me përfaqësues të institucioneve italiane. Ai u takua edhe me nënsekretarin për Tregtinë Ndërkombëtare dhe Tërheqjen e Investimeve në Ministrinë e Zhvillimit Ekonomik, Ivan Scalfarotto, me drejtorin e Përgjithshëm të Agjencisë për Promovimin e Jashtëm dhe Ndërkombëtar të Ndërmarrjeve italiane, Piergiorgio Borgogelli.
Një takim të veçantë, kryeministri Mustafa i shoqëruar nga kryetari i Pejës, Gazmend Muhaxheri, e ka zhvilluar edhe me ministren regjionale të Trentos, Sara Ferrari, ku është biseduar për bashkëpunimin ndërmjet Trentos dhe Pejës. Gjatë takimeve, kryeministri Isa Mustafa i ka njoftuar për të arriturat e mëdha në Kosovë, me theks të posaçëm në ambientin shumë të favorshëm për investime dhe për të bërë biznes.
Duke falënderuar Italinë për përkrahjen e madhe në shumë sfera, kryeministri foli edhe për mundësitë që ekzistojnë për bashkëpunim ekonomik dhe investime sidomos në energjetikë, në energjinë e ripërtëritshme, në miniera dhe minerale, përpunimin dhe finalizimin e tyre, në procesimin e produkteve me prejardhje bujqësore, në IT, në turizëm, sidomos turizmin dimëror.
Kryeministri Mustafa gjatë ditës ka marrë pjesë në punimet e Forumit Itali-Kosovë, ku ishin të pranishëm 93 përfaqësues të bizneseve italiane dhe kosovare, si dhe kryetari i Odës Ekonomike të Kosovës, Safet Gërxhaliu. Gjatë forumit, kryeministri Mustafa dhe përfaqësuesit e tjerë të institucioneve të Kosovës kanë shpalosur në detaje mundësitë e mëdha që ofron Kosova për investitorët italianë.
Gjatë paneleve të ndryshme të forumit, ministrat përkatës kanë prezantuar potencialin e Kosovës, kanë diskutuar për instrumentet në mbështetje të kompanive posaçërisht për prodhim dhe investime të reja, për lehtësirat doganore, për rolin e odave ekonomike, etj.
Po ashtu, gjatë forumit, kompanitë e ndryshme kosovare dhe italiane kanë zhvilluar takime ndërmjet vete ku kanë shqyrtuar mundësitë e bashkëpunimit dhe investimeve, ku bizneset kosovare me potenciale eksportues kanë qenë shumë mirë të përfaqësuara në këtë forum.
Prodhuesit kosovarë kalojnë shumë barriera deri te tregjet botërore
Me gjithë vështirësitë me të cilat prodhuesit po ballafaqohen në zhvillimin e veprimtarisë së tyre në Kosovë, disa prej kompanive, megjithatë kanë arritur të jenë në pranishëm në tregjet e njohura botërore. Kompania “ASK Foods”, në Gjilan, e cila merret me përpunimin e pemëve dhe perimeve, me produktet e saj ka qenë e pranishme në tregun e Gjermanisë, Belgjikës, në Britani të Madhe, Suedi dhe disa vende të tjera. Por, së fundi pas shumë vështirësive, pronari i kësaj kompanie, Barlet Namoni në një prononcim për Radio Evropa e Lirë ka bërë të ditur se kanë arritur të jenë të pranishëm me produktet e tyre në rrjetin e maketeve më të njohura ndërkombëtare SPAR.
“Tash ‘ASK Foods’ përmes një partneri kemi arritur të hyjmë në marketet SPAR në Zvicër. Këto janë markete të njohura në botë dhe janë të pranishme në mbi 40 shtete. Produktet tonë kanë arritur të jenë në këto markete pas shumë testeve që iu janë bërë produkteve, të cilat më pas janë konsideruar se janë të kualitetit të lartë, ku edhe na është dhëna e drejta që të jemi prezent me produktet tona”, thekson Namoni.
Ai thekson se gjatë këtij viti presin që të realizojnë një marrëveshje për eksport edhe në Shtetet e Bashkuara të Amerikës. Kosova për vite me radhë është duke u ballafaquar me një ambient të pafavorshëm biznesor. Në hulumtimet e bëra, ishin identifikuar barriera të shumta në të bërit biznes në Kosovë, siç është mungesa e përkrahjes shtetërore, konkurrenca jo e drejtë e shkaktuar nga evazioni fiskal dhe ekonomia joligjore, pastaj furnizimi jo stabël me energji elektrike, kontestet ekonomike ndërmjet bizneseve, si dhe normat e larta të kredive.
Shaqir Palushi, pronar i kompanisë “Frutex” nga Suhareka, e cila merret me prodhimin e pijeve joalkoolike dhe energjike, thotë për Radion Evropa e Lirë se problemet më të mëdha i kanë në gjetjen e partnerëve tregtarë.
“Realisht kompania jonë nuk ka probleme të mëdha gjatë eksportit, ne eksportojmë në mbi 25 vende të botës, por problemi më i madh është gjetja e tregut dhe plasimi i produkteve. Këtu mungon përkrahja e qeverisë së Kosovës për prodhuesit. Institucionet e Kosovës do të duhej të bënin më shumë për ato kompani prodhuese që kanë synim tregun evropian”, thekson Palushi.
Krahasuar me vendet e rajonit, prodhuesit e Kosovës nuk janë të subvencionuar nga shteti, thotë pronari i kompanisë i “ASK Foods”, Barlet Namoni.
“Nëse krahasohemi me rajonin, përkatësisht vendet si Serbia apo Maqedonia, ata kanë subvencione nga shteti për çdo kilogram që e eksportojnë jashtë shtetit. Tek ne nuk janë këto subvencione. Në Kosovë ka shumë produkte, të cilat vijnë nga Maqedonia dhe kanë lehtësira të mëdha, derisa ne kur kemi eksportuar në Maqedoni problemet kanë qenë të mëdha në dogana deri në tre ditë kanë qenë të ndaluar kamionët tanë vetëm për të penguar eksportin”, thekson Namoni.
Ndryshe, vlera totale në vit e mallrave të importuara në Kosovë arrin shifrën në mbi 2.5 miliardë euro, derisa eksporti i produkteve të Kosovës në vendet e rajonit dhe Evropës nuk arrin vlerën mbi 300 milionë euro në vit.
Ky debalanc tregtar, për përfaqësuesit e kompanive prodhuese në Kosovë tregon gjendjen e rëndë të sektorit të prodhimit në vend.
Mazhoranca një organizatë kriminale e strukturuar
Albina DEDE
Në komisionin tonë, pra Komisionin e Çështjeve Sociale dhe Shëndetësisë u shqyrtua: “Projektligji për statusin e punonjësve të industrisë së naftës dhe gazit”. Duhet të citoj që në fillim që ne opozita mbështesim çdo iniciativë që është në të mirë të qytetarëve. Por duhet thënë se u luajt me këtë nismë për arsye të fillimit të etheve elektorale. Nisma erdhi nga deputeti Mamo, por shumë shpejt qeveria shprehu “gjoja rezerva” dhe njëkohësisht garantoi se do të integrohen maksimalisht propozimet e paraqitura në këtë nismë. Sa për dijeni të gjitha vendet e rajonit i rregullojnë çështjet e vështirësisë së profesionit me legjislacionin e punës dhe të sigurimeve shoqërore, si dhe me kontratat e punës. Po ashtu dhe ne kemi të njëjtin legjislacion, por që nuk ka gjetur zbatim.
Qeveria nuk e ka zbatuar ligjin për mbrojtjen, shëndetin e sigurinë në punë. Kjo është një nismë ligjore jo e plotë dhe vjen vetëm për qëllime të fushatës elektorale.
Këto lloj nismash ligjore duhet të vijnë të kompletuara dhe të unifikuara për të gjithë profesionet që punojnë në kushte të vështira dhe që meritojnë status si punjonësit e industrisë metalurgjike, miniera, tipografi. Punonjës që punojnë nën rrezatim.
Kjo nismë nuk zgjedh problemet që kanë ende sot punonjësit e industrisë së naftës dhe gazit në Ballsh, të cilët nuk janë paguar prej katër muajsh. Ky projektligj duhet të ishte i unifikuar me përcaktimet e legjislacionit për trajtimin e veçantë të punonjësve që kanë punuar në miniera, në nëntokë të miratuara më parë pa opozitën, por një qokë elektorale. I keni nëpërkëmbur ato dhe duke i lënë edhe pa paga në kushte të vështira për mbijetesë. Flitet në status dhe për përfitimet shëndetësore, herë falas e herë nëpërmjet skemës. As andej e as këtej. Por të gjithë e dimë si është katandis sot sektori shëndetësor.
Amulli, kaos, mungesa në medikamente, aparatura, mjekë, çdo gjë blihet nga qytetarët, madje blejnë medikamentet të skaduara, me etiketa të ndryshuara, duke e shndërruar shëndetësinë nga humane në kriminale. Në vend të qytetarit sot në qendër të punës e axhendës qeveritare është koncesionari. Qytetarët paguajnë e vetëm paguajnë e asgjë nuk përfitojnë nga shërbimet publike. Drejt privatit të gjithë edhe pse varfëria ka pllakosur kudo.
Drejt privatit për t’i shtuar xhepit të monstrave që kanë mbërthyer e shndërruar në biznes edhe shëndetin. Orientohesh edhe për një fasho e deri te protezat super të shtrenjta te klientelistët. Më vjen turp kur gjendem pranë një të sëmuri e të afërmit thonë i bleva të gjitha. Ku po shkon ky vend? Nuk ka fjalë për të përshkruar trishtimin tek pashë në rrjetet sociale foton e ikonës së kinematografisë shqiptare, Robert Ndrenika në dremitjen e antishpresës korridoreve të QSUT. Kjo është “dhurata” falas e mjekësisë së Rilindjes! Turp është pak për ju kusarë të pacipë, mashtrues të pashoqë që guxoni e mbushni ekranet me dokrra reformash e progresi.
Ndjehem po aq e trishtuar sa një fëmijë për prindin nga kjo pamje makabre që nuk do as përkthim as koment! Kjo foto e të madhit Ndrenika është pasqyra ku çakejtë mavi shfaqin fytyrën e vërtetë. Njëherazi e quaj foto-alarm për çdo shqiptar! Ju të mjerë mendoni mirë, se sapo të ikni nga pushteti askush nuk do t’u respektojë, ndërsa artistë si Ndrenika respektohen e nderohen nga të gjithë e gjithmonë, madje mund të them se ata janë në lavdinë e tyre të përjetshëm.
Varfëria e pamundësia është ulur këmbëkryq kudo. Ky fillim viti i gjen shqiptarët në trishtimin më të madh ekonomik e social të krahasuar vetëm me vitet e errëta të diktaturës. Kaluan afër 4 vite në përshkallëzim të llahtarshëm të varfërisë, e cila shtresën e mesme e degradoi në limitet e mbijetesës e shtresën vulnerabël e ka degdisur rrugëve të Europës, ndërsa të pamundurit mbushin kronikat e zeza me vetëvrasje. Denoncime të shumta nga qytetarët nga zona ime Mirdita dhe gjithashtu nga Puka, për mbifaturim të abonentëve për muajin dhjetor 400-500 kv abonentë familjarë dhe nga 1000 e në 2000 kv privatëve për të ulur humbjet dhe përgjigjja është e ka fajin sistemi. Katër vitet mavi u transformuan në vite të errëta skamjeje, korrupsioni, pseudoreformash.
Droga po helmon vendin dhe Europën, ndërkohë që pushteti e policia janë gardianët e saj dhe të trafikantëve. Ka kohë që nuk bëhet fjalë për realizim premtimesh apo pritshmëri. Vetëm një gjë progreson e ajo është propaganda.
Pushtetet e tjera demokratike të këtij vendi krijuar me shumë mund injorohen në rastin më të mirë, por shantazhi e blerja, presioni e intimidimi janë program ditor i koordinuar i Edi Ramës dhe bandës së tij. Vendi është nën varfëri, terror e arrogancë. Vetë deputetë, ministra e faktorë relevantë në mazhorancë denoncojnë e vetëdenoncohen, por asgjë dhe asgjë veçse gangrenizim i mëtejmë i ekonomisë dhe shoqërisë!
Diplomaci e çakorduar pa busull kombëtare, lojëra të rrezikshme të “liderit” kleptomitoman me ekuilibrat kombëtare e rajonale. Me pak fjalë e shqip çmenduri qeverisëse që na ktheu në paskohë. Në paskohën e baballarëve të një paskohe kriminale e oligarkike. Koha e zezë e Edvin Ramës po tejkalon dhe paskohën e etërve të tyre. Ata shtetëzonin këta përvetësojnë, ata dënonin kundërshtarët këta i linçojnë, i heqin nga puna e i denigrojnë. Një paskohë që rikthen izolimin duke u thirrur për integrim.
Thikë në palcë të çdo shqiptar është përkufizimi i qeverisjes së klikës uzurpatore. Nuk bëhet më fjalë për programe, por për mbijetëse. Dhe paradoksalisht propaganda vazhdon në përmasat e marrëzisë! Edhe çështja më emergjente, ajo e zgjedhjeve të lira në Shqipëri është e lidhur me problemin e madh të kriminalizimit të politikës, të krimit të organizuar, të drogës. Këto janë probleme që opozita i ka denoncuar prej tre vitesh. Këto janë probleme për të cilat opozita ka luftuar dhe ka arritur të ndryshojë ligjet, siç është ligji për dekriminalizimin. Por, që për fat të keq, nuk po gjen zbatim për shkak të mungesës së vullnetit politik.
Vullneti politik mungon sepse Edi Rama dhe koalicioni i tij qeverisës e ka lidhur fatin me krimin, me drogën.
Ajo që po ndodh në politikën mazhoritare qeveritare është e paprecedent për një shtet që pretendon alfën e demokracisë. Ujqër të uritur të çartur prej babëzisë e të dezorientuar nga afrimi i gjykimit të drejtësisë po përleshen pa skrupuj. Natyrisht ky stan këtë bulmet do të prodhonte. Asgjë e re dhe e paparashikuar në stanin e çakejve mavi! Nuk ka debat as luftë idesh mbi principe demokratike, por përleshje zullumqarësh kleptokratë të mazhorancës.
Shqiptarët duhet t’i besojnë alternativës së opozitës dhe jo të presin paqen mafioze të klaneve të drogës e korrupsionit. Shqiptarët duan e shpresojnë në një alternativë zhvillimi dhe jo të konfliktet në stanin e çakejve që i pret ndëshkimi! Dhe prisni se ky është fillimi i fundit të serialit kriminal kanabist. Kërma çdo ditë shton kundërmimin derisa të arrijë kutërbimin. Paradokset kanë marrë qytetari! Ata që njihen si shitblerës votash flasin me zhargon perëndimor për ndershmëri politike! Ata që janë produkt bandash vrastare e kriminelët me damkë në Europë i sollën në zyrat kryesore të pushtetit e derisa uzurpuan karriget e shumta të Parlamentit sot paciptësisht flasin për dekriminalizim! Në pamje të parë duket se kjo tablo kriminale mbyll përfundimisht dyert e shpresës. Forca jonë nuk matet me kartona parlamentare, por me shenjtërinë e kauzave që po mbrojmë për të cilat kemi me vete çdo shqiptar!
Diplomatët e huaj: Zgjedhjet do të vidhen
Diplomatët e huaj në Shqipëri konfirmojnë shqetësimin e opozitës se zgjedhjet e ardhshme që do të mbahen në qershor janë në rrezik duke paralajmëruar të njëjtin shqetësim se : Zgjedhjet do të vidhen. Ishte ambasadori i SHBA, Donald Lu që gjatë një takimi dha alarmin për vjedhjen e zgjedhjeve në Shqipëri. Ambasadori tha se njerëz të fuqishëm po përgatiten të vjedhin zgjedhjet e ardhshme në Shqipëri dhe gjithçka tjetër në këtë vend. “Nëse ne, shoqëria civile, partnerët ndërkombëtarë dhe media nuk jemi syshqiponja, politikanë, gjykatës, prokurorë të korruptuar dhe krerë të krimit do të përpiqen t’i vjedhin këto zgjedhje, reformën në drejtësi dhe gjithçka tjetër në ekonominë e vendit. Këta persona janë veçanërisht të frikësuar nga vëzhguesit vendorë të zgjedhjeve dhe ata që mbrojnë demokracinë e drejtpërdrejtë. Ju flisni shqip. Ju kuptoni kontekstin politik. Dhe keni mësuar marifetet e partive politike”, tha Lu. Nga ana tjetër alarmi se, paratë e drogës do të përdoren në zgjedhje është dhënë shumë më herët dhe nga Presidenti i Republikës, kur foli për tonelata farë kanabisi të futur në vend, një informacion i marrë ky nga shërbimet partnere dhe vendase. E jo vetëm kaq. Edhe aleatët e mazhorancës e kanë ngritur si shqetësim, faktin e personave të inkriminuar, kur ministri i Mjedisit tha se në Policinë e Shtetit janë infiltruar njerëz me të kaluar kriminale, të cilët do të përdoren për të manipuluar zgjedhjet e ardhshme, një skenar i Kryeministrit, i cili e sheh përditë se po humbet më shumë elektorat për shkak të politikave të mbrashta, korrupsionit dhe vjedhjes që e shoqëroi përgjatë këtyre viteve në qeverisje. I rrethuar nga të tijtë në këtë inkursion kriminal, ai po mundohet me të gjitha format të bëjë të paditurin, por pa e kuptuar se prekja e zgjedhjeve është një aventurë, e cila mund t’i kushtojë shumë më shtrenjtë se thjesht humbja e pushtetit. Ai tashmë është nën vëzhgim nga e gjithë bota demokratike e ngritur mbi parimet e shenjtërisë së votës dhe lirisë së zgjedhjes, vlera për të cilat Rama ka treguar se nuk i respekton, por sado të mundohet këtë herë është ndryshe. Ndërkohë po dje, ambasadori i OSBE Bernd Borchardt deklaroi se OSBE nuk mund të garantojë zgjedhje të lira dhe të ndershme. “Ekziston një opinion i përgjithshëm se OSBE-ja dhe ndërkombëtarët janë këtu për të garantuar zgjedhje të lira dhe të ndershme. Jo. Ne jemi këtu për të ndihmuar, për të këshilluar, për t’iu dhënë praktikat ndërkombëtare më të mira, por ne nuk mund të ndikojmë në mënyrë thelbësore dhe as të legjitimojmë sjellje apo rezultate. OSBE/ODIHR-i do të vëzhgojë zgjedhjet në Shqipëri. Vëzhguesit tanë ndërkombëtarë do të jenë dëshmitarë të zgjedhjeve dhe punës së KQZ-së, komisionerëve, partive dhe votuesve” është shprehur Borschardt.
Olsi Rama me makinën e kokainës
Me fakte të dokumentuara, ish-Kryeministri Berisha denoncoi dje në Parlament hyrjet dhe daljet e vëllait të kryeministrit Rama, Olsi Rama me makinën e kreut të bandës së kokainës, Gentian Gjonajt. Berisha tha se makina me të cilën lëviz Olsi Rama është e përshtatur për transportin e kokainës dhe se kryeministri Rama ka personalisht komunikim konstant me këtë bandë.
“Me një ndjenjë dhembjeje të thellë, keqardhje maksimale më duhet të them se të gjitha klasifikimet politike të korifenjve të mendimit politik, kjo klikë në pushtet nuk është një oligarki, nuk është një kleptokraci, por kjo mirëfilltas është një banditokraci. Samuel Huntington në vlerësimin e formave të ndryshme të regjimeve të degraduara përshkruan si formën më tragjike atë që ai e quan banditokraci.
S’do ta thoja kurrë, s’do të bëja kurrë një cilësim të tillë për vendin tim, por më e madhe është fatkeqësia po ta fshehësh se ta denoncosh një realitet të tillë.
Këta që shihni mbrapa (iu referohet ministrave të kabinetit qeveritar) dhe ca të tjerë këtu nëpër sallë, nuk janë gjë tjetër vetëm organizata kriminale e kësaj banditokracie. Këta janë kreu i asaj organizate kriminale që udhëheq banditokracinë. Është fjalë e rëndë kjo, e rëndë sa toka. Kjo do argumente.
Unë akuzoj si kreun e banditokracisë, kryebanditin Edi Rama që s’ka guxim të paraqitet më në këtë sallë, që ikën e ja mbath sepse këtu është gracka ku shpirti i tij kapet për fyti dhe i përplaset surratit të gjitha ato që ka bërë dhe bën.
Edi Rama ka një vëlla, vëllai i tij quhet Olsi Rama, qytetar shqiptar dhe amerikan. Kur denoncova në këtë Parlament se u kthye për afera dhe trafiqe, absolutisht asnjë prej jush nuk ma merr mendja se e besoi. Por e vërteta është që unë informacionin e kisha nga një anëtar i penduar i grupit të tij në Boston dhe që është në Shqipëri.
Vijmë më tej tek Olsi Rama. Këtu kam me data, me fotografi, me çdo gjë, daljet jashtë vendit të Olsi Ramës, por me çfarë thoni ju? Me makinën e kreut të grupit të kokainës. Me të njëjtën targë, me të njëjtin prodhim, së bashku me një ndrikull që punon në Federatën shqiptare të Futbollit, një Jona, një Jona Dervishi.
Kjo makinë është gjetur nga Prokuroria e Shtetit si një makinë e përshtatur me vende të fshehura për transportin e kokainës. Kjo fuoristradë është gjetur për transportin e kokainës.
Kush të dojë i ka këtu të gjitha hyrjet dhe daljet e vëllait të kryeministrit, Osli Ramës dhe ndrikullës Dervishi dhe të makinës së drogës, të Genti Gjonaj.
Ka një komunikim konstant me këtë bandë nga vetë kryeministri. Kreu i qeverisë është dhe kreu i banditokracisë, është kryebanditi, sepse kësaj radhe, jo unë, por një ministër për hir të së vërtetës i përgjegjshëm e akuzon se falsifikon mbledhjet e qeverisë. E akuzon se ka mbledhur qeverinë duke i patur shumicën e ministrave jashtë shtetit. Vetëm një bandit mund t’i lejojë vetes të thyejë Kushtetutën, që përcakton se si funksionon qeveria, të thyejë ligjin organik të Këshillit të Ministrave. Për banditin nuk ka ligj, për banditin nuk ka Kushtetutë. Edi Rama është kreu i bandave. A ka kryeministër në Europë sot të lidhur kaq fort me krimin, që e ka të mbushur celularin me sms të Balilit, sms të Dritan Dajtit dhe Lul Berishës? Madje dhe duke u kryer punë atyre dhe duke iu zotuar se: ‘S’ta kam bërë unë këtë apo atë pengesë’.
Këto janë absolutisht të vërteta dhe mos kini merak se do të vijë shpejt dita dhe do të dalin një nga një në dritën e diellit e vërteta. Por ju as nuk skuqeni dhe as zverdheni. Ju më shëmbëlleni mua si qenie të mjeruara, të decelebruara”, u shpreh Berisha.
Ku i mori Gregor Rama paratë e “BMV”-së ultralux?
Berisha i kërkoi dje Ramës në Parlament të bëjë transparencën mbi paratë për mjetet luksoze e super të shtrenjta që përdor djali i tij Gregor Rama, ndërsa solli në vëmendje automjetin e tipit të fundit “BMW”, i cili kushton 160 mijë euro, por që është i paregjistruar.
“Vendi është banditistan. Sapo doli puna e Eskobarit, puna e parë që bënë për t’i dhënë imunitet është se i organizuan konferencën e shtypit, në vend që ta arrestonin i organizuan konferencën që të akuzonte Sali Berishën dhe të vishte imunitetin politik. Pastaj u thanë diplomatëve këtu dhe në botë se ai fshihet edhe në pronat e kryetarit të Parlamentit.
Pastaj, kur ministri i Drejtësisë kërkoi arrestimin e tij, i hëngri kokën atij për të shpëtuar Balilin.
Kjo është një organizatë kriminale dhe Shqipëria është një banditistan përderisa të ketë këtë organizatë në krye. Po marrim pak trafikantin tjetër. Ministri i ngarkuar për politikat e rendit, sigurisë dhe luftës kundër krimit është shtyllë kryesore e krimit në vend. E akuzojnë dy ministra të tjerë të koalicionit, e kemi akuzuar dhe ne me qindra herë këtu, e kanë akuzuar edhe mediat. Dhe në vend se të skuqet, del dhe bën rrugaçin këtu për të treguar se i biri i kujt është, i dy kontrabandistëve me moral kontrabandisti, nuk kishte se si të rritej ky përveçse ky që është.
Pra, ky ministër është i vetmi kriminel me pushtet të lartë që ka skaf. Ekzistojnë dokumente, ku me noter ja u dha Habilajve skafin. Ekzistojnë dokumente që me veturën e tij e përdorin Habilajt për të kaluar kufirin 28 herë, për të transportuar drogën natyrisht. Ekzistojnë denoncime se Habilajt janë bashkëpunëtorët më të ngushtë në trafik me Eskobarin. A ju kujtohen ju bombat që u vunë para e mbrapa këtij dhe familjarëve të këtij (Tahirit)? Kush u arrestua, kush është brenda? Cili është autori që vuri për të asgjësuar një mender njeri? Katër dinamite në Tiranë u vunë. I vuri banda e Sajmir Tahirit dhe kjo është e faktuar. Sot s’ka njeri të arrestuar, sot s’ka njeri të akuzuar, vetëm për njërin u arrestuan tetë Gjutaj dhe Brukaj, edhe njerëz që s’kishin qenë kurrë në Shqipëri. Ky është një njeri i pafytyrë që del këtu si një rrugaç ordiner sillet e bërtet pasi ka marrë një dozë dhe kris e ikën pastaj.
Pra, a është kjo banditokraci? A është bandit një ministër që shkojnë e filmojnë në hotele dhe zhduk gjurmët?! A është bandit një ministër që mban skaf trafiku?! A është bandit një ministër, që pasi vrasin tjetrin në Shëngjergj, pasi Prokuroria thotë që është vrasje, Besnik Pudja është vrarë, merr në kundërshtim me çdo gjë dhe prish provat?! A është bandit një njeri që djeg Laboratorin e Kriminalistikës për hatër të Serezit?! A është bandit një njeri që dërgon drejtor të Portit të Vlorës ushtarin e Shullazit, se ja kërkojnë Habilajt?! A është bandit ky, a është banditokraci kjo?
Një ministër tjetër, që si një bandit falsifikon shifra e fakte në funksion të bandës?! A është bandit ai që shet dhe mbush xhepat me paratë e të sëmurëve me kancer?! Ky soj është më i lig se çdo bandit.
Ai që nuk zbaton ligjin, ai që nuk zbaton vendimet e gjykatës çfarë është? A mundet një deputet të mos zbatojë ligjet dhe vendimet e gjykatës? E bën vetëm një bandit këtë. Po ata që i nënshtrohen atij çfarë janë? Janë mjeranë!
Të na thotë Edi Rama pak se ku i mori i biri, që s’ka firmosur kurrë në bordero, as në taksa, paratë e ‘BMV’-së ultralux?”, shprehet Berisha.
Kryesore
Continue to the category
