16.5 C
Tirana
E mërkurë, 21 Maj, 2025
type here...

Rilindja shet Shqipërinë për 1 miliard euro

Jorida Tabaku

Çfarë i ka mbetur kësaj mazhorance sot pas gjithçkaje ka ndodhur në këto katër vjet? Çfarë i ka mbetur një qeverie që as e aftë të mbledhë qeverinë në mbledhje nuk është? Çfarë ka mbetur pa tenderuar e cila taksë ka mbetur pa rritur? Cili ka mbetur pa kërcënuar e intimiduar? Në më pak se katër vjet kanë koncesionuar çdo sektor me rëndësi dhe të ardhura të larta nga buxheti i shtetit përmes kontratave abuzuese dhe tërësisht në shërbim të interesave personale të një grushti individësh. Kanë shpenzuar mbi 500 mln euro për t’ua shpërndarë xhepave të bizneseve të tyre në formë koncesioni dhe kanë sjellë në shërbim të publikut zero shërbime. Kanë dhuruar në fushën e shëndetësisë gati 300 mln euro, ndërkohë që kemi parë se familjet shqiptare shpenzojnë 380 mln euro nga xhepat e tyre për ta marrë shërbimin nga privati. Kanë dhuruar në formën e koncesioneve 65 mln euro për Rrugën e Kombit megjithëse për tre vjet me radhë kanë rritur taksën e qarkullimit me justifikimin se do të përmirësonin mirëmbajtjen e rrugës. Kanë dhuruar përmes formës PPP apo koncesionare mbi 10 mln euro tek Crown Agents, ndërkohë që gjobisin pafund dhe pa të drejtë sa e sa biznese, ndërkohë që administrata tatimore dhe doganore vazhdon të ushtrojë presion mbi lustraxhinj e shitës perimesh. Si përfundim: për një mandat katërvjeçar shqiptarët janë ngarkuar me 2,5 mld USD borxhe, bizneset pranë qeverisë kanë përfituar thuajse 1 mld euro koncesione dhe PPP. Rezultati i kësaj politike rilindase është zero shkolla të reja, zero rrugë të reja, zero shërbime të reja, vetëm palma, beton, qendra qytetesh të boshatisura dhe një mal i madh borxhi për t’u shlyer. E pasi kanë shfrytëzuar në maksimum gjithçka të mundur kanë vendosur të prodhojnë një hile të fundit. Kanë vendosur që të ardhmen e shqiptarëve ta lënë peng për hir të ëndrrave të tyre, duke i vendosur çmimin “One bilion”. Oferta më e fundit e qeverisjes është të shiturit e të ardhmes sonë për interes të pasurimit të një grushti njerëzish sot. Dhe kjo vjen sepse në këtë mandat vjedhja jo vetëm ka qenë e madhe, por mbi të gjitha edhe bazat e një ekonomie të dobët u shkërmoqën, duke e çuar vendin në nivelin më të ulët të konsumit dhe inflacionit në 15 vitet e fundit, vetëm 1.3%.

Niveli i varfërisë, 48% e popullsisë

Duke çuar investimet e huaja në nivelet më të ulëta aq sa vetëm një shtet të ri si Kosova, kemi lënë pas vetes sonë. Duke e çuar nivelin e varfërisë në 48% të popullsisë që jeton me 5$ në ditë! Nën këtë klimë sociale dhe ekonomike, qeveria duket e dorëzuar dhe pa ide. Oferta e saj ndaj bizneseve ngjason më shumë me një tender të radhës për të cilin ajo premton paratë pas 2-3 viteve duke rritur automatikisht borxhin publik të fshehur. Fryma e propozimit 1 mld euro është vetëm imitim i turpshëm i politikave të ndjekura nga qeveritë e Greqisë, Portugalisë dhe Irlandës që jo rastësisht janë sot në listën e vendeve që rrezikojnë falimentimin. Shihni rastin e Greqisë, e cila pësoi një kolaps të tërë ekonomik dhe financiar vetëm si pasojë e këtyre politikave të makutërisë që nuk prodhuan asnjë ekonomi më të shëndoshë dhe asnjë gjendje sociale të mirë. Gjithsesi, mazhoranca pretendon se këtu nuk kemi të bëjmë me një borxh të fshehur, pretendon se kjo do të çlirojë tregun dhe do t’i japë frymë atij përmes parave të injektuara në treg. Ato po ju gënjejnë, njësoj siç gënjyen kur thanë se taksa progresive do t’ju jepte rrogën e 13 apo do të taksonte më pak 97% të shqiptarëve. Po ju gënjejnë njësoj siç gënjejnë kur flitet për rritjen e ekonomisë dhe atë të konsumit. Për ta kuptuar le të marrim një shembull. Qeveria ka dhënë me koncesion analizat e check up dhe është zotuar që t’i paguajë koncesionarit miliona euro vit për vit pa e vrarë mendjen për numrin e atyre që kryejnë vizita. Kësisoj pagesat që qeveria kryen ndaj kompanisë në fjalë janë përherë shpenzime në buxhetin e shtetit, që do të thotë para të taksapaguesve shqiptarë që shkojnë për mbajtjen në këmbë të kësaj kompanie, duke rritur në këtë mënyrë edhe borxhin, i cili do të shfaqet me vonesë. Ka qenë kjo arsyeja se përse kësaj qeverie FMN i kërkoi një informacion të qartë dhe të saktë me investimet që do të kryente përmes PPP-ve, por ndër të tjera ishte edhe kjo një arsye se përse MF iu bë një kërkesë për të paraqitur se deri në ç’pikë janë investimet kapitale në vend. E nga këto informacione ne mësojmë se investimet infrastrukturore të qeverisë në rrugë janë më të ulëtat në këto 20 vitet e fundit.

Shifrat e uljes së investimeve

Për vitin 2016 ishin planifikuar fillimisht 59 mld lekë që ishte një vlerë shumë më e ulët se sa viti 2007, ndërkohë që realizimi i buxhetit për investime ishte 3% më i ulët se sa viti 2015 duke i rrudhur me 60 mln euro. Janë këto tabela që tregojnë dhe dëshmojnë se qeveria nga 11 akse rrugore në ndërtim që gjeti ka marrë përsipër vetëm 2 prej tyre t’i përfundojë deri në vitin 2019 pa na shpjeguar se përse duhet të mos ndërmerrte këto investime në këto akse kur edhe borxhin e çoi nga 62% në 72%? Nisma e kryeministrit për të dhuruar 1 mld euro as nuk do të përmirësojë gjendjen ekonomike të vendit, as do të nxjerrë nga moçali i taksave dhe tarifave të vendosura mbi kokë tek bizneset dhe as nuk do të lehtësojë kredidhënien e bankave, të cilat vazhdojnë të nxjerrin fitimin e tyre jashtë. Në të kundërt, do të përkeqësojë dhe të shtrydhë gjithnjë e më shumë bizneset, të cilët sot vazhdojnë të vuajnë një treg të kapur dhe aspak të lirë. Nëse ndokush ka ende dyshime le të hedhë sytë te Porti i Karpenit që e lançuan si një megainvestim e doli që ishin kompani fantazmë prapa të cilave mund të fshihen vetëm politikanë. Ky është lloji i investimeve e koncesioneve që dini të jepni ju. U përpoqa dje të gjeja disa investitorë të rinj që kanë ardhur në Shqipëri mbas 2013. Arrita të gjeja vetëm dy që ishin kompanitë e inceneratorit të Elbasanit dhe të Fierit që të dyja nuk sjellin asnjë investim në Shqipëri, por njërën e paguani 5 mln euro në vit e tjetrën 28 mln euro e që ishin e njëjta kompani. Unë nuk e di se çka ndodhur me një parti që dikur quhej e majtë, që po rrit varfërinë e pabarazinë, që nuk ofron dot vetë asnjë shërbim, por koncesionon gjithçka! Përndryshe disa kolegë deputetë të kësaj ane të mëngjër, do të ishin ngritur tanimë për të protestuar ndaj kësaj nisme, duke filluar qoftë edhe me z. Vasili, i cili disa muaj më parë erdhi në këtë sallë me një amendament që gjoja frenonte koncesionet pa fre. Po sot z. Vasili a jeni me të njëjtën mendje si përpara një muaji për t’i dhënë fund koncesioneve pa fre dhe nismës “Koncesionohet Shqipëria për 1 mld euro”? Apo sërishmi të gjithë këtu luajnë lojën e strucit për të akuzuar, por pa mbajtur përgjegjësi. Për të bërë opozitën, por nga kolltuku i qeverisë. Për të kritikuar mazhorancën a thua se jeni në opozitë? Koha po troket për këdo që sot mbështet në heshtje apo me tam-tame këtë qeveri, po troket edhe për vetë mazhorancën, e cila si në ditët e mira ashtu dhe në ato të këqija ka mundur t’ia sjellë në majë të hundës shqiptarëve.

Hileja e frikshme e PPP-ve. Skenari grek që e çon borxhin 80% të PBB-së

Programi i lajmëruar nga qeveria për të konçesionuar tek privatët 1 miliard euro investime në projekte publike është një rritje e fshehtë e borxhit. Të gjitha investimet e privatëve do të shlyhen nga buxheti, për një periudhë e cila varion nga 10 deri në 15 vjet.  Sipas skemës, qytetarët nuk do të paguajnë vetëm investimin fillestar, por edhe interesin e bankave si dhe fitimin e biznesit privat, që do të financojë projektin. Kjo do të thotë se, në fund të 15 viteve, qytetarët nuk do të paguajnë mbrapsh 1 miliard euro, por shumë më tepër. Përmes kësaj manovre qeveria e rrit borxhin publik të vendit minimalisht me 10 pikë përqindje të tjera. Edhe pse në librat e shtetit shifra zyrtare e borxhit është 70 për qind e Prodhimit Kombëtar, me programin e koncesioneve borxhi real i vendit është 80 për qind e Prodhimit Kombëtar. Shifra prej 1 miliard euro plus fitimet dhe interesat është një detyrim kontigjent, i cili do të paguhet në të ardhmen. Pra, qeveria po merr borxh nga e ardhmja për të shpenzuar tani.

Fatura për qytetarët

Aktualisht, taksapaguesit shqiptarë paguajnë 7.3 miliardë lekë ose rreth 58 milionë dollarë në vit për koncesionet e dhëna nga qeveria, kryesisht në fushën e shëndetësisë. Por me programin e ri 1 miliard euro të PPP-ve, kjo faturë do të rritet me shpejtësi. Qeveria pretendon se ka hapësirë ligjore që të shpenzojë deri në 5 për qind të të ardhurave tatimore në vit për të paguar konçesionarët privatë dhe është shprehur e vendosur për ta shfrytëzuar plotësisht këtë hapësirë. Aktualisht, të ardhurat tatimore janë rreth 360 miliardë lekë dhe brenda dy apo tre viteve pritet të shkojnë në 400 miliardë lekë. Kjo do të thotë se, duke filluar nga 2018-ta buxheti do të paguajë rreth 20 miliardë lekë ose 170 milionë dollarë në vit për të paguar bizneset private të koncesioneve. Kjo faturë marramendëse do të kufizojë hapësirën për investime publike dhe shpenzime sociale për shtresat në nevojë.

Borxhi vetëm rritet

Në vitin 2013 kur erdhi në pushtet qeveria e gjeti borxhin publik 62 për qind të Prodhimit Kombëtar. Tashmë që po përfundon mandati katërvjeçar, borxhi është rritur në 72 për qind e PBB-së. Pas rritjes së frikshme të treguesit zyrtar, përmes projektit të koncesioneve, qeveria është duke rritur sërish borxhin, por këtë herë në mënyrë të fshehtë dhe në kurriz të së ardhmes. Ky është një skenar i ngjashëm me atë të qeverisë greke, e cila kontraktoi borxh të fshehtë nga biznesi përmes skemave të ngjashme me ato që po vë në jetë qeveria shqiptare. Në Greqi, kriza shpërtheu kur qeveria nuk kishte më para të shlyente borxhet ndaj biznesit. Shqipëria po shkon në të njëjtën rrugë, teksa një pjesë e rëndësishme e buxhetit po kalçifikohet vetëm për  të shlyer koncesionet shpesh të dyshuara për korrupsion. Nuk është rastësi që projekti i koncesioneve u lajmërua vetëm, pasi qeveria largoi Fondin Monetar Ndërkombëtar, i cili një skemë të tillë e kundërshtoi fuqishëm për sa kohë ishte në Shqipëri.

SYRI.net

Faqja e pare

Nishani: Shkarkimi i Manjanit për kanabisin, shenjë alarmi

-Kryeministri i vendit ka shkarkuar ministrin e Drejtësisë, cili është gjykimi i presidentit për këtë akt?
Unë mendoj se e kam mirëkuptimin tuaj, të medias në përgjithësi dhe të gjithë shoqërisë për sa kohë mbart mbi vete imazhin e institucionit të Republikës, dua të respektoj në mënyrë strikte përcaktimet kushtetuese ligjore, por dhe kodin që duhet të udhëheqë Presidenti shqiptar për të qenë jashtë përfshirjes qoftë edhe përmes analizave gjykimeve, por dhe vendimeve që ju takojnë partive politike, apo qeverisë që është produkt i partive politike në kontekstin formal. Përbërja e qeverisë është një e drejtë ekskluzive e kryeministrit, i cili ka marrë mandatin përfaqësimit nga mazhoranca që ka krijuar qeverinë, por nga ana tjetër padyshim kjo nuk do të thotë që përjashtohet nga dimensioni i të drejtës i çdo ministri, i çdo njeriu që është në përbërje të qeverisë për të shprehur mendimet për politika të caktuara apo për angazhime të caktuara. Ky është dimensioni minimal dhe fillestar i së drejtës, por gjithsesi kjo është një çështje që mbetet brenda në qeveri, është një çështje që duhet ta zgjidhin në dy grupimet që kanë krijuar qeverinë shqiptare. Ndaj për sa kohë mbart këtë përgjegjësi nuk do të përfshihem në analiza dhe gjykime. Por sidoqoftë në aspektin njerëzor unë kam gjykimet e mia, analizat e mia, por unë ngul këmbë në dy gjëra, së pari, në të drejtën formale të mandat marrësit që është kryeministri, së dyti nga ruajtja dhe respektimi i së drejtës së çdo njeriu pavarësisht pozicionit shtetëror apo publik që ka.

-Ylli Manjani ishte ministër Drejtësie, por dhe anëtar i KLD-së, ku Presidenti i Republikës është kryetar i KLD-së. Zoti President a keni gjykim për punën e Manjanit si ministër?
Ju falënderoj për pyetjen, sepse më jepet rasti për të shprehur falënderimet madje dhe mirënjohjen mund të them pa e ekzagjeruar të një kontributi profesional që zoti Manjani solli në mbledhjet e KLD-së, i cili e kishte të nevojshme jo vetëm nga pikëpamja e mënyrës se si duhet të funksionojë këshilli, jo vetëm nga mënyra e drejtimit të këshillit, ku ministri përfaqëson ekzekutivin, por dhe për shkak të një lloj racionaliteti të fokusimit profesional dhe ligjor të çështjeve që diskutohen në KLD. Ruaj vlerësimet maksimale, ruaj edhe vlerësimet e mia më të mira institucionale dhe gjej rastin edhe për falënderimet për frymën që solli zoti Manjani në KLD-së, një frymë që ishte në dimension e një profesionisti, por dhe të bashkëpunëtorit, koordinuesit dhe të pajtuesit midis aktorëve që përfaqësonin pushtete të ndryshme, qeverinë, gjyqësorin dhe Parlamentin.

-Zoti Manjani pajtues? Se perceptimi pas asaj që thonë kolegët e tij, zoti Manjani është konfliktual zoti President?
Unë po ju përcjell eksperiencën në KLD, se cilat janë eksperiencat apo perceptime që krijohen nga aktiviteti i zotit Manjani në ekzekutiv në partinë politike apo në Parlament, unë nuk e kam këtë informacion dhe nuk mund të prononcohem për këtë. Flas në mënyrë të sinqertë në mënyrë bindëse për çka unë kam konstatuar dhe përjetuar në funksionimin e KLD-së dhe aktivitetin e ministrit të Drejtësisë, zotit Manjani në funksionin e tij si anëtar i KLD-së?

-Ylli Manjani ishte anëtari i parë i qeverisë, i cili foli për rrezikun që po i kanoset sigurisë kombëtare nga kanabis, madje bëri thirrje edhe për përfshirjen e ushtrisë në këtë aksion për të zhdukur atë, të cilën Shqipëria nuk e kishte përjetuar kurrë më parë në këto nivele. Edhe Presidenti ka pasur këtë shqetësim dhe në mos gaboj ka thirrur dhe Këshillin e Sigurisë për çështjen e kanabisit. Ministrit i kushtoi shkarkimi, gjithsesi ju tashmë keni thirrur Këshillin e Sigurisë tashmë për një çështje tjetër, i kërkuar nga kryetari i Kuvendit për çështjen e Klement Balilit. Zoti President, a keni diskutuar ju me institucionet e ministrit të Brendshëm, Prokurorisë së Përgjithshme me SHISH-in, se pse nuk arrestohet Klement Balili dhe a përbën realisht një kërcënim për sigurinë kombëtare?
Duke ju referuar përmbajtjes së pyetjes tuaj do të thosha se në rast se zoti Manjani është shkarkuar për shkak të angazhimeve dhe prononcimit të tij në lidhje me shqetësimin, tashmë ndërkombëtar që ka marrë kultivimi dhe trafikimi i kanabisit në territorin shqiptar, ky do të ishte një lajm shumë i keq.

-Këta e tha vetë kryeministri, e tha zv/kryeministri, e tha kryetari i Bashkisë Veliaj, u shkarkua sepse foli pa leje, i vetmi motivacion ishte ky. Foli pa leje, këtë e tha vetë dje zv/kryeministri Niko Peleshi?
Po flas si President i Republikës dhe kjo është vërtetë për t’u shqetësuar nëse është shkarkuar se ka folur për çështjen e kanabisit, për kultivimin dhe trafikimin e kanabisit është një shenjë dhe një moment shumë i keq dhe problematik.

-Ju e keni para motivacionin e keni lexuar dhe keni firmosur shkarkimin e tij?
Motivacioni i referohet ecurisë së Reformës në Drejtësi, nuk e di se cilat janë arsyet dhe detajet që kryeministri ka konstatuar se zoti Manjani është një pengesë për çuarjen përpara të Reformës në Drejtësi, kjo është në tagrin kushtetues të kryeministrit, ky ka qenë argumentimi zyrtar që ka ardhur në propozimin e kryeministrit tek Presidenti i Republikës. Për sa i përket angazhimit të Presidentit të Republikës për thirrjen e sigurimit kombëtar, ka pasur një mbledhje para disa kohëve për shkak të dimensionit shumë shqetësues që ka marrë ky problem, i ka tejkaluar kufijtë e Shqipërisë, informacionet e konfirmuara të agjencive inteligjente shqiptare dhe atyre të NATO-s, kanë konstatuar lidhje financiare midis grupeve të krimit të organizuar, posaçërisht të fokusuar tek trafiku i drogës me grupet e terrorizmit ndërkombëtar, që do të thotë se ky është një alarm që ne duhet të na preokupojë në një masë shumë serioze ndaj dhe u përcoll si shqetësim në kërkesën time në mbledhjen e mëparshme të Këshillit të Sigurimit Kombëtar, ku kërkova nga të gjithë aktorët e ngarkuar nga ligji dhe Kushtetuta e vendit kryesisht ato ligj zbatuese, të rrisnin angazhimin, seriozitetin dhe goditjen në parandalimin në radhë të parë të kultivimit, pastaj në goditjen e trafikimit, sepse janë dy momente që kanë përmasa të ndryshme, por rëndësi të njëjtë dhe kërkesa e ardhur nga kryetari i Kuvendit të Shqipërisë, anëtar i Këshillit të Sigurisë Kombëtare me fokus çështje konkrete, personazh konkret i konfirmuar si shqetësim i madh nga agjencitë ndërkombëtare të luftës kundër trafikimit, i bërë publike nga përfaqësuesit e partnerëve tanë më kryesorë për çështjet e sigurisë siç janë SHBA-të, besoj që tregon përmasën përtej kufirit kombëtar, përtej organizimit kombëtar, përtej netëork-ut kombëtar për sa i përket kësaj çështjeje. Prandaj me shumë shpejtësi besoj ju përgjigja këtij shqetësimi, si një shqetësim serioz, si një shqetësim, i cili duhet trajtuar dhe duhet ndarë me të gjithë ata përgjegjës në përmes mandateve që kanë pranuar të marrin dhe të ekzekutojnë në veprimtarinë e institucioneve që drejtojnë duhet jo vetëm të japin llogari, duhet jo vetëm të sqarojnë institucionet e interesuara, duhet të sqarojnë partnerët tanë ndërkombëtarë për çështjet e sigurisë kombëtare, rajonale dhe më tej, por njëkohësisht të na paraqesin në mënyrë të detajuar për mënyrën se si do të veprojë Shqipëria, dhe kur them se si do të veprojë Shqipëria është kompleksiteti i institucioneve që Shqipëria ka, institucioneve ligj zbatuese, pra, kjo është një çështje, e cila kërkon jo vetëm adresim, por edhe ndjekjeje, ky është dhe fokusi i mbledhjes së Këshillit të Sigurisë Kombëtare ditën e premte.

-Mendon seriozisht se Klement Balili përbën kërcënim serioz për Sigurinë Kombëtare zoti President?
Patjetër.

-Është hera e parë që Këshilli i Sigurisë Kombëtare në Shqipëri mblidhet për një emër konkret?
Për herë të parë për një çështje konkrete, nuk është një emër konkret është një çështje konkrete. Për herë të parë një krye trafikant nuk vepron në mënyrë të izoluar për një çështje që thashë dhe jo pa qëllim dhe jo pa fakte ka tejkaluar kufijtë e Shqipërisë një çështje, e cila ka marrë vëmendjen dhe shqetësimin e agjencive më të mëdha ligjzbatuese në nivel global në luftën kundër krimit të organizuar dhe trafikut të drogës. Pra, nuk është një individ është një çështje me përmasa ndërkombëtare dhe nuk është për herë të parë, por është në vijimësi të mbledhjes së parë që bëri KS, për çështjet e trafikimit.

-Rasti Balili është një rast i cili i ka kaluar kufijtë e Shqipërisë, por ky është një pretendim i kryeparlamentarit Meta ku thotë se i është kërkuar nga vizita në Uashington, më konkretisht përse nuk arrestohet Klement Balili. Ai i është ngritur ky shqetësim nga partnerët shqiptarë përpara se këtë gjë ta bënte publike zoti Meta?
Patjetër, përderisa është bërë një deklaratë publike nga ana e ambasadorit të SHBA-ve në Tiranë, është një mesazh i qartë madje shumë i mirëpritur dhe i vlerësuar që ka pas ndjeshmërinë e qeverisë së SHBA-ve, sepse ambasadori amerikan përfaqëson qeverinë e SHBA-ve dhe ky do të thotë se është një shqetësim i SHBA-ve. Pra, jo emri konkret, por çështja dhe fenomeni. Pra përderisa është një deklaratë publike është një adresim që i bëhet Presidentit të Republikës, kryeministrit, qeverisë, policisë, Prokurorisë të gjitha institucioneve dhe shoqërisë shqiptare.

-Zoti President, a i keni kërkuar informacion ministrit të Brendshëm, shefit të Shërbimit Informativ, Prokurorit të Përgjithshëm për rastin Balili?
Patjetër në rastin e mbledhjes së Këshillit të Sigurisë Kombëtare, i është kërkuar një informacion Prokurorisë, i është kërkuar informacion Policisë, i është kërkuar informacion dhe SHISH, sepse kam adresuar informacione të nivelit operacional. Padyshim që informacionet e nivelit operacional janë të limituara, madje dhe për Presidentin e Republikës, madje as për ministrin përkatës, janë strikte të trupës në uniformë që ngarkon ligji siç është rasti i Policisë së Shtetit, por padyshim brenda tagrit kushtetues dhe të drejtës për të marrë informacion i jam adresuar dhe pres të marr informacion përpara mbledhjes së KSK-së.

-Në rast se dorëzohet apo arrestohet Klement Balili para të premtes a do të bëhet mbledhja e Këshillit të Sigurisë Kombëtare? Sepse ministri i Brendshëm ditën që kryetari i Parlamentit i kërkoi Presidentit, pra ju kërkoi juve që të mblidhni KSK-në për këtë çështje, madje i kërkoi Presidentit që mos e mblidhni se shumë shpejt do ta arrestojmë Klement Balilin, a do bëhet mbledhja e KSK-së?
Edhe njëherë unë ju referova jo një emri të caktuar, një njeri i cili akuzohet për veprimtari kriminale padyshim që ka të gjithë pasojat e ligjit që parashikon për veprimtarinë kriminale, unë vlerësova një çështje, një fenomeni, një dosjeje, e cila është shumë e gjerë, dosje e cila duhet hetuar se çfarë ka brenda, përveç Balilit kush është i përfshirë në këtë dosje. A ka mbështetje politike, nëse ka kush ja ka dhënë këtë mbështetje politike, a ka mbështetjen e institucioneve shtetërore, nëse ka kush ja ka dhënë këtë mbështetje shtetërore dhe duke mos u nisur dhe mos gjykuar aspak nga opinione që jep gjithsekush rrugëve të qeverisë, ajo që them është se, kapet apo s’kapet sot, apo nesër a pasnesër, Këshilli i Sigurisë Kombëtare do të mblidhet për të shqyrtuar shqetësimin e kryetarit të Kuvendit, i cili edhe ai lidhet drejtpërsëdrejti me këtë çështje. Pse ky person me informacionet që ka pasur, me aktivitetin që ka pasur është lejuar, a është mbështetur përderisa është lejuar, pse nuk është ndaluar, pse nuk është bashkëpunuar me aktorët ndërkombëtarë, ku i është afruar bashkëpunimi pse nuk janë realizuar dhe përfunduar operacionet e asistuara nga partnerët? Pra janë disa çështje që ka kjo dosje brenda. Kjo është një dosje, e cila shkon përtej çdo emri apo personi të caktuar, i cili patjetër që do të marri atë që i takon dhe që i paracakton ligji, pavarësisht nëse arrestohet sot apo arrestohet nesër.

Marrë me shkurtime nga Syri.net

CEZ, Berisha refuzon Ballën: Nuk betohem para një të dënuari për shpifje

Dënimi me dhjetë milionë lekë i Taulant Ballës për shpifje ka bërë që të shtyhet dje seanca e Komisionit Hetimor parlamentar për CEZ. Dëshmitari Shkëlzen Berisha nuk ka pranuar të bëjë betimin para Ballës, duke i kujtuar këtij të fundit se është në konflikt interesi, duke i rikujtuar këtij të fundit dhe vendimin e gjykatës për këtë çështje. Berisha i ka kërkuar Ballës që t’i lirojë vendin një tjetër deputeti dhe më pas ai do t’i bindej të gjitha procedurave që parashikon ligji në këto raste. Por Berisha tha se s’mund të bëjë betimin përpara një njeriu të dënuar nga gjykata për shpifje. “Pavarësisht se ky është një Komision politik që synon mbrojtjen e Edi Ramës për vjedhjen e 432 milionë eurove, këtë nuk e them unë e thotë KLSH, unë përsëri erdha në respekt të ligjit. Personi që e drejton këtë Komision, siç ju e dini shumë mirë është një i dënuar me vendim të formës së prerë nga Gjykata e Apelit të Tiranës për shpifje ndaj personit tim. Jo vetëm është dënuar, por refuzon të zbatojë vendimin e gjykatës. Tani më thoni, nga të gjithë këta deputetë që ka Parlamenti, pse ky Komision duhet të drejtohet nga ai që është në konflikt të hapur interesi dhe është dënuar për shpifje ndaj meje. Unë nuk pranoj të bëj një betim para një njeriu të dënuar për shpifje. Zotëria mund të çohej dhe t’ia lironte vendin një nga kolegëve të tij, nuk deshi, sepse nuk është i interesuar për të vërtetën, por për interesin politik”, u shpreh Shkëlzen Berisha.
-E njihni zotin Nuel Kalaj?
Kam bërë disa deklaratë publike që ezaurojnë përtej çdo dyshimi faktin që unë as me zotin Kalaj as me zotin Ismaili nuk kam asnjë lidhje, as me aktivitetet e tyre dhe as punën e Komisionit. Nëse zotin Kalaj nuk e thërrasin se nuk e gjejnë dot, po zotin Ismailaj pse nuk e thërrasin në Komision, nuk e gjejnë dot se ku është?Kjo është e ezauruar.
-Zoti Berisha, kishte disa emaile ku përmendej emri juaj.
Nuk e di çfarë provash ka administruar ky Komision, asnjë prej jush nuk ka parë nëse këto prova kanë qenë të çertifikuara me origjinalin, kanë ardhur ta apostiluara, janë apo nuk janë prova reale nuk mund ta them dot.Unë kam bërë deklaratën publike, kam theksuar qartë se nuk kam asnjë lidhje as me personin dhe as aktivitetet e tyre dhe asgjë tjetër. Për fat të mirë kjo punë ka dëshmitarë, mund të pyeten të gjithë dhe mund të flasin.

Vendimi që shpalli Ballën shpifës

Edi Rama e vendosi në krye të Komisionit Hetimor për ÇEZ, si njeriun e tij të besuar. Duke pasur besim tek talenti i Taulantit dhe besnikëria e tij, ai u mundua që me anë të këtij Komisioni Hetimor, e vetë Edi Ramës dhe enturazhit të tij, kërkoi që të mbulonte me anë të propagandës së Taulant Ballës një nga megaaferat korruptive që i kanë shkaktuar një dëm shqiptarëve prej 550 milionë euro. Në korrik të vitit 2012, atëherë kur Rilindja ishte ende në opozitë dhe Taulant Balla dilte si vullnetar për të marrë përsipër çdo pisllëk që gatuhej në zyrat e Ramës, do të deklaronte se, “Do të zbardhim të gjitha pazaret, të gjitha parakontratat. I them sot kompanisë “Australin Lottery”, që tender-komedia e Ridvan Bodes, nuk vlen, ndërsa licencën që kanë rënë dakord me Zenin, ne do ta anulojmë dhe do t’ia kthejmë atë shqiptarëve. Nuk mund të lejojmë që shqiptarëve t’ju merret një pronë publike, prej më shumë se 100 milionë eurosh, se kështu ka rënë dakord Zeni në Austri”. Në bazë të kësaj dëshmie u hap një gjyq nga ana e Shkëlzen Berishës, rezultati i të cilit është një vendim i formës së prerë të Gjykatës së Apelit të vitit 2013 që e dënon deputetin e Librazhdit, me 10 milionë lekë gjobë ndaj Shkëlzen Berishës, detyrim që ende sot e kësaj dite nuk e ka shlyer. Por jo vetëm kaq! Pas ardhjes në pushtet të Rilindjes, deklarimet e Ballës jo vetëm që i mori era, por u vërtetua se një vit më vonë, motra e tij, Fjoralba Balla u angazhua në marketingun e kompanisë, dhe ka qenë drejtuese e projekteve sociale të Austrian Lottery, e njëjta kompani të cilën vëllai i saj e sulmonte se ishte nën hetim për korrupsion. Pra, vlen të theksohet, se vetë Balla ka vepruar si një gjobëvënës i rëndomtë, duke treguar gishtin tek të tjerët dhe duke përfituar nga e njëjta kompani.

Berisha me ambasadorët: Rama, i regjistruar kur kërkon miliona ryshfete dhe komunikon me trafikantët

Ish-Kryeministri Berisha priti dje në takim kryetarin e pranisë së OSBE në Tiranë, Bernard Borchardt dhe ambasadorin e Shteteve të Bashkuara të Amerikës, Donald Lu, ku u diskutua mbi zhvillimet më të fundit në vend dhe zgjedhjet parlamentare. Në këtë takim Berisha u theksoi ambasadorëve se vendi ka ardhur në një moment të një rëndësie kritike: zgjedhjet e qershorit. Berisha theksoi se me keqardhje pohon se nuk njeh asnjë shqiptar që të besojë se do të ketë zgjedhje të lira në Shqipëri. Ai u shpreh se në vlerësimin e tij shkaku më themelor i kësaj qëndron në shndërrimin e qeverisë shqiptare në një organizatë të vërtetë kriminale.
“Sot Edi Rama me lidhjet e tij me krimin, faktikisht drejton këtë organizatë”, theksoi ai. Berisha u shpreh se janë të panumërta faktet që i faktojnë këto lidhje. I vëllai i kryeministrit Rama, Olsi Rama, është faktuar me dokumente i lidhur me Gentian Gjonaj, kreu i trafikut të kokainës në Shqipëri, i cili ka përdorur në mënyrë të përsëritur pikërisht makinën e përshtatur nga banda për trafik kokaine, për të dalë jashtë shteti. Ai theksoi se të gjitha të dhënat për këtë ekzistojnë në sistemin TIMS.
Nga ana tjetër, Berisha u shpreh se Edi Rama është i regjistruar tek kërkon miliona ryshfete dhe komunikuar me trafikantët dhe kriminelët më të rrezikshëm duke u përpjekur t’i mbrojë ata. Zoti Berisha tha se Rama po bën gjithçka, me presion të jashtëzakonshëm mbi gjykatësit për të liruar bandat, ku pas lirimit të Lulzim Berishës, ka kthyer mbrapsht dosjen e Hakmarrjes për Drejtësi dhe tani së fundi atë të Aldo Bares.
Lidhjet e Ramës me vrasësit e komisarit Lame dhe Shullazin janë universalisht të njohura, vazhdoi ai. Berisha theksoi gjithashtu se i lidhur kokë e këmbë me krimin është dhe Sajmir Tahiri. Çdo njeri që studion rastin e Balilit nuk ka asnjë vështirësi të konstatojë se Balili është i mbrojturi i Ramës dhe Tahirit. Zoti Berisha kujtoi dhe rastin kur pas heqjes së moratoriumit të skafeve nga qeveria socialiste, Sajmir Tahiri ishte i pari që bleu skaf, i cili u përdor nga Habilajt njësoj siç u përdor makina e tij që kaloi plot 28 herë kufirin. Berisha shprehu gjithashtu shqetësimin se shndërrimi i vendit në kanabistan është një politikë shtetërore jozyrtare.
Gjatë diskutimit ai u ndal tek një nga kriteret e listës së kritereve të Kopenhagenit për zgjedhje të lira dhe të ndershme: mediat. Ai shprehu shqetësimin se mediat e mëdha të vendit janë tërësisht të kapura nga Edi Rama dhe bëjnë gjithçka për të censuruar opozitën. Në këto rrethana Berisha theksoi se e konsideron situatën emergjente, për ndërhyrje të fuqishme për të shpëtuar zgjedhjet. Një situatë emergjente kërkon masa dhe ndërhyrje emergjente, tha ai. Në këtë kontekst zoti Berisha theksoi se masa më efikase është votimi dixhital, të cilin ai e gjykoi plotësisht të realizueshëm pasi ai nuk fillon nga zero, por në kushtet kur baza e të dhënave themelore për votim elektronik ekziston e plotë dhe duhen vetëm pak javë për ta bërë disponibël.
Berisha u shpreh se nëse qeveria ka vullnetin atëherë mund të gjendet kompania që të nisë punën për këtë. Ai theksoi se nëse ndonjë kompani nuk merr përsipër të mbulojë gjithë territorin atëherë Shqipëria mund të ndahet në disa zona dhe bërë të mundur që shqiptarët të votojnë si shumë vende të tjera duke i bërë kështu një shërbim shumë të madh vendit. Ai theksoi se vërtet kjo mund të ketë një kosto më të madhe, por kjo kosto është shumë herë më e vogël se një proces zgjedhor i manipuluar dhe i shkatërruar.

Veliaj teatër në urban, qytetarët përballen me kushtet skandaloze

Kreu i Bashkisë së Tiranës, Erion Veliaj ka bërë shfaqjen e radhës, duke u vetëfilmuar në një autobus urban për t’u mbushur mendjen qytetarëve se gjendja e shërbimit urban është përmirësuar. Por janë qytetarët ata që përballen për çdo ditë me kushtet skandaloze. Dje, zyra e shtypit e Bashkisë ku punojnë mbi 50 vetë ka shpërndarë nëpër televizione një kronikë, ku shihet kryebashkiaku që bën xhiro me autobus urban. Ai i jep kameramanit të paguar nga vetë ai edhe një “intervistë” ku thotë se gjendja e shërbimit urban është rregulluar.
Transporti urban në kryeqytet përballet çdo ditë me probleme të shumta. Një ndër problemet kryesore është shpejtësia tepër e ulët e autobusëve urbanë. Për ata që nxitojnë të shkojnë në punë, ky udhëtim është një tmerr, pasi në distanca prej 800-900 metrash urbani e bën rreth 45 minuta. Po ashtu, tjetër problem është numri i lartë i personave që udhëtojnë në një autobus urban, duke bërë që personat të udhëtojnë “nën frymën” e njëri-tjetrit si dhe duke krijuar shpesh situata kaotike për shkak të vonesave. Tepër shqetësuese për qytetarët është edhe fakti që lëvizjet e autobusit urban në qytete janë shoqëruar nga vjedhje të shpeshta të urbanëve në Tiranë.
Të udhëtosh me linjat urbane, për kryeqytetasit është një stres më vetë për shkak të mbipopullimit të urbanëve. Njerëzit aty shtypen dhe ngjeshen fort pas njëri-tjetrit aq sa shpesh edhe dyert e urbanit mbyllen me vështirësi. Por problemi i qytetarëve që përdorin linjat urbane nuk mbaron me kaq. Ata duhet të rrinë nën frymën e njëri-tjetrit, duke krijuar një ajër të rëndë dhe tepër të ndotur. Në stinën e dimrit, ky është një rast i shpeshtë ku në ambjente të tilla përcillen virozat gripale nga një person mbartës tek të tjerë, me të cilët ndan një udhëtim të shkurtër brenda për brenda Tiranës.
Për këtë skandal qesharak të Veliajt ka reaguar edhe “Nisma Thurje”. “Totalisht qesharak. Hypën në autobuz me fotografin personal që meqë e paguan nga taksat tona, dhe i thotë: “Ma bëj një kështu, pa mendje. Më kap kështu serioz, që të dukem si lider serioz”. Është sa për të qeshur aq edhe për t’u irrituar. Sepse, ndërsa njerëzit vuajnë çdo ditë, orët e gjata të pritjes, vonesat ekstreme në stacion, shtypjen e përditshme në autobuz, ujin që në ditë shiu lag njëlloj si jashtë dhe brenda, lali Eri përpiqet t’iu mbushë mendjen njerëzve që e vuajnë vetë çdo ditë, që ja u rregullua çdo gjë. Dhe këtë mendon ta bëjë me një foto “pa mendje”.  E kuptoni se çfarë ofendimi i bën inteligjencës së gjithësecilit? Tallje brutale. Tallje spektakolare. Deri kur do t’i kemi në shpinë këta? Edhe sa do të durojmë talljet e tyre?”, shkruan “Nisma Thurje”.
Këshilli Bashkiak i Tiranës me votat e të majtëve nën një propozimin hileqar të Erion Veliaj e rriti çmimin e biletës në 400 lekë të vjetra, me premtimin se kushtet e shërbimit do të përmirësoheshin, por situata është e njëjtë për të mos thënë edhe më keq se më parë. Qytetarët e Tiranës të detyruar të përballen çdo ditë me autobusët e ngadaltë e të tejmbushur dhe pa kondicioner. Kontrolli i Lartë i Shtetit i kërkon Bashkisë së Tiranës të anulojë rritjen e çmimit të biletës për transportin urban qytetas, vendosur në 30 dhjetor të vitit 2016. Sipas KLSH-së, rritja e çmimit të biletës me 33% është e paargumentuar. Konstatimi për rritjen e paargumentuar të çmimit dhe rekomandimi për pezullimin e vendimit janë publikuar në raportin e Kontrollit të Lartë të Shtetit, pas inspektimit të punës në Bashkinë e Tiranës. “Kur i kërkuam DTTRR përllogaritjen e saktë të formulës së prezantuar në relacionin e VKB Nr.66 datë 30.12.2015, morëm përgjigjen finale se nuk është marrë në konsideratë as norma e inflacionit e deklaruar zyrtarisht e as një formulë paraprake”, shkruan KLSH në raport. KLSH i kërkoi Bashkisë së Tiranës marrjen e masave të menjëhershme të përcaktimit të çmimit të biletës në bazë të një formule të saktë ekonomike, e deri në përmbushjen e këtij detyrimi, pezullimin e vendimit të rritjes së çmimit të biletës për transportin publik.

R.POLISI

Robert Ndrenika në korridorin e spitalit i braktisur nga shteti

Aktori i madh Robert Ndrenika nuk është në gjendje të mirë shëndetësore, madje për këtë arsye vetë Teatri i kërkoi ndjesë qytetarëve për shtyrjen e shfaqjes “Mendohu Xhakomino”. Kjo foto e aktorit të madh, në ambientet e spitalit të trondit, për më tepër nga indiferenca e shtetit karshi një artisti të madh .
Aktori qëndron i ulur në një karrige, me duar të kryqëzuara në një nga korridoret e Qendrës Spitalore Universitare “Nënë Tereza” duke pritur që të mjekohet, ndërsa më shumë se çdo gjë tjetër tregon mjerim edhe pse aktorë të të tilla përmasave në botë janë gjithmonë të vlerësuar e të përkrahur maksimalisht nga shteti.
Pak kohë më parë, ai festoi 75-vjetorin e lindjes, ndërsa tashmë sëmundja nga e cila vuan prej kohësh e ka bërë të lërë skenën dhe të endet korridoreve të spitalit.
Regjisori i shfaqjes, Milto Kutali që po zhvillon provat për premierën “Mendohu Xhakomino” të Pirandelos në shtëpi me aktorin për shfaqjen e datës 8 shkurt pohon se realisht aktori kaloi një gjendje gripale shumë të rënduar javën e kaluar, gjë që në rastin e një aktori krijon edhe probleme me zërin.
Kutali është shprehur se, “Ndrenika ka kërkuar vetë që të bëjë provat në shtëpi dhe gjendja e tij po përmirësohet. Gjithashtu edhe burime nga Drejtoria e Teatrit të Metropolit pohojnë se, “Aktori Robert Ndrenika është shumë mirë me shëndet dhe nesër do të jetë në Teatrin e Metropolit për të zhvilluar provat për premierën “Mendohu Xhakomino.

Shqipëria në këmbë më 18 shkurt

Kryetari i Partisë Demokratike, Lulzim Basha shpalli mbrëmjen e djeshme 18 shkurtin si ditën e nisjes së protestave popullore. Protesta do të zhvillohet për mbrojtjen e zgjedhjeve të lira si dhe kundër krimit, drogës, varfërisë e shtypjes qeveritare  që solli Rama bashkë me qeverinë në këto katër vite. Përmes një postimi në facebook, Basha thotë se, vetëm me kurajo dhe vendosmëri pushteti i grabitur në këto vite do të rikthehet sërish tek njerëzit. “I ftoj të gjithë bashkëqytetarët në një manifestim kundër qeverisë më 18 shkurt, në Tiranë. Të protestojmë bashkë kundër padrejtësive dhe varfërisë, kundër shëndetësisë që lëngon dhe arsimit të shkatërruar, kundër arrogancës dhe shtypjes qeveritare, kundër drogës, krimit dhe kriminelëve në politikë. Të mbrojmë lirinë për të zgjedhur dhe të tregojmë vendosmërinë për të ruajtur votën. Vetëm me kurajo dhe vendosmëri mund ta kthejmë pushtetin tek njerëzit”, shprehet Basha në postimin e tij. Po dje, gjatë mbledhjes së kryesisë së PD, Basha denoncoi skenarin e Ramës për të mbajtur pushtetin me paratë e krimit dhe drogës ndërsa tha se do të shmanget nga reagimi popullor. “Që tani e kanë ndarë hesapin e zgjedhjeve. I dëgjoni se si i numërojnë votat, i japin dhe i heqin mandate njëri-tjetrit dhe nuk kanë nevojë për votën e njerëzve. Nuk i llogarisin njerëzit. Pazare, parcela ku klonohen parti klienteliste që ndajnë si plaçkë pasuritë e shqiptarëve. Ky është qëllimi. Nuk ka më politikë, por luftë për plaçkë. Prandaj zgjedhjet u prishin punë. Nuk duan zgjedhje.  Kanë marrë peng Shqipërinë. Tani duan të marrin peng edhe zgjedhjet që ta mbajnë Shqipërinë kështu siç është. Ta mbajnë pushtetin, të mbajnë krimin në pushtet dhe të shtojnë miliardat e tyre. Ky është skenari, kjo është e vërteta. Ne e dimë dhe çdo shqiptar e di. Pyesni çdo shqiptar jashtë kësaj salle dhe ndërtese, në këtë qytet dhe në çdo qytet të Shqipërisë. Të gjithë do të thonë që kjo qeveri nuk do zgjedhje të lira dhe të ndershme. Sepse do që të mbajnë gjendjen kështu siç është.  Ky skenar mund, duhet dhe do të shmanget vetëm nga njerëzit, nga reagimi i tyre. Vetëm nga qytetarët e bashkuar dhe reagimi i tyre. Ndaj jemi mbledhur sot (dje) këtu dhe do të mblidhemi në forume të tjera të kësaj partie sepse detyra jonë si demokratë është që të bëjmë gjithçka për të zgjuar, mobilizuar dhe mbështetur reagimin e qytetarëve. Për të qenë zëri i tyre dhe mbështetësja e tyre në çdo formë reagimi demokratik për të reaguar për zgjedhje të lira dhe të ndershme” tha Basha. Ai theksoi se zgjedhjet e lira dhe të ndershme nuk janë një çështje e interesave të PD-së, por zgjedhjet e lira janë çështje jetike për njerëzit, të vendit, të shoqërisë, së kombit.  “Sa më parë t’i presim rrugën të keqes aq më pak kosto do të kemi, aq më pak do të dëmtohen jetët dhe e ardhmja e vendit. Sot është momenti që Shqipëria të ndahet njëherë e përgjithmonë nga krimi në politikë, nga qeverisja e inkriminuar dhe nga vjedhja e zgjedhjeve. Rruga që e nxjerr vendin nga kjo gjendje që kjo qeveri kërkon ta ruajë me çdo kusht, është rruga e zgjedhjeve të lira dhe të ndershme. Kjo është zgjidhja. Nuk ka tjetër. Demokratët dhe opozita janë të bashkuar e të vendosur për këtë qëllim. Sot dua të ftoj edhe partitë e çdo krahu politik, intelektualët, ftoj shqiptarët pa dallime politike që të bashkohemi për të çliruar me çdo kusht shansin më të madh që demokracia u jep qytetarëve të lirë: votën e lirë. Kjo është beteja. Opozita dhe Partia Demokratike do të jetë në ballë të saj” u shpreh kreu i PD.

Basha:Të mbrojmë lirinë e votës

Mbrojtja e lirisë së votës ishte kryefjala e kreut të PD, Basha në mbledhjen e mbrëmshme të Kryesisë ku u diskutua mbi aksionin opozitar për daljen e vendit nga kriza. “Pas mbledhjes së fundit të Kryesisë, ku ju informova për turin e takimeve në Uashington, në Bruksel dhe në Berlin që do të ndërmerrja, dhe pasi vendosëm përsa i përket organizimit të fushatës elektorale, mbledhja e sotme (djeshme) ka për qëllim, diskutim dhe vendimmarrje në raport me dy çështje shumë të rëndësishme që kanë të bëjnë me procesin e zgjedhjeve të lira dhe të ndershme, garantimin e votës së lirë, si misioni themelor i Partisë Demokratike, si një interes jetik, shoqëror dhe kombëtar. Sot jemi dëshmitarë të bllokimit total të integrimit të Shqipërisë në Bashkimin Europian. Investimet e huaja janë bllokuar. Ekonomia është në gjendje të mjeruar. Askund nuk ka punë. Shqiptarët po vazhdojnë të largohen masivisht nga vendi, gjendja e Shqipërisë është pa shpresë për të ardhmen. Dalja nga kjo gjendje është e qartë, mesazhet i kam marrë në Uashington, në Bruksel dhe në Berlin, nga përfaqësuesit më të lartë të politikës amerikane dhe europiane. Mesazhet janë konfirmuar nga Rezoluta unanime e Asamblesë Politike të Partisë Popullore Europiane, nga raporti i Këshillit të Europës dhe dje nga rezoluta e kaluar nga Komisioni i Jashtëm i Parlamentit Europian dhe dalja e Shqipërisë nga kjo gjendje është e qartë: Kalon përmes zgjedhjeve të lira dhe të ndershme, kalon përmes luftës kundër krimit të organizuar, kalon përmes largimit të kriminelëve nga politika, kalon përmes parandalimit dhe kultivimit të drogës dhe trafiqeve të drogës, kalon përmes luftës së korrupsionit qeveritar dhe pa dyshim përmes Reformës në Drejtësi sipas përcaktimeve kushtetuese. Kjo është dalja e Shqipërisë nga kriza ku ndodhet. Zgjedhjet e lira dhe të ndershme janë potencuar si kusht i patejkalueshëm për integrimin e vendit dhe padyshim për të gjitha pasojat pozitive që kjo ka për ekonominë, për shoqërinë, për punësimin, për të ardhurat, por duket se rilindja e 1 Prillit ka vetëm një qëllim: të ruajë gjendjen aktuale. Të ruajë me çdo kush status quo-në, ta mbajë Shqipërinë kështu siç është, me këtë politikë, të pandryshuar, sepse kjo gjendje ju siguron atyre pasurimin dhe pushtetin” tha Basha. Ai theksoi se pakica në pushtet është pasuruar në mënyrë marramendëse. Ka siguruar miliarda përmes drogës dhe trafiqeve, përmes krimit dhe përmes koncesioneve dhe korrupsionit qeveritar. I ka siguruar vetes luks të pakufizuar, pushtet të pakufizuar. Dëgjoni dëshmitë e ish-ministrit të Drejtësisë Manjani për të kuptuar përmasat e krimit, korrupsionit dhe degjenerimit qeveritar. Që të ruajnë dhe të shtojnë pasurinë që kanë vënë, duhet që droga të vazhdojë të mbillet dhe të mbillet edhe më shumë këtë vit, duhet që Balili me shokë të vazhdojnë të punojnë të lirë dhe të paprekshëm që të vazhdojnë trafiqet miliona euroshe, duhet që klientët e tyre të vazhdojnë të marrin tendera dhe koncesione prej miliarda lekë të taksapaguesve shqiptarë” u shpreh kreu i PD.

Opozita zotëron emrat e rrjetit kriminal të Ramës për vjedhjen e zgjedhjeve

Edi Rama, me ministrin e tij të drogës, Saimir Tahirin dhe me një kupolë drejtuesish të korruptuar në krye të Policisë së Shtetit, kanë krijuar qark më qark në të gjithë vendin një rrjet kriminal të përbërë nga kriminelë të regjur, nga eksponentë të njohur të krimit të organizuar, nga ish-të dënuar për krime të rënda, nga narkotrafikantë të skeduar ndërkombëtarisht dhe nga banditë të hurit e të litarit që kanë marrë detyrë të blejnë vota, të dhunojnë zgjedhësit dhe zgjedhjet për llogari të Edi Ramës dhe klikës së tij. Kreu i PD, tha dje se opozita e zotëron emër për emër organizmin e këtij rrjeti, ndërkombëtarët janë në dijeni gjithashtu. “Qytetarët, në çdo qytet dhe në çdo fshat, njohin me emër e mbiemër bandën e zonës. Duke dashur të fshihet pas gjethes së fikut, Edi Rama i ka shpërndarë këto skuadrone sa rreth vetes së tij, sa i ka depozituar në xhepat e disa partive aleate, të disa formacioneve, të cilat i bën gati t’i lançojë në këto zgjedhje. Fshehja nga kjo qeveri e Eskobarit të Ballkanit të kërkuar ndërkombëtarisht prej më shumë se një viti, ka për qëllim që bashkë me fshehjen e ortakërive, që Eskobari i Ballkanit ka me ministrat e kësaj qeverie t’u japë një mesazh narkotrafikantëve dhe banditëve të angazhuar në pushtimin e zgjedhjeve se Edi Rama me Saimir Tahirin do t’i mbrojnë deri në fund. Droga prodhon para për të blerë vota, por prodhon edhe kushtëzimin e votës për qindra mijëra njerëz të thjeshtë në  vështirësi për bukën e gojës, për bukën e fëmijëve, të cilëve qeveria nuk u dha asnjë mundësi për të jetuar me dinjitet, ndaj i thërret si skllevër për t’u punësuar në të zezë dhe do t’u kërkohet me kërbaç të japin votën, përndryshe nuk paguhen.  Miliardat e koncesioneve dhe tenderave korruptivë që u janë dhënë klientëve të një rrethi të ngushtë, jo vetëm për t’i ndarë së bashku për jetën luksioze, por edhe për t’i hedhur në zgjedhje, për të kapur zgjedhjet. Mbi mjerimin që mbollën këto katër vjet amembanë vendit po bëhen gati të lëshojnë lukuninë e krimit dhe lumin e parave të pista. E vetmja gjë që i garanton, që të vazhdojë droga, të vazhdojë vjedhja, të vazhdojë pasurimi dhe pushteti i tyre, është mbajtja e pushtetit politik me çdo kusht. E vetmja mënyrë për ta mbajtur pushtetin është kapja, është shkatërrimi i zgjedhjeve. Sepse zgjedhjet e lira janë fundi i kriminelëve në politikë, janë fundi i koncesioneve miliardëshe, janë fundi i këtyre politikanëve të panginjur dhe arrogantë të lidhur me krimin. Prandaj me qëllim që të marrin peng zgjedhjet, që të asgjësojnë zgjedhjet, janë bërë gati që të përdorin stokun e stërmadh të parave të zeza të trafiqeve të drogës dhe krimit të koncesioneve të korrupsionit qeveritar dhe nga ana tjetër janë bërë gati të përdorin kriminelët për të kërcënuar votën e lirë, për të manipuluar votuesit, administratën zgjedhore, si edhe të përdorin median e kapur për të fshehur manipulimin. Ky është skenari i qartë në sytë e çdo shqiptari. Blerja e votës dhe mbështetja për vjedhjen e votës dhe kërcënimi i njerëzve të lirë. Ky është skenari që do të shkatërrojë të ardhmen e Shqipërisë. Të ardhmen e familjeve, fëmijëve, rinisë, të ardhmen e vendit. Këtë skenar tashmë e kanë denoncuar para medias edhe vetë anëtarët e qeverisë si ish-ministri i Drejtësisë dhe ministri aktual i Ambientit” tha Basha.

Analiza e UKT/ Reagon Xhelal Mziu: Ja shpifjet e radhës së kolegut mashtrues Erion Veliaj

Eshtë e qartë se nuk mund ta njohesh realitetin kur je 3 ditë jashtë e 1 ditë në punë. Kjo i ka ndodhur Veliajt i cili, edhe pse prej dy vitesh është në krye të Bashkisë së Tiranës, nuk njeh ende kufijtë territorialë, edhe pse ndarja është bërë me ishuj, kujtojme qytetaret e Zall Herrit duhet te kalojne neper Kamez per te shkuar ne qendren e Njesise Administrative Tirane, ndarje politike!
Drejtoria e UKT ku sot ka bere analizen kolegu mashtrues i Tiranes eshte ne teritorin e Kamzes (qe brenda pranveres do merret nga Bashkia Kamez), por tubacioni qe kalon nga impianti i Bovilles drejt Tiranes menaxhohet nga UKT-ja e tij, pra nese ka abuzim apo vjedhje faj eshte i turistit me luksoz ne Shqiperi, kreut te Bashkise Tiranes. Sepse eshte nen menaxhimin e tij.
Ku e gjen kurajon kolegu mashtrues qe cdo dite merr nen mbrojtjen politike te qeverise:
-Territore padrejtesisht nga Kamza,
– Pyje nga Kamza.
– Qe merr funksione te deleguara nga qeveria qe duhet ti merrte Kamza por jane marre padrejtesisht nga Tirana si:
– Repartin e zjarrfikseve te Kamzes.
-Makinerite e financimin e Kullimit dhe Vaditjes qe i takonte Kamzes.
– Konviktin e shkolles mesme qe i takonte Kamzes.
– Fondin e Mirmbajtjes se rrugeve qe i takonte Kamzes
-Administrimin e pyjeve qe i takonte Kamzes.
Fakt eshte se Kamza ka aplikuar per 4 vite mbi 120 projekte tek qeveria, te refuzuara te gjitha, ndersa Bashkia e Tiranes ka marre 33,5 here me shume leke per fryme per banoret e Tiranes. A nuk jane njesoj banore, me te drejta te njejta si ne Kamez si ne Tirane?
Kjo eshte e verteta.
Veliaj ka kapur mediat dhe çdo mashtrim i tij behet lajm.
Po realiteti qe prekin e njohin qytetaret nuk ndryshohet me propagande te rreme.
Realiteti ndryshon duke u sherbyer njerezve, pavaresisht ku banojne, dhe per ke votojne.

1...7 3077 3087 309...8 322Faqja 7 308 nga 8 322

Kryesore

Continue to the category
Më shumë
© 2024 Rilindja Demokratike Euroatlantike