Kryetari i Grupit parlamentar të PD-së, Edi Paloka ka folur dje për refuzimin e Kryeministrit për të marrë pjesë në Mbledhjen e Këshillit të Sigurisë Kombëtare. “Rama refuzon të marrë pjesë në Këshillin e Sigurisë Kombëtare me temë: ‘Pse nuk arrestohet Klement Balili’? Çfarë di Edi Rama për Klement Balilin që refuzon të japë informacion? Pse ka frikë Edi Rama të ballafaqohet? A po e mban peng Klement Balili, Edi Ramën? Klement Balili është dëshmi e kontrollit të krimit mbi qeverinë, është dëshmi e bashkëqeverisjes së Edi Ramës me krimin. Krimi e solli në pushtet, me krimin po e mban pushtetin dhe përmes krimit shpreson ta rimarrë atë. Ne nuk mund ta lëmë vendin peng të krimit, peng të Ramës, balilëve, habilëve, tahirëve, Lul Berishës, Shullazit, ndokëve, roshëve, bushëve, etj. Ja përse më 18 qershor, ne duhet të bashkohemi për të ndalur këtë të keqe e për t’i hapur rrugë zgjedhjeve të lira dhe të ndershme, ku qytetarët me vullnet të lirë të vendosin për të ardhmen e tyre”, tha Paloka.
Aferat Rama-Sula, mungojnë deri në 100 mijë tonë naftë
Megavjedhjet e Ramës dhe ortakut të tij Besnik Sula në industrinë e naftës kanë qenë dje pjesë e denoncimeve të ish-kryeministrit Berisha në Parlament. Berisha reagoi edhe në lidhje me shkarkimin e ish-ministrit të Drejtësisë, Ylli Manjani ndërsa tha se akuzat e tij janë tronditëse. “Mund të duket bizarre, por unë kam një propozim: t’i japim fjalën në këtë Parlament ish-ministrit të Drejtësisë, Ylli Manjani. Ai foli në konferencë shtypi, por akuzat e tij janë tronditëse dhe përmbysëse. Nuk mund të jetë Parlamenti indiferent dhe i pandjeshëm ndaj zërit të tij. Unë e kuptoj se organizata kriminale që kam këtu pas meje është e tmerruar dhe nuk e bën këtë, por ne si deputetë duhet t’i vemë në provë a kanë durim ta shohin drejt në sy Ylli Manjanin apo jo. A kanë guxim? Deri tani i keni marrë akuzat nga opozita, tani që i keni marrë nga qeveria çfarë do i thoni vetes?
Lidhur me naftën më kërkoi zotëria të them dy fjalë. A e di çfarë më thotë një mesazh që e kam këtu? Më njofton se inspektorë të Tatimeve, grupi i akcizës më saktë u paraqit për të kontrolluar ndërmarrjen e banditëve Rama-Sula, sepse janë mbi 60 mijë tonë që mungojnë dhe tani mund të jenë bërë dhe 80-100 mijë. Çfarë ndodhi? Pasi filluan dhe po gjenin një katastrofë, se ju e dini që ai paguan me rroga deputetët këtu të PS që folën për naftën, por dhe ata që s’folën, i paguan, por nuk paguan sigurimet shoqërore, kanë 18 muaj që 1200 punëtorë të Ballshit nuk u është paguar 1 qindarkë. Dhe çfarë bëri kushërira e mamasë, ndikull Belinda? E pezulloi kontrollin, shkoi e u tha ose do e nxirrni siç duhet ose ikni. A do më nga nafta? Se meqë më the fol.
Po çfarë kërkon ti më tepër kur banda e qeverisë gjobit me Kontroll Shteti 432 milionë euro në CEZ? Çfarë kërkon ti kur Rama me CEZ dhe ministrin e tij famëzi ndan 630 e ca milionë euro? Çfarë kërkon ti kur në katër vjet nuk ka investuar një qindarkë përveç investimeve që trashëguat nga qeveria e mëparshme? Çfarë do ti më shumë për energjinë kur përzutë Bankers, e cila rriti nxjerrjen e naftës nga 300 mijë tonë në 1 mln e 200 mijë tonë? Çfarë do ti më shumë për energjinë kur larguat me dhjetëra kompani që do të ndërtonin HEC në katër anët e vendit? Apo kur bosi yt iu kërkon 10 mln euro? Do pra më për Belulin?! Vjedhje dhe vetëm vjedhje. Çfarë do ti më shumë për energjinë kur vetëm investime të huaja në Shqipëri me të cilat rreh gjoksin kjo qeveri janë Fani dhe Devolli me TAP-in, që të gjitha kontrata të firmosura nga qeveria e mëparshme? Çfarë do ti më shumë për energjinë kur linja e prokuruar e transmetimit Tiranë-Prishtinë e tenderuar nga qeveria e mëparshme falë miqësisë së Ramës me Vuçiçin i është vënë kyçi dhe nuk funksionon. Dhe bëni gjoja ligje. Pse letra të vdekura doni të bëni? Ato nuk kanë vlerë.
Para se të largohem, unë do të dënoj me ashpërsinë më të madhe aktin e pashembullt të trafikantit të drogës, që ka mbjellë fshatin me Olsi Ramën me parcela droge, që ka qenë anëtar i grupit të tij në Boston, dhe largimin e tre prej kompozitorëve aktualisht më të shquar të vendit, që kanë përbërë gjeninë krijuese më cilësore. Por një piktor dështak ka vetëm urrejtje për artistët e vërtetë. Duke mos njohur në jetën e tij sukses, por vetëm dështim, do t’i godasë ata njëri pas tjetrit. Çfarë kishit ju me Shpëtim Saraçin, i lindur në TV për formimin e tij dhe muzikën shqiptare, apo me Edmond Zhulalin dhe Alfred Kaçinarin? Po keni fytyrë të dilni para shqiptarëve me këtë akt që bëni? Dhe përdorni pretekste absurde. Ky është një akt i dënueshëm, i një njeriu të cilin e kam denoncuar po këtu në Parlament, mesazhet që vinin për plantacionet e drogës me Olsi Ramën, dhe mediat njoftuan se forcat e rendit në Kolonjë shkuan në destinacion tjetër dhe jo në plantacionet Rama-Gëllçi. Dhe ky njeri, ky antivlerë e vërtetë merr guximin të largojë tre gjeni të muzikës dhe kompozimit të Shqipërisë”, tha Berisha.
Blushi: Shteti nuk funksionon, Rama nuk garanton stabilitet
Deputeti dhe themeluesi i LIBRA-s, Ben Blushi tha në fjalën e tij në Kuvend se ajo çka po ndodh me koalicionin qeverisës tregon se Rama është i paaftë për të garantuar stabilitet politik. Ai tha se shteti ka rënë, ndërsa Shqipëria është zhytur në kaos. “Ngjarjet e fundit me kolicionin qeveritar treguan një gjë që unë e kam thënë dhe e besoj prej kohësh që kryeministri që kemi është i paaftë për të garantuar një stabilitetet politik, administrativ dhe kushtetues në Republikën tonë. Shqipëria e zhytur në kaos, kaosi është i vetmi rregull dhe mungesa e rregullit është i vetmi rregull. Shteti nuk funksionion më”, tha Blushi. Po dje, Blushi ka sulmuar fort Ilir Metën, duke e konsideruar si rival në krim së bashku me Ramën. Meta, tha ai, preokupohet vetëm për të na treguar sa i paaftë është Rama. “Mbasi shkatërroi PS, Rama po shkatërron LSI-në me ndihmën e Ilir Metës. LSI është viktima e fundit e një njeriu që di vetëm të shkatërrojë”, tha ai. Blushi ka përmendur edhe paradoksin e fundit që shqiptarët po vërejnë me LSI-në. Kur dalin krerët e saj që akuzojnë qeverinë dhe pastaj shfaqet Meta për të ulur gjakrat. “Ai flet me gojën e Vasilit se policia është bashkëpunëtore në krim, pastaj me të Tavos se bashkitë po përgatiten të vjedhin zgjedhjet, pastaj nxjerr Luanin të thotë se mund të shkarkonim edhe kryeministrin”. Në këtë kontekst Blushi i ka bërë një pyetje ironike: “O Ilir, kur do të flasësh me gojën tënde”, ka pyetur ai duke e konsideruar Metën si një llogaritar që mendon se kush do të bëjë 71 vota dhe sillet si tregtar, por jo si një politikan me moral.
Beteja me bandën në çdo pëllëmbë të territorit
“Të zëmë sheshin, të betuar që s’do të largohemi pa shpëtuar vendin nga këta banditë e t’u tregojmë vendin që këta meritojnë”. Me këto fjalë, ish-Kryeministri Berisha u bëri thirrje qytetarëve dje të ngrihen në protestë, ndërsa tha se revolta popullore në sheshe është zgjidhja e vetme për t’i dhënë fund banditokracisë që po qeveris vendin. Berisha tha se vendi sot është i kërcënuar më shumë se kurrë ndonjëherë më parë në historinë e tij. Ish-Kryeministri theksoi se kur ekzekutivi është organizatë kriminale, fuqia e krimit është e pakufishme, pushteti i krimit është i pakufishëm dhe penetron në çdo skaj të territorit, në çdo institucion, në çdo qelizë të jetës së vendit.
“Beteja me banditokracinë është betejë e hapur dhe do të bëhet pëllëmbë për pëllëmbë, do të bëhet hap pas hapi, do të bëhet në çdo etapë. Vendi sot është më i kërcënuar se kurrë në tërë historinë e tij. Të gjitha këto të vijë t’i thotë këtu ai. Nga na del i biri me ‘BMV’ 260 mijë euro?
Çfarë mund të bëjë tjetër një banditokraci?! Sa janë të vdekurit në burgje? Ku mund të ndodhë përveçse në një banditokraci që rrugaçë me uniformë, vënë në ndjekje prokurorë dhe mbajnë fjalë për reformë? Një hordhi horrash që s’i ka toka. Flasin për reformë në një kohë kur u venë prokurorëve kriminelë me uniformë mbrapa. Në cilin shtet ndodh kjo? Në cilin regjim ndodh kjo? Kjo ndodh vetëm në banditokraci.
E them unë këtë? Jo e tha ministri i Drejtësisë, i cili pikërisht pse i tha këto u largua, iku. Cili vend në botë ka arritur që, në një kohë të shkurtër, në një hark kohor dyvjeçar të shndërrohet në Kolumbi, të shndërrohet në Kanabistan, të shndërrohet në prodhuesin kryesor të kanabisit në Europë dhe mafia e tij të cilësohet e treta më e rrezikshmja në botë?
Kjo ndodh vetëm në një rrethanë; kur këta që janë pas meje janë thjesht një organizatë kriminale. Kur ekzekutivi është organizatë kriminale, fuqia e krimit është e pakufishme, pushteti i krimit është i pakufishëm, ai penetron në çdo skaj të territorit, në çdo institucion, në çdo qelizë të jetës së vendit. Ndaj dhe kjo është Banditistan!
Ku ndodh që nga ndërtesa e kryebanditit të organizohen programe për të vjedhur të dhënat e komunikimit të qytetarëve. Pse ndodh kjo? Sepse kryebanditi ka gjetur një kushërirë të verbër që i lejon vetes akte kriminale. Në cilin vend ndodh që drejtoresha e Tatimeve, kushërira e kryeministrit të sillet ndaj biznesit duke u çuar shkresa dhe letra terroriste? Kjo është politika e gjobëvënies për llogari të kushëririt. Pra, sot vendi është shndërruar në Banditistan. Çfarëdo që të bëjmë ne këtu, zgjidhje nuk ka sepse ky Parlament është i damkosur. Është në meritën e madhe të kësaj opozite që ju çori maskën dhe sot ju jeni mazhoranca më e pabesuar në Europë, institucioni më i pabesuar. Por prapë nuk është zgjidhja kjo.
Zgjidhja është sheshi! Qytetarë dhe qytetare, lufta me bandat është lufta më e vështirë, por ju garantoj për një gjë. Bandat vërtet i kanë të gjitha, kanë para, kanë eksploziv, kanë armë, por s’kanë një gjë që keni ju; ata s’kanë guximin që keni ju, ata janë të parët që ja mbathin si minj. Ndaj të zëmë sheshin, të betuar që s’do të largohemi pa shpëtuar vendin nga këta banditë që votën tuaj e shndërruan në pushtet bandash, në mbështetje të krimit, e shndërruan në krim, e shndërruan në izolim. Ndaj dhe të mblidhemi. Këtë betejë do ta fitojnë ato gra dhe burra, djem dhe vajza që do të betohen për të mos iu ndarë protestës deri në rrëzimin e këtyre. Kurrë ndonjëherë në histori, një protestë e zgjatur nuk ka dështuar dhe të jeni të sigurtë që do i shihni këta si do ja mbathin si minj, s’do të gjejnë vrimë ku të futen. Do i shihni se si do të kërkojnë azil politik në vendet përreth. Ndaj dhe thirrja ime më miqësore për çdo shqiptar pavarësisht nga bindjet partiake, që bie dakord se kemi të bëjmë me një bandë; të bashkohemi me guximin tonë t’u tregojmë vendin që këta meritojnë”, u shpreh Berisha.
Basha: 18 shkurti dita të ngrihemi bashkë
Kryetari i Partisë Demokratike, Lulzim Basha u shpreh dje me anë të një deklarate se, fakti që e majta po përgatitet të vjedhë zgjedhjet po thuhet sot me zë të lartë dhe nga diplomatët e huaj në vendin tonë. Basha tha se këtë mesazh e mbështesin dhe institucionet ligjzbatuese të vendit, shërbimet e huaja dhe vendase. Duke i ftuar qytetarët dhe një herë në protestën e 18 qershorit, Basha vuri në dukje se në një shoqëri ku mbizotëron krimi dhe droga, nuk prodhohet mirëqenie po vetëm krim dhe prapambetje. “Mbi gjithë zhurmën e propagandës në Shqipëri sot ka një mesazh që dëgjohet qartë: Politikanët e korruptuar dhe krimi duan të vjedhin zgjedhjet e ardhshme. Këtë mesazh po e thonë me zë të lartë qytetarët e thjeshtë dhe diplomatët e huaj, institucionet e drejtësisë dhe shërbimet sekrete të huaja dhe vendase, politikanët e huaj dhe vetë ministrat e qeverisë. Tonelatat e farës së hashashit që kanë hyrë muajt e fundit në Shqipëri janë pjesë e planit për të blerë dhe vjedhur vota, për të ruajtur pushtetin e tanishëm politik duke prishur zgjedhjet. Një shoqëri e rrethuar nga krimi dhe droga nuk prodhon punë, mirëqenie, shëndetësi dhe arsim. Një shoqëri e pushtuar nga droga prodhon krim dhe prapambetje. Ne mund ta ndalojmë këtë të keqe duke u ngritur së bashku. 18 shkurti është dita që populli të thotë fjalën e tij. 18 shkurti është dita për të nisur aksionin e kthimit të pushtetit tek qytetaret. 18 shkurti është dita të ngrihemi bashkë”, tha Basha.
Kreu i PD lajmëroi të mërkurën me anë të një postimi në rrjetet sociale, nisjen e protestave më datë 18 shkurt në Tiranë. Sipas asaj çka shkruan, Basha protesta do të zhvillohet kundër padrejtësive dhe varfërisë, sistemit shëndetësor dhe të gjitha vuajtjeve që solli Rama bashkë me qeverinë në këto katër vite. Basha thotë se, vetëm me kurajo dhe vendosmëri pushteti i grabitur në këto vite do të rikthehet sërish tek njerëzit. “I ftoj të gjithë bashkëqytetarët në një manifestim kundër qeverisë më 18 shkurt, në Tiranë. Të protestojmë bashkë kundër padrejtësive dhe varfërisë, kundër shëndetësisë që lëngon dhe arsimit të shkatërruar, kundër arrogancës dhe shtypjes qeveritare, kundër drogës, krimit dhe kriminelëve në politikë. Të mbrojmë lirinë për të zgjedhur dhe të tregojmë vendosmërinë për të ruajtur votën. Vetëm me kurajo dhe vendosmëri mund ta kthejmë pushtetin tek njerëzit”, shprehet Basha në postimin e tij.
Rama u përgjua duke kërkuar miliona euro
Ish-Kryeministri Berisha deklaroi dje në Parlament se ekzistojnë regjistrime ku Rama shfaqet duke kërkuar miliona euro ryshfet. Berisha deklaroi se Rama është në krye të bandave që sot kërcënojnë vendin, ndërsa denoncoi presionet dhe shantazhet e Ramës ndaj gjyqtarëve, lidhjet e tij me emrat më famëkeq të krimit të organizuar si Emiljano Shullazi etj.
“Edi Rama ka komunikim direkt me banditët. Janë të regjistruara. Edi Rama është bandit. I vetmi politikan sot në Shqipëri që është akuzuar publikisht nga biznesmenë se u ka kërkuar 600 mijë apo 1 milion. Mirëpo tani del tjetra; tani është në shirit, është i regjistruar duke kërkuar shumë milionë. Shifrën do ta merrni vesh. Është i regjistruar në shirit.
(ndërhyrje në sallë për termin shirit)…. Kjo nuk ju mbron ju. Nuk është mbrojtje kjo që thoni se s’ka shirit. Ka mjete të tjera sot shumë herë më të sofistikuara, por unë e thashë se jeni gjysma analfabetë këtu dhe me diploma falso, ndaj përdora fjalën shirit që ta kuptoni. Ju keni ministrat pa shkollë pa lëreni më ju.
Edi Rama është banditi, mercenar politik, i cili, tipike si një bandit, ka krijuar sot problemet më të mëdha me fqinjët tanë, me vëllezërit tanë. Si i ka krijuar? Me sjelljen e tij si bandit.
Merrni analizoni dy gjëra. Ka një paralelizëm si kurrë ndonjëherë midis vizitave të Tiranës në Beograd, më të shpeshta se në vitet ‘46–‘47, si vizita të nivelit më të lartë.
Merrni ju marrëdhëniet me udhëheqjen e Kosovës dhe Kosovën, janë sot të nivelit të Enver Hoxhës, pra më të këqia se asnjëherë. Të tilla janë marrëdhëniet me fqinjët e Jugut, të tilla janë marrëdhëniet me Maqedoninë. Pse janë? Sepse ai s’ka parime, Rama është bandit dhe banditi ka vetëm interesa bande.
Si mercenar politik ndërmori sulmin më të shpërfytyruar kundër atij që sot është presidenti i SHBA. Unë ja u them këtu se ajo është e regjistruar shumë mirë në memorien e asaj shumice dhe atij vendi. Dhe Shqipëria, sa kohë të mbajë një kryeministër si Edi Rama, dënon veten e vet në raport, në marrëdhënien më jetike të kombit, të vendit, të Kosovës për të sotmen dhe të ardhmen e tij.
Edi Rama është kreu i bandave. E kam denoncuar këtu kur i thoshte gjykatëses së Kukësit: ‘Ti je rrugaç’ se i thoshte ‘unë të pres këmbët!’. A keni dëgjuar ndonjëherë ju t’i thuhet gjykatëses 30 vjet në profesion: ‘Unë t’i pres këmbët?!’. Pse? Se duhet të mbante në burg me çdo kusht një fukara që nuk kishte paguar faturën e energjisë!
Të njëjtin kërcënim i bëri gjykatësit të Krujës, fatmirësisht këtë denoncim këtij banditi, këtij shefi të banditistanit ja bëri direkt ministri i Drejtësisë, i cili pagoi çmimin pikërisht për mospajtimin.
Edi Rama është bandit sepse rezulton, nga ato që thotë ministri, se ka shkelur çdo rregull në përdorimin e pasurive publike të vendit, ka shpërfillur çdo oponencë të Ministrisë së Drejtësisë.
E keni vënë re se Ministria e Drejtësisë është kthyer në varrmihësen e ministrave? Vasil, ku je?! Atje do të përfundosh dhe ti!
Oponencat ministrit të Drejtësisë ja njeh ligji, ministri i Drejtësisë jeton në një kolektiv që nga mëngjesi në darkë merren me ligje dhe atje e kanë të vështirë të devijojnë. Por, pikërisht për këto oponenca priteshin kokat e ministrave. Njësoj si i pari dhe i dyti, edhe i treti shumë shpejt të njëjtën gjë do të pësojë. Ministria e Drejtësisë është shndërruar në një varrmihëse të ministrave sepse kreu i bandave s’mund ta pranojë ligjin.
Edi Rama është kreu i bandave, lidhjet e tij me Emiljano Shullazin shkuan deri në atë shkallë sa ja rrëmbeu edhe Saje qorrit mikun e vet, ja përvetësoi për vete. Edi Rama është kreu i bandave. Ai e dini ju që këto kërcënimet, firmosjet në hipoteka me revole tek koka i kam denoncuar unë këtu në Parlament. Po kur i kisha marrë vesh unë, Rama i kishte marrë vesh dhjetë herë para meje.
A e shihni gjyqin e atij shqiptarit të ndershëm që po tund Shqipërinë me dëshminë e tij, Ylvi Beqes? Tani mësojeni nga unë: në atë aferë është i përfshirë direkt Edi Rama, po këtë herë nuk është i përfshirë me Shullazin, por është përfshirë me Dabullët, me ata të Hakmarrjes për Drejtësi si përfaqësues legal i tyre!
Ku je ti Arta që ndërsen gazetën tënde (Java) kundër kryetarit të partisë? E paraqet kryetarin e partisë si prostitutë vetëm se të kundërvihet për presidente. Turp!
Nuk mund të bëhesh presidente se djemtë i ke anëtarë kryesorë të ‘Hakmarrjes për drejtësi’, po, po e di edhe ti Gramoz. Dhe sot hapet gazeta duke e quajtur prostitutë. Arta ke bërë gabim shumë të madh që ke përdorur atë term, ke bërë gabim fatal… kjo është fakt se si përdoret media si hanxhar”, tha Berisha gjatë fjalës së tij në Parlament.
Llalla: Perse më sulmon ambasadori Lu?
Prokurori i Përgjithshëm Adriatik Llalla ka sqaruar dje arsyet se përse sipas tij po sulmohet nga ambasadori Donald Lu. Llalla qenë i ashpër dje me ambasadorin e Shteteve të Bashkuara Donald Lu, të cilin e ka akuzuar se po i bën presion të hapur institucionit të akuzës për qëllime personale. Lidhje me Soros, vënie nën presion për të shmangur hetimin ndaj Bankers Petrolium, revokim vizash të Prokurorit të Përgjithshëm apo dhe anëtares së sapozgjedhur të KED, me qëllim pengimin e hetimeve për deputetë të dyshuar për lidhje me organizata kriminale ishin të tjera akuza që Llalla hodhi në drejtim të ambasadorit Lu. Përgjigja e Llallës erdhi pas sulmit që ambasadori Lu i bëri paraditen e djeshme, për kundërshtitë që institucioni i hetimit ka pasur në lidhje me Reformën në Drejtësi. “Është shumë e rëndësishme që ambasadori Lu të lexojë variantin zyrtar, si në shqip, ashtu edhe në anglisht. Prokuroria e Përgjithshme i bën të qartë zotit Lu se, nëse është mësuar të jetë zot në ambientet e politikës shqiptare, këtë nuk mund ta realizojë me institucionin e Prokurorisë. Për fat të keq, Kushtetuta e Republikës së Shqipërisë ka shumë paqartësi brenda, të cilat kanë shkaktuar kaos institucional të papranueshëm. Zoti Lu mendon se ka në dorën e tij fatin e Prokurorisë, kur shantazhon institucionin për mbyllje hetimesh apo me heqje vizash. Duhet ta ketë të qartë ai dhe kushdo tjetër që, për të përmbushur detyrimet kushtetuese dhe ligjore, prokurorët e Republikës nuk kanë nevojë për viza. Këto presione të ambasadorit amerikan në Tiranë janë tipike sorosiane, të cilat kërkojnë të manipulojnë opinionin publik dhe të zhvlerësojnë institucionin”, tha Llalla në deklaratën zyrtare për këtë çështje.
Letra
Më tej, shefja e Kabinetit të Prokurorisë, Fjoralba Ballauri, prezantoi një letër që Prokurori i Përgjithshëm i dërgon Presidentit të Republikës Bujar Nishani, dhe kreut të Kuvendit Ilir Meta. Letra përmban një mal me akuza ndaj ambasadorit Lu, që nga revokimi i vizave dhe presionet e shantazhet për hetimin e çështjeve të caktuara. Sipas Llallës, i gjithë ky shantazh ka ardhur pas qëndrimeve kundërshtuese të institucionit të Prokurorisë, në lidhje me ndryshimet kushtetuese që kanë të bëjnë me Reformën në Drejtësi, ku sipas Llallës Prokuroria ka pasur kundërshtitë e veta. “Pak javë më parë, Ambasada e SHBA në Tiranë njoftoi Prokurorin e Përgjithshëm se është anuluar viza diplomatike e tij dhe e bashkëshortes së tij. Si shkak për këtë veprim tërësisht në kundërshtim me frymën e bashkëpunimit, ka shërbyer një udhëtim për arsye shëndetësore në SHBA, i bashkëshortes së Prokurorit të Përgjithshëm. Ky veprim i Ambasadorit Lu është vijim i sjelljeve shantazhuese që ai ka prezantuar ndaj institucionit të Prokurorisë së Përgjithshme. Gjithashtu, ambasadori Lu, në më shumë se njëherë, ka ushtruar presion ndaj Prokurorisë së Përgjithshme për të mos vijuar hetimet ndaj disa kompanive, për të cilat kanë ekzistuar dyshimet se kanë shkelur ligjet shqiptare. Rasti më flagrant, i cili është i dokumentuar me shkresë zyrtare, i bërë publik edhe në media, i referohet ndërhyrjes së drejtpërdrejtë të ambasadorit të SHBA në Tiranë, në hetimin që Prokuroria e Rrethit Gjyqësor Fier nisi ndaj kompanisë së naftës “Bankers Petroleum”. Kjo kompani akuzohej nga mediat dhe banorët e zonës, ku ushtron aktivitetin se u kishte sjellë dëme të pariparueshme në pasuritë dhe shëndetin e tyre. Për këtë rast, ambasadori Lu ka kërkuar, në kundërshtim me çdo lloj komunikimi diplomatik dhe ligjor, që hetimi të mos vijonte, pasi pasojat do të godisnin në mënyrë të drejtpërdrejtë Prokurorin e Përgjithshëm”, thuhet në letrën e Llallës.
Dekriminalizimi
Por, sipas organit së akuzës ambasadori Lu po bëhet pengesë dhe për zbatimin e ligjit të dekriminalizimit. “Prokuroria e Përgjithshme vlerëson se edhe veprimi aspak diplomatik ndaj prokurorëve është një reagim ndaj qëndrimeve parimore të tyre, të cilat nuk përkonin plotësisht me projektet ligjore të mbrojtura nga Ambasadori dhe disa prej ekspertëve të tjerë, vendas apo të huaj. Prokurori në fjalë, është një ndër zyrtarët më të rëndësishëm të Prokurorisë Shqiptare, sa i përket bashkëpunimit ndërkombëtar, sidomos në luftën kundër terrorizmit global dhe krimit të organizuar transnacional. Gjithashtu, në drejtim të strukturës shumë të rëndësishme të “Dekriminalizimit” në Prokurorinë e Përgjithshme, e cila tashmë ka nisur të japë rezultate konkrete në përjashtimin të disa deputetëve nga Kuvendi i Shqipërisë, si edhe të zyrtarëve të lartë nga administrata shtetërore, të cilët rezultojnë të përfshirë në veprimtarinë e krimit të organizuar brenda dhe jashtë territorit të Republikës së Shqipërisë. Kjo strukturë po vijon me veprimet e saj dhe rezultatet do të prekin edhe deputetë të tjerë të Kuvendit të Shqipërisë, kryesisht persona të cilët Ambasadori Amerikan në Tiranë i ka shantazhuar publikisht dhe privatisht për të siguruar vota parlamentare për kalimin në parlament të projektit të mbështetur prej tij për Reformën në Drejtësi, ku, mesazhe telefonike të dërguara nga kjo ambasadë, janë bërë publike edhe në media”, thuhet në letër.
Presioni ndaj kandidatit të Prokurorisë për KED
Një ditë para hedhjes së shortit nga Kuvendi i Shqipërisë për përzgjedhjen e anëtarëve të KED, për shkak të mungesës së konkurrencës, kandidati i vetëm për anëtarin nga Prokuroria e Përgjithshme në këtë strukturë, thirret me urgjencë nga konsulli në Ambasadën e Shteteve të Bashkuara të Amerikës. Prokurori gjendej në një takim të IPA 2014, Rrjetit të Prokurorëve të Ballkanit, i cili zhvillohej në Gjermani dhe u detyrua të rikthehej me urgjencë, duke vlerësuar se, për shkak të pozicionit si drejtor i Marrëdhënieve Juridiksionale me Jashtë, mund të ishin temë diskutimi çështje me rëndësi ndërkombëtare, përfshirë edhe terrorizmin. Në takimin në Ambasadën amerikane, Prokurori çuditërisht, nuk u prit nga konsulli, por nga një tjetër punonjës, i cili, pa dhënë asnjë shpjegim, i komunikoi asaj vendimin për revokimin e vizës amerikane. Fakti që Prokurori u kërkua me urgjencë në Ambasadën amerikane, vetëm një ditë para hedhjes së shortit për përzgjedhjen e anëtarëve të Këshillit të Emërimeve në Drejtësi, vlerësohet si një manovër aspak diplomatike, për të ushtruar shantazh ndaj përfaqësuesit të Prokurorisë, por edhe institucionit të Prokurorisë së Përgjithshme, për interesa të segmenteve të caktuara politike që synojnë kapjen e institucioneve të drejtësisë.
Reagimi për Reformën në Drejtësi
Në vlerësimin e Prokurorisë së Përgjithshme, kjo lëvizje, për të cilën ritheksojmë që është aspak diplomatike, ka disa arsye, të cilat lidhen me qëndrime dhe përfitime personale të ambasadorit të SHBA në Tiranë, z. Donald Lu. Prej kohësh, zoti Lu, duke u prezantuar si nxitës i Reformës në Drejtësi në Shqipëri, ka kërkuar me presion që Prokuroria e Përgjithshme të mbajë qëndrime hapur pro paketës ligjore, edhe në ato raste kur projektet ligjore, siç ka rezultuar më pas nga Opinioni i Komisionit të Venecias, kanë qenë tërësisht në kundërshtim me normat kushtetuese, si edhe me respektimin e të drejtave të njeriut. Në komunikimet zyrtare dhe informale, ambasadori Lu ia ka bërë të qartë Prokurorit të Përgjithshëm se, nëse nuk do të mbronte publikisht ndryshimet ligjore, do të kishte pasoja personale dhe institucionale.
Zgjedhjet në rrezik, po tentohet manipulimi
Ju sigurojmë se, institucioni i Prokurorisë nuk do të shantazhohet nga asnjë faktor, vendas apo i huaj, në përmbushjen e detyrimeve të saj kushtetuese dhe ligjore. Institucioni ynë është i vetëdijshëm se, me afrimin e zgjedhjeve të përgjithshme parlamentare në Shqipëri, të cilat zhvillohen në qershor 2017, segmente të ndryshme politike, të mbështetur edhe nga faktorë të jashtëm të lobuar, do të tentojnë të ushtrojnë presion ndaj Prokurorisë dhe Prokurorëve të Republikës. Ju garantojmë se do të merret çdo masë, për aq sa i takon institucionit, që të sigurohet vota e lirë. Prokuroria e Përgjithshme do të vijojë të ndjekë me përparësi të veçantë zbatimin e ligjit “Për Dekriminalizimin”, me qëllimin e vetëm për të siguruar pastërtinë më të lartë të Parlamentit dhe Administratës Publike shqiptare.
Ambasadori LU, qëndrime personale ndaj Prokurorisë
Qëndrimet e ditëve të fundit të ambasadorit Lu, lidhur me revokimin e vizave, i shohim si kundërvënie ndaj qëndrimeve profesionale të trupës së prokurorëve ndaj drafteve ligjore për Reformën në Drejtësi, të mbrojtura nga ambasadori amerikan në Tiranë. Vlen të theksojmë se, shumë prej problematikave të prezantuara nga Prokuroria, u konsideruan të tilla dhe u korrigjuan edhe nga Komisioni i Venecias, i cili u investua për të dhënë opinion nga palët politike në Shqipëri. Pra, nuk hezitojmë të shprehemi se, sjellja e ambasadorit amerikan në Tiranë mund të konsiderohet edhe si një hakmarrje e tij personale për qëndrimet parimore të Prokurorisë së Përgjithshme. Gjithashtu, nuk hezitojmë të shprehemi se, kjo sjellje jo-diplomatike nga ana e ambasadorit Lu është rrjedhim i shantazheve të papranuara nga ana e Prokurorisë lidhur me disa çështje konkrete hetimi, për të cilat dukshëm ai ka pasur interesa thellësisht personale.
Tahiri drekon me të akuzuarin për vrasje, kërkon të blejë vota për PS
Ministri i Brendshëm, Saimir Tahiri është akuzuar se është takuar me një të dyshuar si autor të një vrasjeje. Kjo akuzë është bërë nga deputeti i PD, Flamur Noka, i cili gjatë fjalës së tij në Kuvend tha se, Tahiri ka drekuar në Lundër me Lavdërim Tufën, të akuzuarin si vrasës të Mirit të Xhikes.
Duke iu referuar një mesazhi në celular, Noka tha se, Tahiri i ka kërkuar Lavdërim Tufës që të grumbullojë sa më shumë vota për Partinë Socialiste për zgjedhjet e 18 qershorit. Deputeti Noka akuzoi gjithashtu se, njerëz të afërt të Saimir Tahirit kanë krijuar linjë të trafikut të drogës që kalon përmes doganës së Tre Urave në Përmet.
Para pesë ditësh, Tahiri emëroi drejtor Kufiri në Policinë e Vlorës njeriun e tij më të besuar, Besmir Qibini, për të trafikuar drogën drejt Italisë dhe Greqisë. Ky emërim u bë nga Tahiri vetëm pak muaj nga dita e zgjedhjeve të përgjithshme dhe Rama me Tahirin po krijojnë terrenin për vjedhjen e votave.
Emërimi i Qibinit në krye të Policisë Kufitare të Jugut ka dhënë efektet e para në trafikun e drogës drejt Italisë. Besmir Qibini konsiderohet si një njeri tepër i afërt i ministrit të Brendshëm, Saimir Tahiri. Gjatë kohës që punoi si zv/drejtor i Doganave, Qibini ishte përgjegjës për të gjithë strukturën e anti-kontrabandës në dogana. Një vit më parë, Qibini lejoi të futet në pikën kufitare të Portit të Durrësit, Shullazin pa ushtruar kontroll në makinën e tij.
Gjatë pesë ditëve që Qibini drejton Policinë Kufitare të Vlorës, policia italiane dhe ajo greke kanë sekuestruar rreth 3 ton drogë të nisur nga brigjet e Vlorës. Të dielën, policia italiane sekuestroi 800 kg kanabis në brigjet e Sao-s, në Leçe. Mediat italiane bënë të ditur se, operacioni u krye nga Guarda di Finanza dhe ngarkesa me lëndë narkotike ishte nisur nga brigjet e Vlorës. Guardia di Finanza kapi një skaf me 800 kg hashash dhe arrestoi një skafist shqiptar dhe dy italianë.
Të hënën, policia italiane sekuestroi 506 kg kanabis të nisur nga brigjet e Vlorës. Mediat italiane shkruanin se të dy trafikantët në bord u përpoqën të iknin, duke hedhur jashtë varkës, (7 metër e gjatë dhe me motor të fuqishëm), drogën, por ata u arrestuan. Kontrabandistët, identiteti i të cilëve nuk dihet, të moshave 30 dhe 48 vjeç, të dy nga Vlora, akuzohen për posedim dhe trafikim ndërkombëtar të drogës. Marijuana e nxjerrë nga deti ishte paketuar në 28 pako me madhësi të ndryshme, me një peshë totale prej 506 kg. Po ashtu, bëhet e ditur se, nëse droga do të kishte dalë në treg për shitje, ajo kapte vlerën e 5 milionë eurove.
Po ashtu, dy ditë më parë policia italiane sekuestroi 480 kg drogë të nisur nga brigjet e Vlorës. Trafikantët tentuan ta hedhin drogën në det, por janë bllokuar menjëherë nga forca policore të Guarda di Finanza. Gjatë këtyre pesë ditëve një sasi e madhe droge është kapur edhe nga policia greke. Tre ditë më parë, policia greke sekuestroi 320 kg kanabis të futur nga Shqipëria dhe vuri në pranga dy personat që po e transportonin lëndën narkotike. Po ashtu, dje policia greke sekuestroi 130 kg kanabis dhe vuri në pranga një shtetas shqiptar.
Tani që po afrohen zgjedhjet, Tahiri ka angazhuar të gjithë njerëzit e tij të afërt për trafikun e drogës. Paratë e përfituara nga ky trafik i jashtëligjshëm do të përdoren për blerjen e votave.
Erion Braçe, lidhje me bandën e Shullazit dhe bizneset mafioze
“Erioni, meqë ra fjala i ka dhënë liçencë për përpunimin e naftës një tjetër gangsteri në Lushnjë, pronarit të “Eldon Park” dhe Lushnja helmohet çdo natë!! Aman pyete Erionin nëse s’më beson, pyet të besuarit e t’u në Lushnjë, ata ta vërtetojnë”
Ish-Kryeministri Berisha akuzoi dje deputetin e PS, Erion Braçe se ka lidhje me banditët e Emiliano Shullazit. Në një status në rrjetin social Facebook, Berisha ka publikuar mesazhin e një qytetari, i cili denoncon lidhjen e deputetit Erion Braçe me banditët e rrezikshëm në Lushnjë. Sipas qytetarit dixhital, Braçe shoqërohet me Julian Sulën ose Juli i Pashakos siç njihet nga banorët, i cili është mik me Emiliano Shullazin dhe lëviz me dy pistoleta në brez.
“Çdo bandit me një pushtetar të vetin! Qytetari dixhital denoncon: Lidhjen e deputetit Erion Braçe me banditët më të rrezikshëm në Lushnjë dhe bizneset e tyre mafioze!”, shkruan Berisha në Facebook.
“Po të shkruaj nga adresë falco se me thënë të drejtën me bandat e tyre janë të rrezikshme. Unë jam ish-socialist, Berishë i dashur, jetoj në Lushnjë, pyete pak miun Erion Braçen se me kë shoqërohet në Lushnjë? Në s’ta thotë ai, ta them unë, ai shoqërohet me Julian Sulën ose Juli i Pashakos, i thonë. A e di ti se kush është Juli i Pashakos? Të ekzekuton direkt, mik me Shullazin dhe nëpër Lushnjë bredh me 2 pistoleta në brez! Po kush po merr masa?! Erioni, meqë ra fjala i ka dhënë liçencë për përpunimin e naftës një tjetër gangsteri në Lushnjë, pronarit të “Eldon Park” dhe Lushnja helmohet çdo natë!! Aman pyete Erionin nëse s’më beson, pyet të besuarit e t’u në Lushnjë, ata ta vërtetojnë”, përfundon mesazhi i qytetarit nga Lushnja.
Braçe së bashku me kryetarin e Bashkisë së Divjakës, Kokoneshi janë akuzuar për afera korruptive me Lagunën e Karavastasë. Denoncimi u bë para disa kohësh nga kryetari i Partisë Demokratike të Lushnjës, Myslim Murrizi. Në një deklaratë për mediat, ai tha se po bëhen përfitime qindramilionëshe nga peshkimi në këtë lagunë, me një sipërmarrje të kreut të bashkisë, por të ndihmuar edhe nga deputeti Braçe. “Ka afro një vit, qysh nga muaj mars i vitit 2014, që Laguna e Karavastasë me një sipërfaqe prej 4300 hektarë administrohet në mënyrë private dhe klandestine pa asnjë lloj dokumenti financiaro–ligjor nga kryebashkiaku i Divjakës, Fredi Kokoneshi, me militantë të Partisë Socialiste i përkrahur nga deputeti Erion Braçe. Bazuar kjo në një vendim qeverie Nr.238 dt. 23.04.2014, vendim qesharak, abuziv, evaziv dhe haptasi për të vjedhur me ligj dhe pa lënë gjurmë. Kjo lagunë konform ligjeve në fuqi, ka qenë dhënë në përdorim nga Ministria e Mjedisit, Kompanisë IT SHPK deri në vitin 2017. Është pezulluar me urdhrin Nr.58 dt/25.02.2014 para se të dalë VKM.
Kjo firmë ka pasur të punësuar me kontrate vjetore 32 punëtorë të përhershëm, dhe të deklaruar në bilancin financiaro-tatimor mbi 700 kuintal peshk të zënë në vit. Prodhimtaria e kësaj lagune në historikun 25-vjeçar rezulton mbi 1000 kuintalë për çdo vit ose e shprehur në lekë 500-800 milionë lekë në vit. Problemet civile midis kompanise IT shpk dhe Ministrisë së Bujqësisë janë problem që nuk na interesojnë ne si opozitë dhe zgjidhja e tyre bëhet në rrugë gjyqësore konform ligjeve në fuqi”.
Kreu i PD Lushnjë i bëri thirrje Prokurorisë së Rrethit Gjyqësor Lushnjë që të fillojë hetimin për të zbardhur këtë aferë të pastër korruptive me mbi 500 milionë lekë të vjedhura, si abuzim i pastër me mbështetje politike.
Nëna e djali rrezikojnë jetën në autobus, Veliaj mburret me transportin publik
Kryebashkiaku i Tiranës, Erion Veliaj vazhdon të propagandojë në mediat e tij përmes kronikave të gatshme, gjoja një transport publik modern në kryeqytet, por situata është krejt ndryshe. Inspektimet gjoja të rastësishme të Veliajt në linjat urbane, nuk e mbulojnë dot gjendjen katastrofike të këtij shërbimi, të cilin qytetarët e Tiranës prej një viti e paguajnë 10 lekë më shtrenjtë.
Lapsi.al sjell historinë e një nëne dhe djalit të saj të mitur që kanë rrezikuar seriozisht jetën teksa udhëtonin me autobusin e linjës së Kristalit. A.K bashkë me djalin 4-vjeçar është rrëzuar në shkallët e autobusit teksa po mbahej nga hekurat, që përdoren zakonisht për të ruajtur ekuilibrin kur je në këmbë. Rrëzimi ka ardhur pas frenimit të shoferit të autobusit, i cili ishte duke drejtuar mjetin me shpejtësi të madhe. Autobusi kishte targat “AA 108 NM”.
“Shoferi frenoi si i çmendur. Bashkë me çunin u rrëzuam në shkallët e autobusit të dy, pasi hekuri ku po mbaheshim u shkëput. Po dridhesha e tëra, mezi e kam marrë veten nga tronditja. Djali është dëmtuar në fytyrë. Autobusi ishte fare i vjetër”, ka thënë nëna A.K.
Siç shihet, ndërkohë edhe në fotot më poshtë, të publikuara nga shuplaka.com 4-vjeçari ka pësuar dëmtime afër syrit dhe në pjesën e hundës. Ai është dërguar në spital për ndihmë mjekësore. Ndoshta ky është vetëm një rast që bëhet publik, por që mjafton për të treguar se shërbimi i transportit urban në Tiranë është në gjendje shumë të keqe dhe s’ka asnjë lidhje me teatrin që Erion Veliaj bën nëpër mediat e kapura prej tij.
Kryesore
Continue to the category
