Fati i Atletiko Madrid varet shumë nga Diego Simeone. Përveçse një strateg i aftë që ndërtoi një skuadër shumë të mirë, ai është edhe një motivues i jashtëzakonshëm. Për ta kuptuar më së miri mjafton të shohësh ndryshimin mes pjesës së parë dhe të dytë të ndeshjes së mbrëmshme të Atletikos me Barcelonën.
Pas një pjese të parë shumë zhgënjyese, të mbyllur me shifrat 2-0 në favor të Barcelonës në “Vicente Kalderon”, Simeone tregoi talentin e tij në dhomat e zhveshjes me një fjalim, të cilit lojtarët e tij ia kanë venë nofkën “Cholina”.
“Ju mund të luani mirë apo keq, por këtu ka më shumë se 55 mijë persona që kanë ardhur t’ju shohin se si lini lëkurën në fushë, se si jepet jeta për fanellën e Atletiko Madrid. Mos u shqetësoni për rezultatin, dilni dhe mbroni këtë fanellë, pasi përfaqëson 55 mijë njerëzit që janë këtu”, ishte britma e luftës e Simeones, e zbuluar nga “Cadena Cope”.
Fjalimi dha menjëherë efekt. Pas pushimit, Atletiko ishte një skuadër e tjetërsuar që shkurtoi diferencën dhe ishte disa herë pranë barazimit, duke ngjallur shanset për të mbijetuar në Kupë.

Cristiano Ronaldo shpallet sportisti më i paguar në botë për vitin 2016. Është revista prestigjioze “Forbes”, ajo që e ka zbuluar këtë nëpërmjet një klasifikimi të përpiluar prej saj, të cilën portugezi e kryeson me 88 milionë dollarë të përfituara vitin e kaluar.
Në vendin e dytë gjendet argjentinasi Lionel Mesi me 81.4 milionë dollarë që ka lënë pas Lebron James. Ylli i Cleveland Cavaliers plotëson podiumin e “Forbes”, pasi në 2016 arriti të përfitojë 77 milionë dollarë. Klasifikimi vijon me legjendën e tenisit Roger Federer, të pozicionuar në vendin e katërt dhe Kevin Durant në vendin e pestë.
Në klasifikimin e “Forbes” të sportistëve më të pasur spikasin edhe emrat e Novak Djokoviç, Cam Newton, Phil Mickelson dhe Jordan Spith. Dhjetëshja e sportistëve më të paguar në botë plotësohet nga një emër i madh i basketbollit botëror, Kobe Bryant edhe pse ish-lojtari i Lakers tashmë është tërhequr.

Dilema më e madhe e tifozëve në derbin roman të futbollit italian ka qenë çdo herë se, cila prej ngjyrave do të triumfonte në stadiumin “Olimpico”. Por këtë herë duket se kjo dilemë është zëvendësuar me atë se, cilës do t’i takojë fitorja: sigurisë publike apo programimit televiziv. Kur duhet edhe një muaj nga ndeshja e parë e gjysmëfinales së Kupës së Italisë, përplasja e skuadrave të të njëjtit qytet nis të gjenerojë konflikte.
Për shkak të historisë aspak pozitive dhe sjelljes së dhunshme të dy tifozerive në vitin 2013, Prefekti i Romës imponoi zhvillimin e ndeshjeve pasdite dhe jo në orë të vona. Në po atë vit, pati trazira të rënda, që sollën edhe 14 të plagosur, e kjo i bindi më shumë autoritetet për të mos lënë një derbi të tillë në darkë, edhe pse nga kjo sakrifikoheshin miliona për të drejtat televizive.
Gjashtë nga 8 sfidat pasardhëse derbi në Romë u zhvilluan në orën 15:00, me vetëm dy përjashtime, edhe pse jo në orë të vona, finalen e Kupës së Italisë dhe kthimin para dy sezonesh. Më 1 mars të këtij viti, dikush duhet të përkulet, pasi mundësitë janë të pakta.
Ose derbi do të luhet në një të mërkurë me pak tifozë, në orar dreke, gjë që nuk josh askënd, ose do të provohet t’i jepet besim dy tifozerive me garën e mbrëmjes, që mund të sjellë ndoshta edhe tragjedi. Sido që të shkojë, polemikat në pritje të rezultatit janë të garantuara.
Françesko Toti rikthehet të luajë titullar dhe menjëherë tregon se vazhdon të jetë i vlefshëm për Romën. Spaleti i besoi majën e sulmit, kapitenit legjendar, në përballjen ndaj surprizës së Kupës së Italisë, Çezenës dhe ai e shpërbleu, duke shënuar golin e kualifikimit në fitoren 2-1.
Toti shndërroi në gol, një penallti të fituar në minutën e 95’ të takimit, duke e bërë edhe më emocionues këtë kualifikim të Romës, e cila vuajti vërtetë shumë ndaj Çezenës modeste. Tashmë Roma do të vazhdojë rrugëtimin e Kupës me përballjen derbi, në gjysmëfinale me Lacion, e cila eliminoi Interin, duke fituar 1-2. Ndeshjet midis Romës dhe Lacios do të zhvillohen më datat 1 mars dhe 5 prill.

Arena Kombëtare është edhe zyrtarisht kandidate për të organizuar finalen e Superkupës së Europës. Impianti modern që po ndërtohet në Tiranë është mes 10 stadiumeve në garë për zhvillimin e ndeshjes së vitit 2019. Ashtu siç u konfirmua prej prezantimit të projektit nga Kryeministri Edi Rama dhe presidenti i FSHF-së, Armand Duka, synimi është që përveç ndeshjeve të Kombëtares në “Arenën Kombëtare” të zhvillohet edhe një prej finaleve më të rëndësishme të kontinentit.
Kërkesa për të luajtur finalen e Superkupës është depozituar nga Federata Shqiptare e Futbollit në selinë e UEFA-s. Në garën ku marrin pjesë dhjetë impiante nga 9 shtete të ndryshme europiane, Shqipëria ka si rivalë stadiumin e Tuluzës në Francë, impiantin “Florian Albert” në Budapest të Hungarisë, stadiumin e Haifas në Izrael, “Astana Arena” në Kazakistan, impiantin “Ëinsdor Park” në Irlandën e Veriut.
Të tjerë stadiume në garë janë “Hampden Park” në Skoci, “Besiktas Arena” në Turqi, ndërsa Polonia ka hedhur kandidaturat për “Gdansk Arena” dhe “Stadiumin Kombëtar” të Varshavës.
Sipas procedurave, më datë 1 mars të këtij viti do të zhvillohet seminari për prezantimin e kandidaturave, ndërsa më 6 qershor UEFA do të vlerësojë dokumentacionin e paraqitur nga federatat që kanë shfaqur interes. Më pas, do të jetë Ekzekutivi i UEFA-s, që në shtator do të japë vendimin përfundimtar rreth stadiumit që do të presë finalen e Superkupës së Europës në vitin 2019.

Ish-mbrojtësi i Juventusit, Martin Kaceres, gjendet në Itali ku pritet të nënshkruajë me Milanin. Por mbrojtësi duhet të kalojë më parë një sërë testesh fizike të stërzgjatura me kuqezinjtë, të cilët kanë dyshim për aftësitë e tij fizike.
Futbollisti nuk luan prej një viti, pasi më 3 shkurt 2016 dëmtoi tendinën dhe që atëherë mbeti jashtë fushave të lojës me skuadrën e Juventusit, nga e cila u shkëput në fund të sezonit.
Kaceres nuk u aktivizua me asnjë klub në pjesën e parë të sezonit, ndaj për të parashikohet që testet mjekësore para firmës në kontratën me kuqezinjtë do të jenë shumë më të hollësishme se ato që kryejnë normalisht futbollistët e tjerë. Përveç vizitave rutinë, lojtarit do t’i bëhet një kontroll i detajuar i strukturës fizike, për të shmangur mundësinë që të nënshkruajnë me një futbollist, i cili ka tendencë të dëmtohet.
Sipas mediave italiane, akordi me Kaceres do të jetë deri në fund të sezonit, periudhë për të cilën mbrojtësi do të paguhet 400 mijë euro.

Historitë interesante të futbollistëve janë të shumta. Disa për mënyrën si e kanë nisur karrierën në sportin më popullor, të tjerë për famën dhe kontratat disamilionëshe që kanë nënshkruar në moshë të vogël. Të tjerë kanë histori me vëllezërit e tyre. Mes kësaj kategorie, janë edhe vëllezërit Xhaka, një prej të cilëve është pjesë e Kombëtares shqiptare dhe tjetri në atë helvete.
“Gazzetta Dello Sport” ka bërë një renditje të dhjetë vëllezërve që kanë luajtur në nivelet maksimale dhe dyshja e parë është ajo e Xhakave.
“Vetëm një gjë të përbashkët në karrierat e tyre: Bazeli. Në jetë, gjithmonë kanë bërë zgjedhje të ndryshme, mbi të gjitha ajo e kombëtares me të cilën kanë preferuar të luajnë. Graniti ka zgjedhur të përfaqësojë Zvicrën, ndërsa Taulanti Shqipërinë. Të dy, për herë të parë janë përballur me njëri-tjetrin në fushën e lojës në Europianin ‘Francë 2016’, për kënaqësinë e mamasë mbase…”, ka përshkruar “Gazzetta” vëllezërit Xhaka.
Në një intervistë të dhënë për mediat helvete, mesfushori i Bazelit ka folur së bashku me ish-futbollistin e Jong Bojsit për përplasjen që kanë pasur mes tyre një vit më parë. Jo vetëm kaq, por Xhaka ka shpjeguar edhe marrëdhënien aktuale me Renato Shtefen, aktualisht futbollist i Bazelit dhe shoku i dhomës me shqiptarin.
“Në atë moment ishte një veprim në gjaknxehtësi e sipër dhe, pas vetëm pak sekondash e çova nëpër mend që do të më priste një ndëshkim nga federata. Aktualisht jemi miq shumë të mirë bashkë. Për fat të mirë, Renato nuk është si Delgato që gërhiste gjatë natës (qesh…). Më kanë thënë shpesh herë që ndëshkohem, mirëpo nëse krahason ndërhyrjet e mia gjatë ndeshjeve dhe numrin total të kartonëve, atëherë vihet re që nuk jam ndër futbollistët që e ekzagjeroj me kartonin”, u shpreh Xhaka.
Ai është pyetur edhe për vëllanë më të vogël, Granitin. “Është gjithmonë më i vendosur sesa unë dhe, mbi të gjitha, më bindës. Pavarësisht se është më i vogël, sa herë që kemi ndonjë diskutim, arrin të më bindë. Kemi kontakt të përditshëm bashkë, pavarësisht distancës që na ndan”, ka deklaruar Taulanti.

Bayer Leverkusen duhet të bëjë pa shërbimet e Hakan Calhanoglu deri në fund të sezonit. FIFA e skualifikoi për katër muaj futbollistin turk, për shkak të një episodi të ndodhur në vitin 2011 ndërmjet fantazistit dhe klubit të Trabzonspor. Në moshën 17-vjeçare, Calhanoglu kishte firmosur një parakontratë me klubin e Trebisonda-s, por transferimi i tij në muaj në vazhdim kur lojtari mbushi moshën për të firmosur kontratë profesioniste nuk u realizua.
Palët nuk arritën akordin dhe nga Karlsruhe, mesfushori përfundoi te Hamburgu. Në situatën e krijuar, Trabzonspori u ankua te FIFA, që dha vendimin për pezullim dhe 100 mijë euro gjobë masë disiplinore, e cila u konfirmua edhe nga Gjykata e Arbitrazhit Sportiv.
Nga e gjithë kjo situatë u dëmtua mbi të gjitha Bayer Leverkusen, skuadra aktuale e Hakan Calhanoglu. Kjo u konfirmua edhe nga drejtori sportiv i skuadrës së “aspirinave”, Rudi Völler.
“Për ne është një goditje e madhe, sepse dëmtohemi për një ngjarje me të cilën nuk kemi lidhje. Do të na mungojë një prej lojtarëve më të rëndësishëm të skuadrës”, deklaroi Völler.

“Luanët e pamposhtur” shkojnë në finalen e Kupës së Afrikës. Kameruni arrin Egjiptin në aktin final të turneut pasi mposhtu 2-0 Ganën në Franceville falë golave të Ngadeiu-Nagdjiu dhe Bassogog. Një fitore e merituar me skuadrën e Broos që arrin finalen pavarësisht se nuk konsiderohej aspak favorite në vigjilje të sfidës. Për Ganën është disfata e katërt në gjysmëfinale në 6 pjesëmarrjet e fundit, ndërsa Kameruni rikthehet të luajë një finale që i mungonte prej plot 15 vjetësh.
Pjesa e parë e ndeshjes foli për Kamerunin me Affuol që pas 8 minutash neutralizoi një goditje me kokë të Teikeu. Gana ja doli t’i rezistonte presionit duke rrezikuar në fundin e fraksionit me Atsu dhe Jordan Ayew, ndërsa në fillimin e pjesës së dytë tentoi me një goditje dënimi të Wakaso dhe një goditje nga jashtë zonës të Partey.
Ndeshja u zhbllokua nga një gol i qendërmbrojtësit të Slavias së Pragës Ngaddeu-Ngadjiu që shfrytëzoi një devijim të topit nga Bpye në daljen e Razak. Reagimi i Ganës nuk mungoi me Jordan Ayew që ishte vetëm një hap larg barazimit, me trajnerin Avram Grant që provoi gjithçka duke futur në lojë edhe Asamoah Gyan për të përforcuar sulmin, por në fund ishte Kameruni që gjeti edhe golin e dyfishimit, me një kundërsulm perfekt të finalizuar nga Bassogog.